"ՈՐԵՎԷ ԱՇԽԱՏԱԿՑԻ ՉԵՄ ԱԶԱՏԵԼՈՒ ԱՇԽԱՏԱՆՔԻՑ",- ԽՈՍՏԱՆՈՒՄ Է ՆՈՐ ՄԱՐԶՊԵՏԸ

"ՈՐԵՎԷ ԱՇԽԱՏԱԿՑԻ ՉԵՄ ԱԶԱՏԵԼՈՒ ԱՇԽԱՏԱՆՔԻՑ",- ԽՈՍՏԱՆՈՒՄ Է ՆՈՐ ՄԱՐԶՊԵՏԸ

Ինչպես հայտնի էª կառավարությունը երեկվա նիստում հավանություն տվեց Վայոց Ձորի մարզպետի պաշտոնում ՀԱՐՈՒԹՅՈՒՆ ՍԱՐԳՍՅԱՆԻ նշանակմանը: Նա մինչ այս նշանակումը Վայքի քաղաքապետն էր: Սարգսյանի թեկնածությունը մարզպետի պաշտոնում առաջարկել էր իշխող Հանրապետական կուսակցությունը: Վայոց Ձորի մարզպետի պաշտոնը թափուր էր երկու շաբաթ` Էդգար Ղազարյանի հրաժարականից հետո, ով նշանակվեց Լեհաստանում Հայաստանի դեսպան: Առաջիկա անելիքների, հնարավոր կադրային փոփոխությունների եւ նմանատիպ այլ հարցերի շուրջ փորձեցինք զրուցել անձամբ Հարություն Սարգսյանի հետ, ով անդրադառնալով իր մարզպետի պաշտոնում նշանակվելունª ասաց.
-Սա ՀՀԿ-ի քաղաքական որոշումն էր, բայց անշուշտ իմ քաղաքական գործընկերները հաշվի են առել իմ աշխատանքային փորձը, կենսագրությունը, քանի որ այս տարիների ընթացքում տարբեր պաշտոններ զբաղեցնելովª տիրապետում եմ մարզի ընդհանուր բոլոր խնդիրներին: Ես Վայոց Ձորից եմ, ապրելու եմ այնտեղ եւ ժողովրդի հետ հարաբերվելու եմ այնպես, ինչպես հարաբերվել եմ քաղաքապետ ժամանակ: Ես նախկինում աշխատել եմ Վայոց ձորի փոխմարզպետ, ուստի լավ պատկերացնում եմ աշխատանքի դժվարությունները, եւ դա գիտակցելով եմ իմ վրա վերցրել մարզպետի պաշտոնը: Այնպես որ կարծում եմ` հաշվի է առնվել իմ աշխատանքային փորձը: Ես փոխմարզպետ եմ աշխատել, համայնքի ղեկավար եմ եղել, կենսաթոշակային, հարկային համակարգում եմ աշխատել, վարչության պետ եմ եղել:  
- Որոն՞ք են լինելու Ձեր առաջիկա անելիքները մարզպետի պաշտոնում:
- Ի սկզբանե պետք է կարողանամ ծանոթանալ մարզի խնդիրների հետ, որպեսզի ըստ այդմ էլ հասկանամ, թե որտեղից սկսեմ: Անշուշտ, մարզում բազմաթիվ խնդիրներ կան, բայց հստակ նշել, թե որ խնդրից պետք է սկսեմ, չեմ կարող ասել, մինչեւ չծանոթանամ: Վայոց ձորի մարզի իրավիճակին ես տիրապետում եմ այնքանով, ինչքանով որ ես իմ համայնքով եմ զբաղվել: Պետք է մտնեմ գործի մեջ, ծանոթանամ բոլոր խնդիրներին, որ հասկանամ, ինչ ունենք անելու, ով որտեղից սկսի:
- Նշեցիք, որ մարզում բազմաթիվ խնդիրներ այնուամենայնիվ կան: Որո՞նք են ըստ Ձեզª առաջնային լուծման կարիք պահանջում:
- Իհարկե կան, բայց քանի որ մարզում կատարվող իրադարձություններին հստակ չեմ տիրապետում առայժմ, զերծ կմնամ, համենայնդեպս ներկա դրությամբ, առաձնացնել որեւէ խնդիր: Միանշանակ տրամադրված եմ աշխատանքի: Բոլոր խնդիրներին ծանոթանալուց հետո կանցնեմ գործի: Ներկա պահին կարող եմ ասել, որ Ջերմուկ քաղաքի զարգացման հետ կապվածª մեծ անելիքներ ունենք:
- Կադրային փոփոխություններ կլինե՞ն մարզպետարանում:
- Ես չեմ պատրաստվում փոփոխություններ անելու, որովհետեւ մարզպետարանի բոլոր աշխատակիցներին ճանաչում եմ անձնապես: Ես քաղաքապետ ընտրվելուց հետո էլ նախկին աշխատակազմից որեւէ մեկին չեմ ազատել, ու չեմ էլ պատրաստվում հիմա կադրային փոփոխություններ անել: Այլ հարց է, թե նախկին մարզպետի օրոք աշխատողները կաշխատե՞ն ինձ հետ, թե ոչ, դա արդեն իրենց խնդիրն է: Ես ինքս որեւէ աշխատակցի չեմ ազատելու աշխատանքից:
- Ինչպե՞ս եք գնահատում նախկին մարզպետի աշխատանքը:
- Շատ լավ, կարծում եմ իր աշխատանքը գնահատվել է նաեւ կուսակցությունում, քանի որ եթե չգնահատվերª ինքը չէր տեղափոխվի այլ աշխատանքի:
- Տարածված խոսակցությունների համաձայն Ձեր եւ Աշոտ Արսենյանի միջեւ լարված հարաբերություններ են առաջացել վերջին շրջանում: Իրականությանը համապատասխանո՞ւմ են այդ խոսակցությունները:
- Ես մարզում որեւէ մարդու հետ լարված հարաբերություն չունեմ, այդ թվում նաեւ պարոն Արսենյանի:
- Մարզում ունեք ԲՀԿ-ական պատգամավոր, պաշտոնյաներ: Ինչպե՞ս եք պատկերացնում նրանց հետ Ձեր աշխատանքը, քանի որ ԲՀԿ-ն հայտարարում է իշխանափոխության մասին, այսինքնª անցավ ընդդիմադիր դաշտ:
- Մեր աշխատանքը շատ լավ եմ պատկերացնում Եղեգնաձորի քաղաքապետի հետ, վստահ եմ, որ ոչ մի խնդիր չի առաջանա, պիտի աշխատենք համատեղª քաղաքի խնդիրները կարգավորման ուղղությամբ: Շատ լավ ճանաչում եմ նրան, մենք մտերիմ հարաբերությունների մեջ ենք: Ժողովրդի կողմից ընտրված քաղաքապետ է, եւ ես պարտավոր եմ հարգել մեր ժողովրդի ընտրյալին: Ես մի բան եմ պատկերացնում, որ մարզպետը եւ համայնքների ղեկավարներից յուրաքանչյուրը պետք է մնա իր իրավունքների եւ պարտականությունների մեջ: Կարեւորը համայնքների, մարզի խնդիրներին լուծում տալն է, եւ ոչ թե կուսակցական հարցերը:
- Ո՞ւմ եք տեսնում Վայքի քաղաքապետի պաշտոնում:
- Դեռ այդ հարցին չենք անդրադարձել: Ինչ խոսք, կան արժանի փոխարինողներ, բայց անուններ կփորձեմ դեռեւս չտալ:

ԻԼՈՆԱ ԱԶԱՐՅԱՆ