ՀԵԼՈՈՒԻՆԸ ՏՈՆԵԼԸ ՕՏԱՐԱՄՈԼՈՒԹՅՈ՞ՒՆ է, ԹԵ "ԺԱՄԱՆԱԿԱԿԻՑ" ԵՐԵՎԱԼՈՒ ՁԳՏՈՒՄ

ՀԵԼՈՈՒԻՆԸ ՏՈՆԵԼԸ ՕՏԱՐԱՄՈԼՈՒԹՅՈ՞ՒՆ է, ԹԵ "ԺԱՄԱՆԱԿԱԿԻՑ" ԵՐԵՎԱԼՈՒ ՁԳՏՈՒՄ

Հին հայկական տոները բազմաթիվ են եւ բազմազան: Դրանց մի մասը ժամանակի ընթացքում մոռացվել է, իսկ մի մասը` շնորհիվ ազգասերների, պահպանվել եւ փոխանցվել սերնդեսերունդ: Այդպիսի գեղեցիկ տոների շնորհիվ է, որ ընդգծվում է հայկական մշակույթի յուրօրինակությունը: Եկեղեցական եւ ժողովրդական տոները ոչ միայն հայի կենցաղի, այլեւ  ինքնության եւ պատմության անբաժան մասնիկն են: Չնայած այս ամենին,  այսօր "ժամանակակից" ձեւացող շատ հայեր փնովում են այդ տոները եւ անտեսում դրանց կարեւորությունը, փոխարենը շատ լավ յուրացնում եւ նշում են օտար տոները: Այդպիսի տոներից մեկն էլ Հելոուինի տոնն է, որը առնչություն չունի հայկական ոչ մի տոնի հետ: Արդեն որոշ հայ երիտասարդներ սկսել են նախապատրաստվել տոնին` ընտրելով իրենց համար կերպարներ, որոնք որքան սարսափելի լինեն, այնքան հաճելի կլինի իրենց համար: Նկատելի է, որ հայկական տոների նկատմամբ չկա այս ոգեւորությունը, ինչպես Հելոուինին նախապատրաստվելիս: Ասենք Բարեկենդանի տոնին այնպիսի անտարբերություն է լինում, կարծես թե այն օտար տոն է: Մնում է հասկանալ, ավանդական տոները անտեսելով եւ օտարները նշելով` մարդիկ ցանկանում են իրենց օտարամոլությո՞ւնը ցույց տալ, թե "ժամանակակից" երեւալ: Հրատապ այս խնդրի շուրջ "Իրավունքը" զրուցեց ազգագրագետի եւ հոգեւորականի հետ:

"ՀԵԼՈՈՒԻՆԻ ՏՈՆԸ ՆՇՈՒՄ ԵՆ ՈՐՈՇ ԵՐԻՏԱՍԱՐԴՆԵՐ, ՈՎՔԵՐ
ՈՒՆԵՆ ԱՆՈՐՈՇ ՆԿԱՐԱԳԻՐ"

Օձունի եւ հարակից գյուղերի հոգեւոր հովիվ տեր ՎՐԹԱՆԵՍ քահանա ԲԱՂԱԼՅԱՆ- Հելոուինի տոնը նշում են որոշ երիտասարդներ, ովքեր ունեն անորոշ նկարագիր, վարք ու բարք, նաեւ, ցավոք սրտի, ազգային հոգեւոր մշակութային արժեքների պակաս: Նրանք դեռ չեն գտել այն կարեւոր արժեքները, որոնք ունի մեր Հայ Առաքելական սուրբ եկեղեցին: Այսպիսի երիտասարդները չեն ապրում մեր պետական տոներով, ընդօրինակում են օտարի սովորույթները եւ ապահովում դրանց զարգացումը: Շատ անգամ այդ երիտասարդներն իրենց "ժամանակակից" են համարում, սակայն դառնում են ժամանակավրեպ, որովհետեւ մեր եկեղեցին հաղթահարել է վաղ շրջանի սխալ հավատալիքների փուլը: Չհասկանալով, որ Առաքելական եկեղեցին ավելին ունի` ե՛ւ ժամանակակիցը ե՛ւ ազատը, ուստի մարդու ազատությունը այնտեղ է, որտեղ Աստծու կամքն է: Չունենալով իրական ազատություն եւ ազատությունը հասկանալով որպես սանձարձակություն, նրանք նշում են տարբեր օտար տոներ, որոնց արժեքը շատ ժամանակ չեն էլ հասկանում: Ես մտածում եմ, որ նրանցից շատերը նույնիսկ այդ արժեքների կրողները չեն: Տարբեր օտար կառույցներ փորձում են իրենց տոները փաթաթել ուրիշների վզին, որի արդյունքում էլ շատ օտարամոլներ, որպես ստրկամտության դրսեւորում տոնում են Հելոուինը: Այդ տոնը ժամանակավոր է, ժամանակ առ ժամանակ այսպիսի հովերով մարդիկ գալիս ու գնում են: Դրանք ժամանակի ընթացքում դուրս կմղվեն, քանի որ ժամանակին նշում էին Վալենտինի տոնը, որն այսօր կարծես թե դուրս մղվեց մեր տոների շարքերից:

"ՀԵԼՈՈՒԻՆԸ ՈՉ ՀԱՅԿԱԿԱՆ ՏՈՆ Է"

Ազգագրագետ ԿԱՐԻՆԵ ԲԱԶԵՅԱՆ - Հելոուինը ոչ հայկական տոն է, այն ներմուծվել է դրսից: Իսկ մերոնք, չգիտես ինչու, դարձրել են հայկական ու ամեն տարի նշում են:

Ներկայացրեց ԶՎԱՐԹ ԽԱՉԱՏՐՅԱՆԸ