ՄԱՍՏԱՐԱ ԳՅՈՒՂԻ ԲՆԱԿԻՉԸ` ՀՈՐ ՍՊԱՆՈՒԹՅԱՆ ՄԱՍԻՆ«ՄԻԼԻՑԱՅՈՒԹՅՈՒՆՆ ԷԼ ԳԻՏԻ, ԴԱՏԱԽԱԶՈՒԹՅՈՒՆՆ ԷԼ, ԵՐԵՎԻ, ԲԱՅ

ՄԱՍՏԱՐԱ ԳՅՈՒՂԻ ԲՆԱԿԻՉԸ` ՀՈՐ ՍՊԱՆՈՒԹՅԱՆ ՄԱՍԻՆ.«ՄԻԼԻՑԱՅՈՒԹՅՈՒՆՆ ԷԼ ԳԻՏԻ, ԴԱՏԱԽԱԶՈՒԹՅՈՒՆՆ ԷԼ, ԵՐԵՎԻ, ԲԱՅՑ...»

Ընթերցողներից շատերը կհիշեն, որ ապրիլի 22-ին Արագածոտնի մարզի  Մաստարա գյուղում «Ֆորդ» մակնիշի մեքենայի վարորդը վրաերթի էր ենթարկել Մաստարա գյուղի բնակիչ Ռազմիկ Գեւորգյանի ոչխարների հոտը: Գյուղացին կորցրել էր մոտավորապես  25-30 ոչխար: Ոչխարների հոտին վրաերթի ենթարկելու փաստի  առնչությամբ  հարուցվել  է քրեական գործ: Քրեական գործի հարուցումից  անցել է մոտ յոթ ամիս, սակայն, ինչպես «Իրավունքի»  հետ զրույցում ասաց  Մաստարա գյուղի բնակիչ Ռազմիկ Գեւորգյանը, դեռեւս բացահայտված չէ  վարորդի ինքնությունը: «Ոչ մի բան էլ չասացին: Ոստիկաններն էս երկիրը դարձրին իրենց երկիրը»,- ասաց  պրն Գեւորգյանը:

Ի դեպ, այդ նույն վայրում մոտ երկու տարի առաջ ծեծելով սպանել էին Ռազմիկ Գեւորգյանի հորը: Գյուղացին հայտարարել էր, որ անելու են ամեն ինչ` իրենց հոր սպանողին գտնելու համար:

Հիշեցնենք` ոստիկանությունը Ռազմիկ Գեւորգյանի հոր սպանության փաստով հարուցված քրեական գործը կասեցրել էր քրեական դատավարության օրենսգրքի 31-րդ հոդվածի 1-ին մասի 1-ին կետի հիմքով, մասնավորապես՝ քրեական գործով վարույթը, դատախազի, քննիչի կամ դատարանի որոշմամբ, ամբողջությամբ կամ համապատասխան մասով, կարող է կասեցվել, եթե հայտնի չէ անձը, որը գործով պետք է ներգրավվի որպես մեղադրյալ: 

Սակայն  հոր սպանողին գտնելու ուղղությամբ Գեւորգյանների ընտանիքը ոչ մի արդյունքի չի հասել. «Ոչ մի բանի դեռ չենք հասել, շատ տեղեր գնացել ենք: Եթե իրենք չգիտեն, մեզ բան չեն ասում (նկատի ունի ոստիկանությանը-խմբ.)…  միլիցայությունն էլ գիտի, երեւի դատախազությունն էլ, բայց  պահում են էդ մարդուն… Երեւի իրենց մարդն է: Իրենք ամեն ինչ  էլ գիտեն»:

Մաստարա գյուղի գյուղապետ  Սարգիս Ավետիսյանն էլ մեզ հետ զրույցում ասաց,  աշխատանքներ տարվում են   «Ֆորդ» մակնիշի մեքենայի վարորդին  գտնելու ուղղությամբ. «Ռազմիկենք պետք  է զբաղվեն, բայց գիտեմ, որ էդ վարորդին  դեռ չեն գտել»

Գյուղապետը հիշեցնում է այդ օրն անտանելի մառախուղ էր,  կամրջի բացակայության պատճառով ոչխարները  չթույլատրվող տեղով են անցել, չնայած ամբողջ գյուղի անասուններն են էդ տեղով անցնում: Վարորդն էլ, հավանաբար, չի նկատել  ու վրաերթի է ենթարկել ոչխարների հոտը:

Սարգիս Ավետիսյանի խոսքով`ցանկալի կլիներ, որ բացահատվեր  «Ֆորդ» մակնիշի մեքենայի վարորդը: Ի վերջո, իրենց համագյուղացին մեծ կորուստներ է գրել:

Սոնա Դավթյան