ՕԵԿ-Ը ՉԻ ՈՒՐԱՆԱ ԻՐ ՆԱԽԿԻՆ ԿՈԱԼԻՑԻՈՆ ԳՈՐԾԸՆԿԵՐՈՋԸ

ՕԵԿ-Ը ՉԻ ՈՒՐԱՆԱ ԻՐ ՆԱԽԿԻՆ ԿՈԱԼԻՑԻՈՆ ԳՈՐԾԸՆԿԵՐՈՋԸ

Այսօր լրագրողների հետ հանդիպման ժամանակ ԱԺ ՕԵԿ խմբակցության պատգամավոր ԻՇԽԱՆ ԽԱՉԱՏՐՅԱՆԸ հայտարարեց, որ «Օրինաց երկիրը», լինելով ընդդիմություն, չի պահանջի ՀՀ նախագահի կամ կառավարության հրաժարականը. «Սրա համար կա երկու պատճառ. նախ Սերժ Սարգսյանի հետ աշխատել ենք վեց տարի եւ, բնականաբար, ճիշտ չի լինի, որ իր հրաժարականը պահանջենք: Եվ երկրորդ` նա հեռացող նախագահ է եւ ինքը հայտարարել է, որ չի առաջադրվելու»: «Իրավունքի» այն հարցին, թե արդյո՞ք Ի. Խաչատրյանը գտնում է, որ իրենց խմբակցության ընդդիմադիր դառնալով է պայմանավորված այն, որ երեկ կառավարությունը մերժեց ՕԵԿ-ի երկու օրենսդրական նախաձեռնությունները, բանախոսը նշեց. « ՕԵԿ-ը նաեւ մարզերից է խնդիրները բերում եւ դրանք կյանքի կոչելու համար նախագիծ ներկայացնում Ազգային ժողով: Իհարկե, մեր նախագծերի հիմքում ընկած է ազգային եւ պետական շահը, մեր ժողովրդի համար մենք մտածում ենք եւ ուզում ենք ինչ-որ խնդիրներ լուծել, բարեփոխում անել:  Այսինքն` մենք օրենսդրական նախագծերով փորձում ենք սոցիալական, տնտեսական խնդիրներ լուծել: Ինչ վերաբերում է Ձեր հարցին, իհարկե, կառավարությունն առաջին անգամ չէ, որ մերժել է: Էլի նախագծեր ենք ունեցել, որ մերժվել է, ուղղակի համագործակցության կողմնակից եմ: Կարելի էր այդ նախագծերը քննարկել եւ համատեղ կյանքի կոչել: Բայց մենք լինելու ենք հետեւողական մեր աշխատանքների մեջ եւ փորձելու ենք առավելագույնը անել, որ դրանք կյանքի կոչվեն:  «Օրինաց երկիրը» կենսունակ քաղաքական ուժ է: Երբ մարդիկ այնքան չարացած էին, պնդում էին, խոսում էին, ասեկոսներ էին տարածում, թե «Օրինաց երկիրը» չի լինելու, ՕԵԿ-ն ապացուցեց եւ ապացուցել է 18 տարի շարունակ, որ շարունակելու է լինել այս քաղաքական դաշտում ու երկար է լինելու, որովհետեւ մեր ազգի համար դեռ ծառայելու ցանկություն ունենք…»:

ՀՐԱՆՏ ՍԱՐԱՖՅԱՆ