"ԿՐԿՆԱԿԻ ԴԺՎԱՐ Է ԴՐՍԻ ԱՇԽԱՐՀԻՑ ՔՈ ԵՐԿՐԻ ՀԱՄԱՐ ՄԻ ԼԱՎ ԲԱՆ ԲԵՐԵԼԸ"

"ԿՐԿՆԱԿԻ ԴԺՎԱՐ Է ԴՐՍԻ ԱՇԽԱՐՀԻՑ
ՔՈ ԵՐԿՐԻ ՀԱՄԱՐ ՄԻ ԼԱՎ ԲԱՆ ԲԵՐԵԼԸ"

Հոկտեմբերի 18-22-ը Լեհաստանի Վրոցլավ քաղաքում կայացած "Վրոստյա" 49-րդ մոնոներկայացումների միջազգային թատերական փառատոնին ՀՀ վաստակավոր արտիստ, Գ. Սունդուկյանի անվան ազգային ակադեմիական թատրոնի դերասան Մուրադ Ջանիբեկյանը ներկայացել է, ըստ Միշել դե Գելդերոդեի, "Խոստովանություն" մոնոներկայացմամբ եւ օրերս Հայաստան վերադարձել Գրան Պրիով: Ի դեպ, այն տվյալ ներկայացման 3-րդ մրցանակն է: Իսկ մինչ այդ, ՀՀ մշակույթի նախարարության աջակցությամբ, հոկտեմբերի 14-18-ը Մ. Ջանիբեկյանն ու Հ. Ղափլանյանի անվան դրամատիկական թատրոնի դերասան Արա Գեւորգյանը մասնակցել են Լիտվայում կայացած "ATSPINDIS" միջազգային թատերական 9-րդ փառատոնին: Մ. Ջանիբեկյանը ցուցադրել է ըստ Միշել դե Գելդերոդեի "Խոստովանություն", իսկ Ա. Գեւորգյանը` Ա. Չեխովի "Ծխախոտի վնասի մասին" մոնոներկայացումները:
Երեկ "Ազդակ" լրագրողական ակումբում հյուրընկալված դերասանները,  "Արմմոնո" միջազգային թատերական փառատոնի տնօրեն ՄԱՐԻԱՆՆԱ ՄԽԻԹԱՐՅԱՆՆ ու ՀՀ մշակույթի նախարարության աշխատակազմի ժամանակակից արվեստի վարչության պետի տեղակալ ԱՐԱՄ ԳՅՈՒՐՋՅԱՆԸ խոսելով 2 փառատոնի եւ դերասանների փայլուն հաջողության մասին` հավաստիացնում էին, որ գնահատված լինելը, կապ չունի քո երկրում, թե երկրի սահմաններից դուրս, հաճելի է դերասանի համար:

""ԱՐՄՄՈՆՈՆ" ՄԵՐ ԵՐԿՐՈՒՄ ՆՊԱՍՏԵՑ ՄՈՆՈՆԵՐԿԱՅԱՑՈՒՄՆԵՐԻ ՈԼՈՐՏԻ ԱՇԽՈՒԺԱՑՄԱՆԸ"

Ըստ Ա. Գյուրջյանի. "ՀՀ մշակույթի նախարարության ուշադրության կենտրոնում են բոլոր այն նախագծերը, որոնք իրենց բնույթով նպաստում են միջմշակութային երկխոսության ձեւավորմանը` ՀՀ-ում եւ նրա սահմաններից դուրս մեր եւ օտարերկրյա ստեղծագործողների ու կոլեկտիվների միջեւ: Այս առումով առանձնահատուկ է մեր համագործակցությունը "Արմմոնո" մոնոներկայացումների փառատոնի հետ, որովհետեւ շատ ներկայացումներ այս ընթացքում փառատոնից հետո ունեցան իրենց կյանքը` ներկայացվեցին ե՛ւ Հայաստանի տարբեր բեմերում, ե՛ւ օտարերկրյա թատերասեր հասարակությանը: Այս առումով, "Արմմոնոն" մեր երկրում նպաստեց մոնոներկայացումների ոլորտի աշխուժացմանը, նաեւ այլ երկրներում մեր թատերական կյանքի տեսանելիությանը: Այս գրանցած հաջողությունը հենց այն կապիտալն է, որի պտուղը այսօր տեսնում ենք",- ասաց Ա. Գյուրջյանն ու կանխելով լրագրողների այն հարցը, թե այսօր որքանո՞վ է հայ թատրոնը համահունչ, ներդաշնակ աշխարհում ընդունված թատերարվեստի զարգացման միտումներին` հավելեց. "Այս հաջողությունը, կարծում եմ, հարցի փայլուն պատասխանն է: Ոչ միայն համահունչ է, ներդաշնակ, այլ նաեւ գնահատվել է որպես լավագույնը":

"ԴԺՎԱՐ ԲԱՆ Է ԴՐՍԻ ԱՇԽԱՐՀԻ ՀԵՏ ՈՏՔ ՄԵԿՆԵԼԸ"

