2015 ԹՎԱԿԱՆԻ ՊԵՏԱԿԱՆ ԲՅՈՒՋԵԻ ՆԱԽԱԳԾՈՎ ԱՌՈՂՋԱՊԱՀՈՒԹՅԱՆ ՈԼՈՐՏԻՆ ՀԱՏԿԱՑՎԵԼ Է 83 ՄԼՐԴ 468 ՄԼՆ ԴՐԱՄ

2015 ԹՎԱԿԱՆԻ ՊԵՏԱԿԱՆ ԲՅՈՒՋԵԻ ՆԱԽԱԳԾՈՎ ԱՌՈՂՋԱՊԱՀՈՒԹՅԱՆ ՈԼՈՐՏԻՆ ՀԱՏԿԱՑՎԵԼ Է 83 ՄԼՐԴ 468 ՄԼՆ ԴՐԱՄ

Այսօր ՀՀ Աժ առողջապահության, մայրության եւ մանկության ու ֆինանսավարկային եւ բյուջետային հարցերի մշտական հանձնաժողովների համատեղ նիստում ԱՐԱ ԲԱԲԼՈՅԱՆԻ ու հանձնաժողովի նախագահի տեղակալ ԱՐԾՎԻԿ ՄԻՆԱՍՅԱՆԻ նախագահությամբ քննարկվեց «ՀՀ 2015 թվականի պետական բյուջեի մասին» ՀՀ օրենքի նախագծով առողջապահության ոլորտին հատկացվելիք ֆինանսական միջոցները, ըստ որի 2015 թվականի պետական բյուջեի նախագծով առողջապահության ոլորտին հատկացվել է 83 մլրդ 468 մլն դրամ: Աճը ընթացիկ տարվա համեմատ՝ կազմել է 3,3 տոկոս: Այս մասին նշեց ֆինանսների փոխնախարար ՊԱՎԵԼ ՍԱՖԱՐՅԱՆԸ եւ հավելեց նաեւ, որ 2015 թ.-ի ընթացիկ ծախսերն ավելացել են 8 մլրդ 525 մլն դրամով:

Իսկ ՀՀ առողջապահության նախարար ԱՐՄԵՆ ՄՈՒՐԱԴՅԱՆՆ էլ տեղեկացրեց, որ 2015թ.-ին ծրագրված է ՀՀ առողջապահության նախարարության հատկացումների 83 տոկոսը կամ 67 մլրդ դրամն ուղղել հիվանդանոցային եւ արտահիվանդանոցային ծառայությունների մատուցմանը: Այդ նպատակով նախատեսված է հատկացնել 29 մլրդ դրամ, որով կֆինանսավորվեն 14 ծրագրեր:

Ի դեպ, հանձնաժողովի նիստի ժամանակ ՀՀ առողջապահության նախարարն ասաց, որ Համաշխարհային բանկի աջակցությամբ կկառուցվեն «Ուռուցքաբանության գերազանցության հայկական նոր կենտրոնի» ճառագայթային նոր մասնաշենքը եւ Մեղրու հիվանդանոցը, կվերակառուցվեն Յոլյանի անվան արյունաբանական կենտրոնը, Կապանի, Բերդի, Ճամբարակի բժշկական կենտրոնները, որոնք կհագեցվեն ժամանակակից նոր սարքավորումներով:

ՀՐԱՆՏ ՍԱՐԱՖՅԱՆ