ՄԵՐ ԲԱՆԿԵՐԸ "ՇՆՉՈՒՄ" ԵՆ ՄԻԱՅՆ ԴՐՍԻ ԿԱՊԻՏԱԼԻ ՀԱՇՎԻ՞Ն

ՄԵՐ ԲԱՆԿԵՐԸ "ՇՆՉՈՒՄ" ԵՆ ՄԻԱՅՆ ԴՐՍԻ ԿԱՊԻՏԱԼԻ ՀԱՇՎԻ՞Ն

"2015-ին ՀՀ կառավարությունը կշարունակի տնտեսական միջոցառումների իրականացումը` պետական միջամտությունն ուղղելով ներքին միջոցների արդյունավետ վերաբաշխմանը եւ տնտեսության կայուն աճի ապահովմանը: Մասնավորապես, կառավարության գերակա խնդիրներից մեկը երկրում բնակչության բարեկեցության աճը եւ աղքատության հաղթահարումն է, որն իր արտացոլումն է գտել 2015-ի պետբյուջեի ծրագրով",- անդրադառնալով 2015 թվականի պետբյուջեին` ասաց Կենտրոնական բանկի նախագահ ԱՐԹՈՒՐ ՋԱՎԱԴՅԱՆԸ:
-Պետբյուջեի եկամուտների մասով նախատեսվում է ապահովել միջնաժամկետ ծրագրով նախատեսված հարկերի հավաքագրման աճին ուղղված միջոցառումների շարունակականությունը:
Շարունակվելու է տնտեսական գործունեության ստվերային հատվածի կրճատմանն ուղղված միջոցառումների իրականացումը: Օրենսդրական փոփոխությունների արդյունքում ակնկալվում է հավաքագրել լրացուցիչ 25,5 միլիարդ դրամ:
- Պարոն Ջավադյան, բոլորովին վերջերս ԲՀԿ-ական պատգամավորներից մեկը, անդրադառնալով հայաստանյան բանկային համակարգին, նշեց, որ մեր երկրում բանկ հիմնելը հացի արտադրամաս ստեղծելու նման մի բան է: Ինչպե՞ս կմեկնաբանեք վերոնշյալը:
- Բնականաբար, դա աբսուրդ կարծիք է: Բանկ ստեղծելու համար անհրաժեշտ է, որ ինստիտուցիոնալ կառույց լինի, բանկ ստեղծելու համար պետք է համապատասխան դրամագլուխ լինի, էլ չեմ խոսում համապատասխան մասնագետների, տեխնիկական միջոցների եւ այլնի մասին: Եթե նման համեմատություն են անում, ի՞նչ ասեմ: Ես չգիտեմ, ով է նման հայտարարաություն արել, բայց պատրաստ եմ մանրակրկիտ պատասխանել:
- Ասում են, որ դա միակ բիզնեսն է, որ Հայաստանում բուռն զարգացում է ապրում, քանի որ դա պայմանավորված է նրանով, որ մարդիկ բանկերից ցանկացած տոկոսով ճարահատյալ վարկ են վերցնում, որ լուծեն իրենց ամենահրատապ խնդիրները:
- Բանկային բիզնեսում շահութաբերությունը ինը տոկոսից պակաս է այս պահին: Խնդրում եմ, համեմատեք դա ցանկացած այլ բիզնեսի հետ. կա՞ ինը տոկոսով որեւէ բիզնես: Մեզ մոտ բանկերը չեն փակվում  միայն այն պատճառով, որովհետեւ մեր բանկերի ութսուն տոկոսը դրսի կապիտալ է, եւ նրանց համար նման շահութաբերությունը բավարար է:
- Ընդհանուր առմամբ, հետադարձ հայացք նետելով դեպի անցյալ` ինչպե՞ս եք գնահատում ՀՀ-ի բանկային համակարգն այսօր:
- Կայուն, հինգ տարվա մեջ ֆինանսական միջնորդությունը ավելացել է երեք անգամ, վարկերը ավելացել են մոտ երեք անգամ, բանկերի ակտիվների ՀՆԱ-ն ավելացել է 2,5 անգամ:
- Հայաստանի` ԵՏՄ-ին անդամագրման փաստը, որեւէ ազդեցություն կունենա՞ բանկային համակարգի վրա:
- Ոչինչ չի փոխվելու, որովհետեւ մենք նույն լեզվով ենք խոսում մեր ռուս եւ ղազախ գործընկերների հետ, այնպես որ, որեւէ խնդիր չունենք: Նույն հաշվապահական ստանդարտներն են, նույն բազելյան սկզբունքներն են, նույն կորպորատիվ կռավարման սկզբունքները եւ այլն:
Բայց երբ պարոն Ջավադյանը խոսում է բանկերի 9 տոկոսանոց շահութաբերությունից, չմոռանանք, որ դա միջինացված ցուցանիշ է: Այսինքն` կան բանկեր, որոնց շահույթներն էականորեն ավելի բարձր մակարդակի են, որը միջինացվում է մի քանի բանկերի "անհասկանալի" ցածր եկամտաբերության հաշվին: Այնպես որ, հազիվ թե Հայաստանում գտնես որեւէ բանկիր, ով կհամաձայներ այդ գործը փոխել հայաստանյան ցանկացած այլ բիզնեսի հետ:

ԻԼՈՆԱ ԱԶԱՐՅԱՆ