47 ՀԱՄԱՐԻ ԵՐԹՈՒՂԱՅԻՆԻՑ ՏՈՒԺԱԾՆԵՐԸ ԿԱՄ ԻՆՉՊԵՍ ՀԱՍՆԵԼ ՆՈՒԲԱՐԱՇԵՆ

47 ՀԱՄԱՐԻ ԵՐԹՈՒՂԱՅԻՆԻՑ  ՏՈՒԺԱԾՆԵՐԸ ԿԱՄ ԻՆՉՊԵՍ ՀԱՍՆԵԼ ՆՈՒԲԱՐԱՇԵՆ

Նուբարաշեն վարչական շրջան հասնելը հատկապես երեկոյան ժամերին, մեղմ ասած, մեծ խնդիր է: Վարչական շրջանին ընդամենը երկու  հասարակական տրանսպորտ է սպասարկում 47 համարի միկրոավտուբուսն ու 16 համարի ավտոբուսը: Վերջինը, սակայն, ինչպես  վստահեցնում են  թե տողերիս հեղինակը, թե այլ նուբարաշենցիներ, ժամը 19:30-ից  հետո  «անհետանում է»: Հույսը մնում է   47 համարի միկրոավտուբուսը, որը հիմնականում երեկոյան ժամերին  մեծ մասամբ աշխատում է գերծանրաբեռնված` 15-20,  անգամ  երեսուն րոպե ինտերվալներով  սպասարկելով բնակիչներին, որի պատճառով նուբարաշենցիները ստիպված տուն են հասնում տաքսիներով: Իսկ նրանց, ում հաջողվում է մեծ դժվարությամբ  խցկվել միկրոավտոբուս,  հաճախ կատակում են, թե պետք է  դիմել «Կիսաբաց լուսամուտներ» հաղորդաշարին «47 համարից տուժածները» անվանումով հաղորդում պատրաստելու նպատակով:  Տողերիս հեղինակը մի քանի անգամ զանգահարել  է քաղաքապետարանի թեժ գիծ: Պատասխանը հիմնականում  հետեւյալն է` ավտոմեքենաները քիչ են, դրա համար էլ հնարավոր չէ  ավելի փոքր ինտերվալներով աշխատել: Միաժամանակ,  սակայն հավաստիացնում են, որ  խիստ հանձնարարարական կիջեցնեն  երթուղին սպասարկող կազմակերպությանը`  քաղաքացիների դժգոհությանը ընթացք տալու համար:

«Իրավունքի» թղթակցին հաջողվեց կապ հաստատել  47  համարի երթուղին սպասարկող  կազմակերպության ներկայացուցիչ Ալիկ Նալբանդյանի հետ: Վերջինս նախ անակնկալի եկավ, երբ լսեց, որ իրեն լրատվամիջոցի ներկայացուցիչ է զանգահարել: Իսկ երբ  լսեց մեր հարցադրումը 47 համարի երթուղու վատ աշխատանքից  նուբարաշենցիների դժգոհության մասին, արագ-արագ ասաց. «Այսինքն, ի՞նչն է  վատ աշխատում»:

Երբ մանրամասնեցինք, խոսքն ինչի մասին է, պրն Նալբանդյանն ասաց, որ չի կարող հարցին պատասխանել, բայց հավաստիացրեց, որ ոչ մի անգամ բողոքներ նուբարաշենցիներից չի ստացել:

Ինչ վերաբերում   երեկոյան ժամերին մեքենաների քիչ լինելուն, Ալիկ Նալբանդյանը  ասաց, որ մեքենաների քչություն չկա: Իսկ թե քանի մեքենա է  երեկոյան ժամերին սպասարկում ուղեւորներին, մեր զրուցակիցն ասաց. «Նայած օր: Կոնկրետ թիվ չկա, որովհետեւ ռեմոնտ ա, հիվանդ ա: Մոտավոր եթե ասեմ 20 մեքենա աշխատում է»:

