ՉՆԱՅԱԾ "ԲՈՐՈՒՍԻԱՅԻ" ՃԳՆԱԺԱՄԻՆª ՄԽԻԹԱՐՅԱՆԸ ՏԵՍԱՆԵԼԻ Է

ՉՆԱՅԱԾ "ԲՈՐՈՒՍԻԱՅԻ" ՃԳՆԱԺԱՄԻՆª ՄԽԻԹԱՐՅԱՆԸ ՏԵՍԱՆԵԼԻ Է

Հենրիխ Մխիթարյանի Դորտմունդի "Բորուսիան" խորը ճգնաժամային ժամանակներ է ապրում, հայ ֆուտբոլիստի եւ թիմի մյուս աստղային ֆուտբոլիստների ջանքերը, թերեւս, ապարդյուն են:
Գերմանիայի առաջնության 10-րդ տուրի շրջանակներում տեղի ունեցած սկզբունքային` "Բավարիա"-"Բորուսիա" խաղում դորտմունդցիները պարտություն կրեցին 2:1 հաշվով, որն արդեն թիմի 5-րդ անընդմեջ պարտությունն էր: Այս պահի դրությամբ "Բորուսիան" ունի ընդամենը 7 միավոր եւ եզրափակում է մրցաշարային աղյուսակը, եւ նույնիսկ դժվար է հիշել, թե երբ է դորտմունդցիների դրությունը Բունդեսլիգայում այսքան անհաջող եղել:
"Բորուսիայի" գլխավոր տնօրեն Հանս-Յոահիմ Վացկեն այս խաղից հետո խոսել է թիմի ցուցադրած խաղի մասին, ինչպես նաեւ անդրադարձել է Մխիթարյանին. "10 խաղում 5 անընդմեջ պարտություն կրելն արդեն պատահականություն չէ. դա մեր խաղի հետեւանքն է: Այսպիսի տեմպերով մենք պետք է շուտով այլ աշխատանք փնտրենք: 2 շաբաթվա ընթացքում ես աճ եմ նկատում վերջերս խաղադաշտ վերադարձած ֆուտբոլիստների մոտ: Մխիթարյանն ու Գյունդոգանն արդեն լավ մարզավիճակում են եւ դա մեր հաջողության բանալին է: Ինչ վերաբերում է Մարկո Ռոյսին, ապա նա իր դերակատարումն ունեցավ այս խաղում: Սակայն, եթե մենք չնվաճենք Չեմպիոնների լիգայի ուղեգիր, ապա շատ բարդ կլինի Ռոյսին պահել թիմում",- Վացկեի խոսքը մեջբերում է Der Westen-ը:
Չնայած թիմի կրած անհաջողություններինª Հենրիխ Մխիթարյանը յուրաքանչյուր խաղում ապացուցում է բարձր կարգն ու իր անհրաժեշտությունը թիմի խաղում: Վերջինս, թեեւ նոր է միայն հասցրել վնասվածքից ապաքինվել ու աստիճանաբար համապատասխան մարզավիճակի հասնել, սակայն այդ կարճ ժամանակահատվածում դարձյալ իր տեղը թիմում դարձրեց անվիճելի: Ակնհայտ է, որ այս պահին Մխիթարյանն իսկապես շատ անհրաժեշտ է թիմին, քանի դեռ "Բորուսիան" վերջնականորեն չի ստացել մրցաշրջանի անհաջողակի անունը: Չնայածª Բունդեսլիգայի կայքը ներկայացրել է ֆուտբոլի Գերմանիայի առաջնության 10-րդ տուրի "անհաջողակներին", արդեն իսկ նրանց թվում տվել է նաեւ Մխիթարյանի անունը, ով գնդակով գլխին ուժգին հարված էր ստացել Մյունխենի "Բավարիայի" դեմ խաղում. խաղի սկզբնամասում "Բորուսիայի" գերմանացի դարպասապահ Ռոման Վայդենֆելերն էր պատահմամբ գնդակով հարվածել Մխիթարյանի գլխին: Խաղադաշտից դուրս օգնություն ստանալուց հետո, հայ կիսապաշտպանը վերադարձել էր խաղադաշտ եւ "Բորուսիայի" կազմում լավագույններից էր այդ խաղում: Ինչեւէª "Բորուսիայի" համար այս դժվար ժամանակներում Մխիթարյանը շարունակում է ապացուցել, որ իզուր չէր իր տրանսֆերի համար  թիմի վճարած գումարը: Թեեւ որոշ ֆուտբոլային մասնագետներ համարում են, որ այդ գումարը չնչին է այն աշխատանքի համեմատ, որը հայ ֆուտբոլիստը կատարում է խաղադաշտում յուրաքանչյուր հանդիպման ժամանակ:

ՔՐԻՍՏԻՆԵ ՊԵՏՐՈՍՅԱՆ