ԿՈՄԻՏԱՍ ՎԱՐԴԱՊԵՏ. "ՍՏԵՓԱՆ ԴԱՆԻԵԼՅԱՆԻՆ ԵՐԲԵՔ ՉԵՄ ՏԵՍԵԼ, ՉԵՄ ՃԱՆԱՉՈՒՄ"

ԿՈՄԻՏԱՍ ՎԱՐԴԱՊԵՏ.
"ՍՏԵՓԱՆ ԴԱՆԻԵԼՅԱՆԻՆ
ԵՐԲԵՔ ՉԵՄ ՏԵՍԵԼ, ՉԵՄ ՃԱՆԱՉՈՒՄ"

Հայաստանի հայորդաց տների ընդհանուր տեսուչ-տնօրեն Կոմիտաս վարդապետ Հովնանյանն "Իրավունքի" հետ զրույցում անդրադառնալով վերջին օրերին իր անվան շուրջ հյուսված աղմուկին, ասաց, որ ինքը հերքել է, թե եղել է ԱԱԾ-ում:
Հիշեցնենք` լրատվամիջոցներից մեկը տարածել էր տեղեկատվություն այն մասին, որ "Համագործակցություն հանուն ժողովրդավարության" կենտրոնի նախագահ Ստեփան Դանիելյանի դիմումի համաձայն` Կոմիտաս վարդապետն ԱԱԾ-ում հարցաքննվել է` իր որոշ հայտարարությունների համար:
"Ինձ ԱԱԾ ոչ ոք չի կանչել, ԱԱԾ-ի ներկայացուցիչն է եկել մեր գրասենյակ եւ տեղեկացրել Ստեփան Դանիելյանի` առ անձս ուղղյալ մեղադրանքները: Իբր թե ես հերյուրանքներ եմ տարածում, ենթադրելով, որ աղանդավորական շարժումները հակապետական գործունեություն են ծավալում, կես միլիարդ դոլար օգնություն են ստանում դրսից",- ասաց հոգեւորականը:
Անդրադառնալով աղանդներին կես միլիարդ դոլարով ֆինանսավորելուն` Կոմիտաս վարդապետ Հովնանյանը հիշեցնում է. իր հայտարարությունից բավական առաջ կես միլիարդ դոլար ֆինանսավորման մասին խոսել է "Քայքայիչ պաշտամունքներից տուժածների օգնության եւ վերականգնողական կենտրոնի" տնօրեն Ալեքսանդր Ամարյանը, եւ, չգիտես ինչու, Ստեփան Դանիելյանը աղմուկ ու խնդիր չի բարձրացրել այդ հայտարարության վերաբերյալ.
"Եթե Ամարյանի հայտարարությունը մնում է անարձագանք, նշանակում է հայտարարությունն ունեցել է հիմք, որը ես երկրորդել եմ":
- Հայր Կոմիտաս, ըստ Ձեզ, ինչո՞ւ է "Համագործակցություն հանուն ժողովրդավարության" կենտրոնի նախագահ Ստեփան Դանիելյանը հենց ձեր հայտարարությունների հիման վրա դիմել ԱԱԾ, եթե, ինչպես Դուք եք ասում, Ձեզանից առաջ աղանդների ֆինանսավորման մասին հայտարարել էր Ալեքսանդր Ամարյանը:
- Ես Ստեփան Դանիելյանին երբեք չեմ տեսել, չեմ ճանաչում, խոսելու առիթ էլ չեմ ունեցել: Երբ եկա մեր գրասենյակ ու իմացա այն մասին, բացբերան մնացի, քանի որ առաջին անգամ էի լսում այդ մարդու անուն-ազգանունը: Բայց ես փառք եմ տալիս Աստծուն, որ մենք չենք ապրում 1938-ին, այլապես հիմա ես ձեզ հետ էսպես հանգիստ չէի կարող խոսել: Ես հիմա կլինեի Սիբիրի խուլ անկյուններից մեկում:
- Դուք ԱԱԾ-ի որոշմանը ծանո՞թ եք:
- Այո, ես ծանոթացել եմ ԱԱԾ-ի որոշմանը: Քանի որ Ստեփան Դանիելյանն առաջարկում էր ինձ 226-րդ հոդվածով դատի տալ, որ ես իբր միջկրոնական թշնամանք եմ քարոզում: Նրանց (նկատի ոնի ԱԱԾ-ին-խմբ.) պատասխանը եղել էր այն, որ իմ ոչ մի ելույթի մեջ նման բան չկա: Ես հականե-հանվանե որեւե մեկին չեմ նշել: Նույնիսկ նա օգտագործել է Լեւոն Բարդակչյանի պարագան, որը ինձ հետ առնչություն չունի, քանի որ իմ խոսքում Բարդակչյան անունը չեմ շեշտել: Դա Բարդակչյանի կազմակերպած թատրոնն էր, որի պատճառով, ցավոք, այս տարվա մայիսին իմ մեքենան ջարդուփշուր արեցին եւ մեջն էլ գրություն էին թողել` որտեղ քոնը կասես, էնտեղ էլ Բարդակչյանինը: Ինչ վերաբերում է հակասությանը, ես ոչ մի հայտարարություն չեմ արել: Ինձ տեղեկացրել են, որ Ստեփան Դանիելյանն իմ նկատմամբ այսպիսի բողոք է ներկայացրել:

ՍՈՆԱ ԴԱՎԹՅԱՆ