ՌԱԲԻՍԸ ՎԵՐԱՑՆԵԼՈՒ ՀԱՄԱՐ ԱՆՀՐԱԺԵՇՏ ԵՆ ՆԱԵՎ ՀԱՍԱՐԱԿՈՒԹՅԱՆ ՋԱՆՔԵՐԸ

ՌԱԲԻՍԸ ՎԵՐԱՑՆԵԼՈՒ ՀԱՄԱՐ ԱՆՀՐԱԺԵՇՏ ԵՆ ՆԱԵՎ
ՀԱՍԱՐԱԿՈՒԹՅԱՆ ՋԱՆՔԵՐԸ

Հայաստանում որքան շատանում են զվարճանքների վայրերն ու ռեստորանները, այնքան շատանում են ռաբիս երգիչները: Մեր օրերում ո՞ր ռեստորանը կարող ես մտնել ու չլսել ռաբիս երաժշտություն, չէ՞ որ մարդիկ ռեստորան են գնում ծնունդ նշելու, բա "Իմ ախպերս" երգի տակ մի լավ չպարե՞ն, որ ցույց տան իրենց ուրախությունը: Կամ էլ` ռեստորանում մի քանի բաժակ խմելուց հետո` ինչպե՞ս չլսեն կլկլոցներով ու կիսաարաբաթուրքական երգ եւ մի փոքր "դարդոտվեն": Դե ինչ, չխանգարենք մարդկանց ու թողնենք, որ իրենց սիրելի երաժշտության ներքո մի լավ ուրախանան կամ "դարդոտվեն": Իսկ ի՞նչ անի այն մարդը, ով առօրյա հոգսերից մի փոքր կտրվելու համար գնում է համերգի` ակնկալելով, որ կլսի մաքուր հայկական երգ ու երաժշտություն: Իսկ համերգի ընթացքում մատուցում են ռեստորաններից համերգասրահ տեղափոխված երգեր: Ցավալին էլ հենց սա է, որ ռաբիսը թափանցել է համերգասրահներ  եւ հեռուստատեսային եթեր, ու այս "գրոհը" օրեցօր ավելի է ահագնանում: Անճաշակ ռաբիսը եթերից եւ համերգասրահներից վերացնելու համար ԼՂՀ մշակույթի նախարարն արգելել է ռաբիս համերգները եւ հրաժարվել դահլիճներ տրամադրել նման համերգների համար: Թե որքանո՞վ այս մոտեցումը կտա արդյունքներ, ցույց կտա ժամանակը: Իսկ ահա Հայաստանում ռաբիսի դեմ ուղղված ՀՀ մշակույթի նախարարության քայլերի մասին "Իրավունքը" զրուցեց մշակույթի փոխնախարարի, ինչպես նաեւ մշակութային գործչի հետ:
ՀՀ մշակույթի փոխնախարար ԱՐԹՈՒՐ ՊՈՂՈՍՅԱՆ -Հասարակության միջից որեւէ վատ երեւույթ վերացնելու համար նախ եւ առաջ անհրաժեշտ են հասարակության ջանքերը: Հեռուստաընկերությունները որպես լրատվամիջոց գործում են անկախ եւ ոչ ոք իրավասու չէ միջամտել նրանց վարած քաղաքականությանը, եթե իհարկե օրենքով նախատեսված դեպքեր չկան: Այս դեպքում Մշակույթի նախարարությունը կարող է արգելել որոշակի բաներ, որոնք արգելում է նաեւ օրենքը, օրինակ ֆաշիզմի քարոզչություն, պոռնոգրաֆիա եւ այլն: ՀՀ մշակույթի նախարարությունը իր գերակա ուղղությունների մեջ ամբողջովին փորձում է հանրահռչակել դասական, ազգային երաժշտությունը: Մեր գերատեսչության իրականացրած ծրագրերի մեջ բացակայում է ռաբիս երաժշտությունը: Նախարարությունն իր լիազորությունների շրջանակներում այդ հարցը լուծում է ՀՀ մշակույթի նախարարի 2010 թվականի հրամանագրի համաձայն, արգելվեց մեր համերգասրահներում ֆոնոգրամայով երգեր հնչեցնել, ինչն էլ բերեց նրան, որ ռաբիս երաժշտությունը մասամբ վերացվեց: Սակայն, պետք է ասեմ, որ նախարարությանը պատկանող համերգասրահներում տարվա մեջ նման համերգները կազմում են ընդամենը 2 տոկոս, սա էլ թույլատրվում է նրա համար, որ համերգասրահներն ունեն որոշակի արտոնություններ` իրականացնելու կոմերցիոն միջոցառումներ, որպեսզի կարողանան համերգասրահի ծախսերը հոգալ: Հասարակությունը հենց պետք է չստեղծի նման երաժշտության պահանջարկ, եթե մարդիկ չգնեն այդ համերգների տոմսերը, ապա նման համերգներ չեն լինի:
Թաթուլ Ալթունյանի անվան երգի-պարի պետական համույթի գեղարվեստական ղեկավար ԺԻՐԱՅՐ ԱԼԹՈՒՆՅԱՆ -Յուրաքանչյուր հեռուստաընկերություն ունի իր քաղաքականությունը եւ գովազդային տարբեր ձեւերը: Ընդհանրապես նրանք ամեն ինչ անում են, որ իրենց ավելի շատ թվով մարդիկ դիտեն: Ու այս ամենը հաշվի առնելով` նրանք գնում են տարբեր քայլերի, որոնց հետ մենք շատ անգամ համաձայն չենք: Անճաշակ եւ անորակ սերիալները, երգերն ու երաժշտությունը ամենուրեք է, հատուկենտ հաղորդումներ կան, որտեղ իրոք ներկայացնում են ճիշտ հայկական երգեր: Սակայն սա շատ քիչ է, պետք է այդ ամենը մեծ ծավալներ ունենա, որպեսզի հայկականը գերակշռի: Մեր տանը միշտ խոսել ենք գրական հայերենով, սակայն հեռուստատեսության պատճառով իմ թոռնիկը սկսել է խոսել այն գողական եւ անկիրթ լեզվով, որը քարոզում են հեռուստատեսությամբ: Նույնը ե՛ւ ներկայացման մեջ է, ե՛ւ երաժշտության: Դաստիարակչական եւ գեղեցիկ հայկական երաժշտություն մատուցող հաղորդումները, չգիտես ինչու, ցուցադրում են կեսգիշերն անց: Անհրաժեշտ է գեղարվեստական խորհուրդ, որը ոչ թե կխանգարի կամ կարգելի երաժշտությունը, այլ տարբեր ոլորտներից մեկ տեղ հավաքված մասնագետներն իրար լսելով եւ խորհրդակցելով` կկարողանան այս հարցին լուծում տալ: Հենց այստեղից պետք է սկսել ամբողջ աշխատանքը, որից հետո թե ինչ կանեն տվյալ հեռուստաընկերության ղեկավարները, սա էլ արդեն իրենց գործն է:

Ներկայացրեց ԶՎԱՐԹ ԽԱՉԱՏՐՅԱՆԸ