«ԱՇԽԱՏՈՂ ՀՂԻ ԿԱՆԱՆՑ ԽՆԴԻՐԸ ԿԱՐԳԱՎՈՐՎԵՑ»

«ԱՇԽԱՏՈՂ ՀՂԻ ԿԱՆԱՆՑ ԽՆԴԻՐԸ ԿԱՐԳԱՎՈՐՎԵՑ»

Երեկ Ազգային ժողովում անցկացվեց ՀՀԿ խմբակցության փակ նիստը, որին ներկա էր նաեւ ՀՀ աշխատանքի եւ սոցիալական հարցերի նախարար Արտեմ Ասատրյանը: Նիստի արդյունքում որոշվեց լուծում տալ վերջին օրերին չարչրկված «Ժամանակավոր անաշխատունակության նպաստների մասին» օրենքում փոփոխություններ կատարելու օրինագծի վիճահարույց հարցին: Իսկ թե ինչպես լուծվեց աշխատող ու չաշխատող հղի կանանց նպաստների հարցը, մանրամասնեց ԱԺ ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆԸ. «Համատեղ աշխատանքի արդյունքում կառավարությունը ներկայացրել է օրինագծի նոր տարբերակ, որը տալիս է հանրությանը հուզող հարցերի պատասխանները: Աշխատող հղի կանանց խնդիրը կարգավորվեց եւ նրանց վճարումները կլինեն 100 տոկոսով: Նաեւ կարողացանք պահպանել չաշխատող հղի կանանց վարձատրության հարցը»: Ավելին` ինչպես նշեց պարոն Բաղդասարյանը, իրենք սահմանել են աշխատավարձի մեկ միլիոն շեմ. «Մինչեւ 1 միլիոն ՀՀ դրամ աշխատավարձ ստացողները 100 տոկոսով կստանան իրենց նպաստը: Սա կազմում է մոտավորապես 4,6 միլիոն: Նման աշխատողները Հայաստանում 110 հազար հոգի են: Մնում է 400 հոգու խնդիրը, որոնք 1 միլիոնից բարձր են ստանում: Այս խմբի համար կլինի այլ մոտեցում, փոխհատուցումը կանի գործատուն: Սա ընդունելի տարբերակ է, գործատուն կարող է մտածել, որ իր բեռը ծանրանում է, բայց նա պետք է շահագրգռված լինի նպաստել ծննդաբերության ավելացմանը: Իսկ չաշխատող մայրերի համար աշխատավարձի 50 տոկոսը կփոխհատուցվի, թիվը քննարկելի է, բայց նախնական այդպես որոշեցինք»: Ի դեպ, հարցին այսքան կարեւորություն տալով` Վ. Բաղդասարյանը կատակեց. «Մեր կին պատգամավորներն էին հարցը բարձրացրել, մենք էլ կատակով ասել էինք, թե ճիշտ է` տղամարդիկ չեն հղիանում, բայց նպաստում են հղիացմանը, ուրեմն մենք էլ ենք խնդրով անհանգիստ»:

ՀՐԱՆՏ ՍԱՐԱՖՅԱՆ