ԹՈՒՐՔԱԳԵՏ. «ՀՐԱՆՏ ԴԻՆՔԻ ՍՊԱՆՈՒԹՅԱՆԸ ԱՂՄԿԱՀԱՐՈՒՅՑ ԱՅԼ ՍՊԱՆՈՒԹՅՈՒՆՆԵՐ ԷԻՆ ՀԵՏԵՎԵԼՈՒ»

ԹՈՒՐՔԱԳԵՏ. «ՀՐԱՆՏ ԴԻՆՔԻ ՍՊԱՆՈՒԹՅԱՆԸ  ԱՂՄԿԱՀԱՐՈՒՅՑ ԱՅԼ ՍՊԱՆՈՒԹՅՈՒՆՆԵՐ ԷԻՆ ՀԵՏԵՎԵԼՈՒ»

Թուրքագետ, ԵՊՀ արևելագիտության ֆակուլտետի փոխդեկան, Ռուբեն  Մելքոնյանն «Իրավունքի» հետ զրույցում  անդրադարձավ  Ստամբուլի ծանր հանցագործությունների գործերով 5-րդ դատարանի այն որոշմանը,  ըստ որի` Հրանտ Դինքի սպանության գործով 18 մեղադրյալների նկատմամբ նոր դատավարություն է սկսվելու:  Թուրքագետի խոսքով` Դինքի  սպանության փաստով հարուցված քրեական գործն այդպես էլ անավարտ մնաց, քանի որ այդ գործի շրջանակներում ընդգրկված բազմաթիվ նախկին պաշտոնյաներ, բարձրաստիճան զինվորականներ չէին ներգրավվել   նախաքննության շրջանակներում,  իրական կազմակերպիչները եւս չբացահայտվեցին:

Ըստ  ԵՊՀ արևելագիտության ֆակուլտետի փոխդեկանի`թուրքական իշխանություններին ու Թուրքիայի նախագահ Էրդողանին Հրանտ Դինքի սպանության բացահայտումը  կարեւոր է,քանի որ ըստ ձեռք բերված տեղեկությունների` Դինքի սպանությանը հետեւելու էին մի շարք աղմկահարույց սպանություններ, ապա նաեւ իշխանափոխություն` էրդողանի ռեժիմի տապալում:  «Թուրքական իշխանությունները ցանկանում  են  գտնել Դինքի սպանության իրական կազմակերպիչներին, վարկաբեկել նախկին իշխանություններին, հեռացնել նրանց քաղաքական ասպարեզից գոնե միառժամանակ, որոնք ցանկանում են ամեն գնով տապալել Էրդողանի իշխանությունը» ,- ասաց  Մելքոնյանը:

Թուրքագետի խոսքով` Էրդողանի իշխանությունը փորձում են տապալել Թուրքիայում արդեն  տասնամյակներ գործող «խորքային պետություն» կոչվածը, որի ձեռքին է երկար ժամանակ եղել իրական իշխանությունը: ««Խորքային պետության» մեջ մտնում են  քեմալականները,  բարձրաստիճան  շատ զինվորականներ, ազգայնամոլներ, ինչպես նաեւ զանազան ահաբեկչական կազմակերպություններ,  թմրաբիզնեսով զբաղվողներ:  Էրդողանի իշխանության գալուց հետո սրվեցին հարաբերությունները նրա եւ խորքային պետության միջեւ»,- եզրափակեց  Ռուբեն Մելքոնյանը:

Սոնա Դավթյան