ՏԵՂԻ Է ՈՒՆԵՑԵԼ «ԵՐԳԸ ԲԱՐԵԿԱՄՈՒԹՅԱՆ ԿԱՄՈՒՐՋ Է» ՌՈՒՍԱԿԱՆ ԵՐԳԻ ՓԱՌԱՏՈՆԻ ՄԱՐԶԱՅԻՆ ՓՈՒԼԸ

ՏԵՂԻ Է ՈՒՆԵՑԵԼ «ԵՐԳԸ ԲԱՐԵԿԱՄՈՒԹՅԱՆ ԿԱՄՈՒՐՋ Է»

ՌՈՒՍԱԿԱՆ ԵՐԳԻ ՓԱՌԱՏՈՆԻ ՄԱՐԶԱՅԻՆ ՓՈՒԼԸ

Դեռեւս 2000թ-ին սկիզբ առած «Երգը բարեկամության կամուրջ է» ռուսական երգի հանրապետական երրորդ հերթական փառատոնի մարզային փուլը տեղի ունեցավ Հրազդան քաղաքի Հ. Օրբելու անվան N 13 ավագ դպրոցում: Մեկնարկը տրվելու ժամանակ ոչ-ոք չէր կարծում, որ այս միջոցառումը շարունակական բնույթ է կրելու, սակայն այն ոչ միայն շարունակական, այլեւ ավանդական դարձավ` ի շնորհիվ ռուս-հայկական դարավոր բարեկամության: Նման միջոցառումները նպաստում են ռուսաց լեզվի, ռուսաց մշակույթի վարկի բարձրացմանն Հայաստանի դպրոցներում եւ մատաղ սերնդի միջավայրում, այն սերնդի, որին պատկանում է մեր երկրի ապագան: Բոլոր դպրոցները ակտիվ մասնակցություն են ցուցաբերել, փառատոնի ընթացքում ավելի սերտորեն ուսումնասիրել ռուսաց լեզուն, հաղորդակցվել ռուսաց հարուստ մշակույթի եւ ռուսական գրականության հետ` նպաստելով բարեկամության էլ ավելի ամրապնդմանը: Փառատոնին մասնակցել են ՀՀ դպրոցների աշակերտները` առանց տարիքային սահմանափակումների: Այ ն անց է կացվել 4 փուլով` նախապատրաստական, դպրոցական, մարզային եւ եզրափակիչ:
Մարզային միջոցառումը մեկնարկել է Հայաստանի Հանրապետության և Ռուսաստանի Դաշնության պետական օրհներգերով:
Այնուհետև Աբովյանի N 2 հիմնական դպրոցի երգչախմբի կատարմամբ հնչել է Ռոբերտ Ամիրխանյանի հեղինակած «Տուր ինձ քո ձեռքը իմ ազնիվ ընկեր» ստեղծագործությունը, որը համարվում է «Երգը բարեկամության կամուրջ է» ռուսական երգի փառատոնի պաշտոնական օրհներգը:
Փառատոնի մարզային փուլի բացման հանդիսավոր արարողությանը մասնակցել, ներկաներին ողջունել և ՀՀ Կոտայքի մարզպետ Ա. Հարությունյանի շնորհավորանքն է փոխանցել Կոտայքի մարզպետի տեղակալ Կ. Մարգարյանը:
«Երգը բարեկամության կամուրջ է» ռուսական երգի փառատոնի Կոտայքի մարզային փուլի մասնակիցներին ողջունել են նաև Ռուսաստանի հայերի միության փոխնախագահ, Համաշխարհային հայկական կոնգրեսի փոխնախագահ Վ. Աղայանն ու Հայաստանի Հանրապետությունում Ռուսաստանի դաշնության դեսպանատան խորհրդական Օ. Շապովալովը:
Փառատոնի մարզային կազմկոմիտեի կողմից հրապարակված տեղեկատվության համաձայն` մարզի հանրակրթական դպրոցներում տեղի են ունեցել ռուսական պոեզիայի 61 երեկոներ, ավելի քան 50 ցերեկույթներ, թվով 47 գրական-երաժշտական կոմպոզիցիաներ, շուրջ 40 վիկտորինաներ, երկու տասնյակի հասնող կլոր սեղաններ և ավելի քան 100 բաց-դասեր ու տարաբնույթ այլ միջոցառումներ:
Կազմակերպիչների փոխանցմամբ փառատոնի շրջանակներում տեղի են ունեցել շուրջ 690 միջոցառումներ, որոնք նպատակ են ունեցել դպրոցականներին հաղորդակից դարձնել ռուս ժողովրդի մշակութային, հոգևոր և լեզվական արժեքներին, աջակցել Ռուսաստանի` որպես Հայաստանի ռազմավարական գործընկերոջ վերաբերյալ գիտելիքների տարածմանը:
Հավելենք, որ մարզային փուլի հաղթողները նոյեմբերի 21-ին մասնակցելու են «Երգը բարեկամության կամուրջ է» ռուսական երգի փառատոնի հանրապետական փուլին:

ՇԱՀԱՆԵ ԽԱՉԱՏՐՅԱՆ