Կիսվելով միջազգային մրցույթից ստացած տպավորություններով` ՄՈՒՐԱԴ ՋԱՆԻԲԵԿՅԱՆԸ շնորհակալություն հայտնեց ՀՀ մշակույթի նախարարությանն  ու անձամբ նախարարին` իրեն երեք մրցանակի արժանացրած ներկայացման բեմադրությանը սատար կանգնելու եւ փառատոնային ճանապարհածախսը հոգալու համար, ապա շեշտեց. "Դժվար բան է դրսի աշխարհի հետ ոտք մեկնելը, երբ լեզուն էլ անծանոթ է, կարծես խուլ ու համր լինես: Կրկնակի դժվար է դրսի աշխարհից քո երկրի համար մի լավ բան բերելը: Գեղեցիկ է, երբ տեսնում են եւ գնահատում, որովհետեւ գեղեցիկը տեսնողը նաեւ ներկա է դրա արարամանը: Ցավալի է, երբ չեն տեսնում կամ չեն ուզում տեսնել այն: Ինչեւէ, շնորհակալ եմ Մ. Մխիթարյանին, քանի որ այս ամենի առաջին "մեղքն" իրենն է: Երկար տարիներ` տասնյակ տարի, ես գործ չեմ արել, չնայած` պարապ չեմ մնացել, 2 գեղարվեստական ֆիլմ եմ արել, բայց այսօր երեւի էլի բախտը ժպտաց, եւ ինձ հնարավորություն տրվեց անել այս ներկայացումը":

"ՄԻԱՆԳԱՄԻՑ ԵՐԵՔ ԵՐԿՐԻՑ ՀՐԱՎԵՐ ՍՏԱՑԱ"

Մ. Մխիթարյանի դիտարկմամբ` փառատոները դերասան Ա. Գեւորգյանի համար դեբյուտ էին, քանի որ առաջին անգամ էր մասնակցում` իր բեմադրած մոնոներկայացմամբ: Լրացնելով Մարիաննային` ԱՐԱ ԳԵՎՈՐԳՅԱՆԸ շեշտեց. "Իմիջիայլոց, շատ դժվար է, երբ բեմադրում ես ու խաղում: Այս տարի մասնակցեցի "Արմմոնո" փառատոնին ու պիտի ասեմ, որ այն չի զիջում աշխարհի նմանատիպ միջազգային փառատոներին: Դրանից հետո մեծ արձագանք եղավ, միանգամից երեք երկրից հրավեր ստացա: Այս ներկայացումը մի հետաքրքիր բան ունի իր մեջ. ամեն անգամ խաղալիս` այն ինձ ստիպում է, որ նոր բաներ անեմ ու նորովի մատուցեմ, կարելի է ասել` ամեն անգամ այն դեբյուտ է դառնում": Ասուլիսի ընթացքում Մ. Մխիթարյանը վստահեցրեց, որ Ա. Գեւորգյանի հրավերների մասին կխոսեն մեկ ամիս անց, երբ ամեն ինչ հստակ կլինի: Ապա նաեւ շեշտեց. "Իմ գործառույթն է հնարավորություն տալ բոլորին աշխատել ստեղծել, բացել ինքդ քեզ: Մեր դաշտը շատ լայն է, մենք փայլուն երիտասարդություն ունենք, ինչն ապացուցվեց այս տարվա "Արմմոնոյի" շրջանակներում` փայլուն դերակատարմամբ մոնոներկայացումներով":

"ԵՐԲ ԱՐՎԵՍՏԸ ՎԵՐԱԾՎՈՒՄ Է ՍՊՈՐՏԻ` ԵՍ ԴԵՄ ԵՄ"

"Իրավունքի" այն դիտարկմանը, թե հաճախ ասում են, որ թատրոնը սպորտ չէ, ուստի` մրցանակներ էլ հարկավոր չեն, դերասանները չհամաձայնեցին. "Մի անգամ մեծ վարպետ Փափազյանին հարցրին, անընդհատ ասում են` Փափազյան, Փափազյան... Բա մե՞նք ինչի համար ենք, ասաց. "Դուն անոր համար ես, մանչս, որպեսզի քեզի տեսնեն եւ իմանան` ես ով եմ": Իհարկե, պետք է տարբերություն լինի: Արտիստը երեխայի պես բան է, նրան ոգեւորություն է պետք: Հատկապես դրսի գնահատականը մեծ բան է",- ասաց Մ. Ջանիբեկյանը: Իսկ Ա. Գեւորգյանի համար. "Երբ արվեստը վերածվում է սպորտի, ես մի քիչ դրան դեմ եմ, ճիշտ է` նմանություն կա, բայց երբ արվեստը մրցակցության մեջ է մտնում, բաներ կան որ կորում են: Իհարկե պետք են մրցանակները, այն ոգեւորություն է ներշնչում դերասանին, որպեսզի կատարի հաջորդ ստեղծագործությունը":

ԼԻԼԻԹ ԵՂԻԱԶԱՐՅԱՆ