«ՄԵՆՔ ՄՅՈՒՍՆԵՐԻՑ ՄԻ ՀԱՐՅՈՒՐ ՏԱՐԻ ԱՌԱՋ ԵՆՔ»

«ՄԵՆՔ ՄՅՈՒՍՆԵՐԻՑ ՄԻ ՀԱՐՅՈՒՐ ՏԱՐԻ ԱՌԱՋ ԵՆՔ»

Երգչուհի, երգահան, «Հայաստանի երգիչների միավորում» ՀԿ հիմնադիր-նախագահ ՄԱԴԼԵՆ ԱՍՐՅԱՆԸ այն առաջամարտիկն է, ով ժամանակակից ռիթմերի ներքո նոր շունչ տվեց ժողովրդական երգին, մնաց հավատարիմ արցախցի հայուհու կերպարին ու միեւնույն ժամանակ հստակ քայլերով շարժվեց ժամանակի հետ` լինելով 21-րդ դարի զարկերակում: Հենց նրա հետ էլ ծավալվեց «Իրավունքի» զրույցը, ինչպես իր ստեղծագործական ուղու, այնպես էլ երգարվեստին վերաբերող մի շարք հարցերի շուրջ:

- Տիկին Մադլեն, ժամանակին շատ համարձակ քայլի գնացիք` համագործակցելով «Արմենոիդս» խմբի հետ ու ժողովրդականը համեմելով ժամանակակից երաժշտության հետ: Ըստ Ձեզ, դա՞ էր ճանապարհը` մեր երիտասարդներին մոտեցնելու ժողովրդական երգերին:

- Անշուշտ: «Արմենոիդս» խմբի հիմնադիր-ղեկավար Էդգար Ռոստոմյանը հենց այդ նպատակն էր հետապնդում, որովհետեւ երիտասարդները, կարծես թե, հեռացել էին արմատներից: Եվ նա ժամանակակից ռիթմերով հրամցրեց երիտասարդներին ժողովրդականը, որպեսզի գրավի նրանց, եւ կարծում եմ` հաջողվեց: Շատ շատերից եմ լսել բացասական կարծիքներ, թե իբրեւ ի՞նչ է երիտասարդների հետ հայկական ժողովրդական երգելը: Բայց բացատրել եմ` հարգելի՛ս, մենք չենք աղավաղել հայկական երգը, երգում ենք այնպես զուլալ, մաքուր, ինչպես կա, պարզապես երաժշտական համեմունքներն ենք ավելացնում, որպեսզի մեր երիտասարդությունն ընկալի, ուրախանա այդ երաժշտության ներքո եւ մեկը մյուսին ժառանգաբար փոխանցի:

- Հետաքրքիր է, այնուամենայնիվ, սկզբում այդ առաջարկը հեշտությա՞մբ ընդունեցիք:

- Երբ Էդգար Ռոստոմյանն ինձ առաջարկեց, ես կամուկացի մեջ էի: Բայց հետո մտածեցի` ինչու ոչ, փորձենք, եւ ստացվեց: Շատ մասնագետներ կային, որ ասում էին, թե մենք մյուսներից մի հարյուր տարի առաջ ենք եւ մի հարյուր տարի հետո կարող է մարդիկ մեզ հասկանան, թե ինչ հեղափոխություն կատարեցիք: Շատերը, իսկապես, հիացած էին, ովքեր ինձ տեսնում էին, մոտենում, ասում էին` հրաշք եք, ինչքան գեղեցիկ սինթեզ է, որ կարողացաք մատուցել մեր ժողովրդին ու տարբեր ազգերին:

- Իսկ ինչո՞ւ համագործակցությունն ընդհատվեց:

- Չեմ կարծում` ընդհատվել է, սա ընդամենը դադար է, որովհետեւ Էդգարը ԱՄՆ-ում էլի աշխատում է: Նա համագործակցում է System of a down խմբից Սերժ Թանկյանի հետ: Կյանքում այսպիսի անակնկալներ են լինում: Էդգարն ամուսնացավ եւ գնաց ԱՄՆ: Կարծում եմ` անպայման ինձ կհրավիրի կամ ես կհրավիրեմ իրեն, եւ էլի կհամագործակցենք: Օրինակ, շուտով կկայանա իմ «35 տարի բեմում» համերգային տոնակատարությունը, եւ ես անպայման պետք է հրավիրեմ Էդգարին եւ այդ համերգին կմասնակցի «Արմենոիդսը»: Էդգարը միշտ ասում էր. «Տիկին Մադլեն, Դուք "Արմենոիդսի" այցեքարտն եք»:

ՀՐԱՆՏ ՍԱՐԱՖՅԱՆ

Հ.Գ. - Հարցազրույցն ամբողջությամբ կարդացե՛ք  «Իրավունք» թերթի վաղվա տպագիր համարում: