ԲՀԿ-Ը ՉԻ ԿՈՂՄՆՈՐՈՇՎՈՒՄ `Ի՞ՆՉ ՆԿԱՏԻ ՈՒՆԻ «ԱՐՏԱՔԻՆ ՔԱՂԱՔԱԿԱՆ ՁԱԽՈՂՈՒՄՆԵՐ» ԱՍԵԼՈՎ

ԲՀԿ-Ը ՉԻ՞ ԿՈՂՄՆՈՐՈՇՎՈՒՄ `ԻՆՉ ՆԿԱՏԻ ՈՒՆԻ «ԱՐՏԱՔԻՆ ՔԱՂԱՔԱԿԱՆ ՁԱԽՈՂՈՒՄՆԵՐ» ԱՍԵԼՈՎ

Հոկտեմբերի 24-ի հանրահավաքին ԲՀԿ առաջնորդը հայտարարել էր, որ Հայաստանն անհաջողություններ ունի նաեւ արտաքին քաղաքական ոլորտում: Արտաքին քաղաքական դաշտի անհաջողությունների մասին տարբեր առիթներով խոսել է նաեւ ԲՀԿ խմբակցության քարտուղար Նաիրա Զոհրաբյանը: «Իրավունքն» արդեն մոտ երկու շաբաթ է` փորձում է ԲՀԿ առաջնորդի մամլո խոսնակ Իվետա Տոնոյանից պարզել`արդյոք Հայաստանի արտաքին քաղաքական ձախողումներ ասելով ԲՀԿ առաջնորդը նկատի է ունեցել Հայաստանի անդամակցությունը ԵՏՄ-ին: Իվետա Տոնոյանը, սակայն, հարցին պատասխանելու փոխարեն նախ հարցնում է արդյոք Նաիրա Զոհրաբյանի հետ խոսել ենք, թե ոչ, իսկ խոստանում մոտ 15 րոպեից մեր հարցին պատասխանել ու…. մինչ այս պահը դեռ «պատասխանում է»:

Ինչպես միշտ, այս դեպքում էլ հասկանալի չէ ԲՀԿ-ի` « Հայաստանն անհաջողություններ ունի նաեւ արտաքին քաղաքական ոլորտում» արտահայտությունն ու դրա ենթատեքստը: Կարող ենք պարզապես ենթադրել, որ արտաքին քաղաքական ձախողումներ ասելով ԲՀԿ-ը նկատի ունի ԵՏՄ-ը, քանի որ այս պահի դրությամբ Հայաստանն արտաքին քաղաքական այլ ձախողումներ չի արձանագրել: Եթե մեր ենթադրությունն իրոք համապատասխանում է իրականությանը, ապա այս դեպքում ինչպե՞ս հասկանալ օրեր առաջ ԲՀԿ խմբակցության  պատգամավոր Ստեփան Մարգարյանի այն հայտարարությունը, թե ԲՀԿ-ը որպես ինտեգրացիոն գործընթացի, դեմ չէ Հայաստանի` ԵՏՄ անդամակցությանը: Հուսանք` մինչ նոյեմբերի 17-18-ը, երբ ԱԺ-ը կվավերացնի Հայաստանի ԵՏՄ անդամակցության պայմանագիրը, ԲՀԿ-ը այս հարցի պատասխանը առաջին հերթին ինքն իր համար կպարզի:

Սոնա Դավթյան