ԱԴՐԲԵՋԱՆԸ ՉԷՐ ԿԱՐՈՂ ՀԱՆԴՈՒՐԺԵԼ, ՈՐ ԱՌԱՋԻՆ ՄՐՑԱՆԱԿԸ ՀԱՅԱՍՏԱՆ ԳԱՐ

ԱԴՐԲԵՋԱՆԸ ՉԷՐ ԿԱՐՈՂ ՀԱՆԴՈՒՐԺԵԼ, ՈՐ ԱՌԱՋԻՆ ՄՐՑԱՆԱԿԸ ՀԱՅԱՍՏԱՆ ԳԱՐ

Օրերս Մոսկվայում կայացած Մուսլիմ Մագոմաեւի անվան երիտասարդ երգիչների 3-րդ միջազգային մրցույթում, որն ընթանում է Ադրբեջանի նախագահ Իլհամ Ալիեւի հովանավորությամբ, զարմանալիորեն առաջին անգամ մասնակցել է նաեւ Հայաստանը: Մրցույթում մեր երկիրը բարձր մակարդակով ներկայացրել եւ երկրորդ մրցանակին, ինչպես նաեւ մի շարք հատուկ մրցանակների է արժանացել Ալ. Սպենդիարյանի անվան օպերայի եւ բալետի ազգային ակադեմիական թատրոնի տենոր ԼԻՊԱՐԻՏ ԱՎԵՏԻՍՅԱՆԸ:
"Իրավունքի" հետ զրույցում Լիպարիտն անկեղծացավ. "Այս մրցույթին երբեւէ մտքովս չէր անցնի, որ կմասնակցեմ, քանի որ այն կազմակերպում են ադրբեջանցիները եւ ընթանում է Ալիեւի հովանու ներքո: Մրցույթի մասին տեղեկացա Մշակույթի նախարարությունից, ինձ ասացին, որ անձամբ, ինքը` Թամարա Սինյավսկայան` Մուսլիմ Մագոմաեւի այրին, զանգահարել է Հասմիկ Պողոսյանին եւ խնդրել, որ Հայաստանը նույնպես ուղարկի իր ներկայացուցչին: Այդ հանգամանքից ելնելով` մտածեցի, որ գոնե որոշ չափով արդար կգնահատեն եւ ձայնագրություններս ուղարկեցի":
Այսպիսով, հայտ ներկայացրած շուրջ 200 արտիստներից մասնակցության իրավունք են ստացել 9 երկրից 14 երգիչ, այդ թվում նաեւ մեր հայրենակիցը:
"Առաջին բաժնում բոլոր մասնակիցները կատարում էին օպերային արիաներ, իսկ երկրորդ բաժնում` երգեր Մուսլիմ Մագոմաեւի երգացանկից: Բնականաբար ես ընտրել էի Բաբաջանյանի ստեղծագործություններից: Ժյուրին բաղկացած էր օպերային արվեստի 8 հայտնի անդամներից, որոնք մասնակցի ելույթից անմիջապես հետո նշանակում էին իրենց գնահատականը, ի ցույց հանդիսատեսի",- պատմեց Լ. Ավետիսյանը:
Ի դեպ, նախորդ երկու տարիներին մրցույթի հաղթողները որոշվել են 2 մրցութային օրերին ստացած միավորների արդյունքներով, սակայն. "Մրցույթի կանոնադրության մեջ նշված էր, որ առաջին եւ երկրորդ մրցութային օրերին միավորները պիտի գումարվեն եւ ըստ միավորների արդյունքի էլ կորոշվի հաղթողը, սակայն դա տեղի չունեցավ: Միավորներով առաջին տեղում ես էի` երկու օրերի ելույթների արդյունքում հավաքեցի 302 միավոր, առաջին օրը` 146 միավոր, 2-րդ օրը` 156, ինչը հենց ենթադրում էր առաջին մրցանակ":
Մրցույթի ժյուրիի նախագահ` Մուսլիմ Մագոմաեւի այրին, ճանաչված օպերային երգչուհի Թամարա Սինյավսկայան չէր կարող հանդուրժել, որ գլխավոր մրցանակը բաժին հասնի Հայաստանին եւ գործի է դրել իր ուժերն ու տեղում փոխել կանոնադրությունը` հիմք ընդունելով միայն երկրորդ օրվա միավորները: Այսպիսով` առաջին մրցանակը բաժին է հասել Մոնղոլիայի ներկայացուցչին, երկրորդը` Հայաստանին, երրորդը` Ադրբեջանին:
"Իհարկե, մրցույթը շատ հեղինակավոր էր, բայց Ադրբեջանը չէր կարող հանդուրժել Հայաստանին եւ ստիպված նրանք շնորհեցին ինձ արծաթե մեդալը` 2-րդ մրցանակը եւ մնացած բոլոր հատուկ մրցանակները",- եզրափակեց Լ. Ավետիսյանը:

ԼԻԼԻԹ ԵՂԻԱԶԱՐՅԱՆ