- Եթե 20 մենքենա  է աշխատում, ինչո՞ւ են  ուղեւորները  երեկոյան ժամերին տուն հասնում հիմնականում տաքսիով կամ էլ եթե հաջողվում է  նստել միկրոավտոբուս, խցկված, կներեք  արտահայտությանս համար, շախմատի ձիու կարգավիճակով:

-Ես դա հիմի չեմ կարա ասեմ: Ես պետք է ուսումնասիրեմ,  նոր ասեմ:

- Իսկ առավոտյան ժամերին եւս 20 մեքենա է աշխատո՞ւմ:

- Դե ախր, նենց տեղ եք զանգահարել, կոնկրետ ձեզ չեմ կարա ասեմ:Նենց թվեր եք ուզում…  պետք է գիծ զանգեք, որ կոնկրետ թվեր ասեն: Դուք պետք է դիսպետչերանոց զանգահարեք, որ ձեր ուզած թվերն ասեն:

- Իսկ դիսպետչերանոցը  Ձեր ենթակայության տակ է, դուք վերահսկում եք նրանց աշխատանքը:

-Ընդհանրապես քաղաքի բոլոր գծերը քաղաքապետարանի ենթակայության տակ են:

- Իսկ դիսպետչերանո՞ցը:

- Ես պետք  է ձեր նման հետաքրքրվեմ, իմանամ:

- Այսինքն` Դուք չգիտե՞ք դիսպետչերանոցը Ձեր ենթակայության տակ է, թե ոչ:

- Ահա:

Ի դեպ, Ալիկ Նալբանդյանը հրաժարվեց  անգամ 47  համարի երթուղին սպասարկող  իր կազմակերպության  անվանումն  ասել` համարելով դա  երկրորդական:

«Իրազեկ եւ պաշտպանված սպառող» ՀԿ- ի ղեկավար Բաբկեն Պիպոյանը, ով կարճ ժամանակ ընդգրկված է եղել  տրանսպորտի սակագնի վերանայման հանձնաժողովում,  մեզ հետ զրույցում  հիշեցրեց հասարակական տրանսպորտի մասին օրենքի համապատասխան դրույթը. սպասարկողը պարտավոր է  ապահովել երթուղով նախատեսված չվերթերի քանակը: Քաղաքապետարանի այդ մեկնաբանությունը  (նկատի ունի մեքենաների քանակը-խմբ.) նույնն է, թե   քաղաքապետարանը չի վերահսկում հանրային տրանսպորտի ոլորտը:

Անդրադառնալով  47  համարի երթուղին սպասարկող կազմակերպության ներկայացուցչի այն հայտարարությանը, թե 47 համարի երթուղին սպասարկող մեքենաների հստակ թիվ չի կարող ասել, Բաբկեն Պիպոյանի խոսքով` կա սահմանված նորմ, կարգ, չվացուցակով նախատեսված երթերի թիվ, որը սպասարկող ընկերությունը պարտավոր է ապահովել: ՀԿ-ի ղեկավարը նաեւ տեղեկացրեց, որ տվյալ երթուղին սպասարկող դիսպետչերանոցը երթուղին սպասարկող կազմակերպության վերահսկողության տակ է: Այլ հարց է, որ երթուղին սպասարկող կազմակերպությունը կարող է չիմանալ, օրինակ, թե երեկ կամ առաջին օրը քանի մեքենա է շահագործվել:

«Իրազեկ եւ պաշտպանված սպառող» ՀԿ- ի ղեկավարը կարծում է, որ խնդիրը կարող է լուծվել միայն տրանսպորտի ոլորտում համակարգային փոփոխություններ անելուց հետո միայն,  այլ ոչ թե  տրանսպորտի գինը բարձրանելուց հետո:

Քաղաքապետարանից պատասխան ստանալ այդպես էլ չհաջողվեց: Արդեն երեք օր է, փորձում ենք կապ հաստատել Երեւանի քաղաքապետարանի տրանսպորտի վարչության պետ Հենրիկ Նավասարդյանի  հետ, սակայն վարչությունից մեզ փոխանցում են, որ ինքը կամ շենքից դուրս է եկել կամ պատվիրակություն է եկել եւ նրա հետ հանդիպման է:

Սոնա Դավթյան