ՊԱՏԱՆԻ ՇԱԽՄԱՏԻՍՏՆԵՐԸ` ԱՎԱԳ ՍԵՐՆԴԻ ՀԵՏՔԵՐՈՎ

ՊԱՏԱՆԻ ՇԱԽՄԱՏԻՍՏՆԵՐԸ`
ԱՎԱԳ ՍԵՐՆԴԻ ՀԵՏՔԵՐՈՎ

"Շախմատացված" Հայաստան ունենալու համար ձեռնարկվում են մի շարք քայլեր, որոնք կնպաստեն, որ մարզաձեւն ավելի մասսայական դառնա, նպաստի շախմատի տարածմանն ու զարգացմանը: Եթե ավագ սերունդը վաղուց ապացուցել է իր որակներն այս մարզաձեւում, եւ կասկած չկա, որ Հայաստանի շախմատի հավաքականը առաջատարներից է ողջ աշխարհում, երիտասարդներն ու պատանիները եւս գնում են ավագ սերնդի հետքերով:
Հայ պատանի շախմատիստներն այս անգամ հաջող ելույթներ են ունեցել Եվրոպայի առաջնությունում, լուրջ հայտ ներկայացնելով մրցակիցներին: Այսպիսովª Վրաստանի Բաթումում ավարտված Եվրոպայի Մ-8, Մ-10, Մ-12, Մ-14, Մ-16, Մ-18 պատանիների եւ աղջիկների առաջնություններում Հայաստանը ներկայացված էր 63 շախմատիստներով: Մ-10 տարեկանների առաջնությունում Մամիկոն Ղարիբյանը վաստակել է 7.5 միավոր եւ զբաղեցրել առաջին տեղը: Մ-14 տարեկանների առաջնությունում Արամ Հակոբյանը 9 հնարավորից վաստակել է 7.5 միավոր եւ դարձել է երկրորդը: Մ-10 տարեկանների կանանց առաջնությունում Մարիամ Մկրտչյանը 7 միավորով զբաղեցրել է երկրորդ տեղը:
Իսկ ահա ավագ սերնդի լավագույն ներկայացուցիչներից մեկը` գրոսմայստեր Կարեն Մովսիսյանը, ով շարունակում է ելույթները Հունաստանի Կատերինի քաղաքում անցկացվող աշխարհի վետերանների առաջնությունում, հինգ տուրից հետո վաստակել է 3,5 միավոր: Նա մեկ միավորով է զիջում առաջատարին` անգլիացի գրոսմայստեր Ջոն Նանին: Գրոսմայստեր Գրիգոր-Սեւակ Մխիթարյանը Բրազիլիայի Պրայա դա Պիպա քաղաքում ավարտված Ամերիկա աշխարհամասի առաջնությունում 11 հնարավորից վաստակել է 8 միավոր եւ 194 մասնակիցների մեջ գրավել 8-րդ տեղը: Սեւակը միայն կես միավոր զիջեց հաղթողին` գրոսմայստեր Խուլիո Գրանդա Զունիգային: Իսկ գրոսմայստերներ Հրանտ Մելքումյանը եւ Ռոբերտ Հովհաննիսյանը Գերմանիայի Բադ Վիզե քաղաքում անցկացվող մրցաշարում չորս տուրից հետո վաստակել են 3,5-ական միավոր: Նրանք կես քայլով հետ են մնում 10 շախմատիստներից:

ՔՐԻՍՏԻՆԵ ՊԵՏՐՈՍՅԱՆ