ՄԵԿՆԱՐԿՈՒՄ Է «ՌՈԼԱՆ» ՄԱՆԿԱՊԱՏԱՆԵԿԱՆ 10-ՐԴ ՄԻՋԱԶԳԱՅԻՆ ՓԱՌԱՏՈՆԸ

ՄԵԿՆԱՐԿՈՒՄ Է «ՌՈԼԱՆ» ՄԱՆԿԱՊԱՏԱՆԵԿԱՆ 10-ՐԴ ՄԻՋԱԶԳԱՅԻՆ ՓԱՌԱՏՈՆԸ

ՀՀ նախագահի, ՀՀ մշակույթի նախարարության աջակցությամբ, Հայաստանի «Ռոլան Բիկով» հիմնադրամը նոյեմբերի 8-12-ը կանցկացնի «Ռոլան» մանկապատանեկան ֆիլմերի միջազգային փառատոնը: Այս տարի փառատոնի համար հոբելյանական է եւ նշվում է 10-րդ ամյակը: Փառատոնը միաժամանակ կմեկնարկի Երեւանում, Գյումրիում, Ալավերդիում եւ Գավառում: 10-րդ «Ռոլան» մանկապատանեկան ֆիլմերի միջազգային ծրագրում այս տարի ընդգրկվել է 145 ֆիլմ`38 երկրներից: Նախորդ տարիներին փառատոնը կրում էր «Ռոլան Բիկով» անվանումը, որն այս տարի փոփոխությունների ենթարկվելով դարձել է «Ռոլան»:

ՀՀ մշակույթի փոխնախարար Արթուր Պողոսյանի խոսքով` փառատոնը այն առանձնահատուկ միջոցառումներից է, որը կապված է հայ պատանիների եւ մանուկների հետ. «2001 թվականին հիմնադրվեց այս փառատոնը, այնուհետեւ այս տարիների ընթացքում բովանդակային եւ աշխարհագրական լուրջ առաջընթաց գրանցեց: Այս փառատոնը մյուսներից տարբերվում է նրանով, որ նվիրված է հենց մանկապատանեկան ֆիլմերին: Խնդիր է դրված, որ մանուկներին հաղորդակից դարձնեն կինոարվեստի իրենց հետաքրքրող նմուշներին»,-նշեց ԱՐԹՈՒՐ ՊՈՂՈՍՅԱՆԸ: Ըստ փոխնախարարի` փառատոնի առանձնահատկություններից մեկն էլ այն է, որ ընդգկված են գրեթե բոլոր մարզերը:

10-րդ հոբելյանական փառատոնի կապակցությամբ փոփոխության է ենթարկվել ժյուրիի ձեւաչափը: Այս տարի տարբեր անվանակարգերում կաշխատեն միայն մանուկները եւ երիտասարդները: Փառատոնը բացի մարզերից կնդգրկի նաեւ զորամասերը եւ լավագույն հայրենասիրական ֆիլմերը կդիտեն տարբեր զորմասերի զինծառայողներ: «Պատիվ ունեմ» ռազմահայրենասիրական անվանակարգում ընդգրկված  ֆիլմերի միջոցով կազմակերպիչները նպատակ ունեն նպաստել զինվորների գաղափարական դաստիարակությանը, բանակի մարտական ոգու բարձրացմանը:

«Մեր փառատոնի կարեւորություն գիտակցվում է պետության կողմից, ինչն էլ շատ ոգեւորում է կազմակերպիչներին: Փառատոնը ունի մոտավոապես 150 հազար մասնակից եւ շատ կաեւոր է փառատոնի շրջանակներում մեր համագործակցությունը միջազգային կազմակերպությունների հետ»,-շնորհակալություն հայտնելով փառատոնի աջակիցներին նշեց Հայաստանի «Ռոլան Բիկով» հիմնադրամի նախագահ ՆՈՒՆԵ ՄԱՆՈՒԿՅԱՆԸ:

Փառատոնի հանդիսավոր բացումը տեղի կունենա նոյեմբերի 8-ին «Մոսկվա» կ/թ-ում`«Կիսալուսնի ծովածոցը» ֆիլմի ցուցադրմամբ:

Բոլոր ցուցադրւթյունների մուտքն ազատ է:

ԶՎԱՐԹ ԽԱՉԱՏՐՅԱՆ