"ՈՉ ՄԻ ՄԱՏԱԿԱՐԱՐԻ ՈՉ ՄԻ ԴՐԱՄ "ՄՈՍԿՎԻՉԿԱ" ԲԻԶՆԵՍ-ԼԻԴԵՐԸ ՊԱՐՏՔ ՉԻ ՄՆԱ"

"ՈՉ ՄԻ ՄԱՏԱԿԱՐԱՐԻ ՈՉ ՄԻ ԴՐԱՄ
"ՄՈՍԿՎԻՉԿԱ" ԲԻԶՆԵՍ-ԼԻԴԵՐԸ ՊԱՐՏՔ ՉԻ ՄՆԱ"

Վերջերս արհեստականորեն մեծ աղմուկ բարձրացավ Երեւանի նախկին ոստիկանապետ Ներսիկ Նազարյանի որդուն` հայտնի երիտասարդ գործարար Արմեն Նազարյանին պատկանող "Մոսկվիչկա" սուպերմարկետի շուրջ: Ըստ հանրության, ինչպես նաեւ մամուլում շրջանառվող լուրերի` սուպերմարկետը գտնվում է ֆինանսական ճգնաժամի մեջ, ընդհուպ վերջին օրերին խոսակցություններ տարածվեցին, որ կազմակերպությունը գնում է դեպի լուծարման: Վերոնշյալ խոսակցությունների վերաբերյալ առավել ստույգ մանրամասներ փորձեցինք պարզել սուպերմարկետի սեփականատեր եւ հիմնադիր ԱՐՄԵՆ ՆԱԶԱՐՅԱՆԻՑ, ով անդրադառնալով տարածված լուրերին` ասաց.
-Ոչ ոք չի թաքցնում, որ կազմակերպությունում իրոք կա ֆինանսական խնդիր, սակայն նման խնդրի առաջ կարող է կանգնել ցանկացած կազմակերպություն: "Մոսկվիչկա" սուպերմարկետում առաջացած ֆինանսական խնդիրների պատճառները տարբեր են, օրինակ մեկն այն, որ ունեցել ենք խանութ, որի վատ աշխատելու արդյունքում առաջացել է դեֆիցիտ, դրան նպաստել է նաեւ մոտ երկու ամիս Հյուսիսային պողոտայում իրականացվող շինարարությունը` փողոցը փակ էր եւ խանութի առեւտուրն էլ թուլացել էր, ունեցել ենք բանկերի հետ կապված մեծ վարկային բեռ, որը նպաստել է դեֆիցիտին, ինչը եւ հանգեցրել է մատակարարների հանդեպ պարտավորվածության:
"Մոսկվիչկայի" հիմնադիրը խոսելով մատակարարների հանդեպ պարտավորվածությունների մասին` նշեց. "Շատ մեծ չեն, չեմ ուզում կոնկրետ թվեր ֆիքսել, բայց այսօր, փառք Աստծո, բանկերի հետ երկար եւ արդյունավետ աշխատանքների շնորհիվ, բանկերը եկան մեզ ընդառաջ եւ մեկ տարով կանգնեցրին մեր բոլոր վճարելիք վարկային թե տոկոսները եւ թե մայր գումարները: Դա մեզ թույլ է տալիս առողջացնել կազմակերպությունը եւ վճարել բոլոր մատակարարների գումարները: Ներկա պահին մենք հանդիպում ենք բոլոր մատակարարների հետ եւ ձեռք բերում պայմանավորվածություններ, որը թույլ կտա նոյեմբերի մեկից սուպերմարկետները հագեցնել ապրանքատեսականերով եւ մատակարարների մոտ վերականգնել մեր վստահությունը: Այնպես որ, չեն համապատասխանում իրականությանը խոսակցություններն այն մասին, որ կազմակերպությունը գնում է լուծարման, նման բան չկա ու չի էլ լինի: Ես վստահեցնում եմ Ձեզ, որ սուպերմարկետը մինչեւ Նոր տարի կգա իդելական վիճակի, ոչ մի մատակարարի ոչ մի դրամ "Մոսկվիչկա" բիզնես-լիդերը պարտք չի մնա":
Պարոն Նազարյանը կտրականապես հերքեց նաեւ լուրերն այն մասին, որ սուպերմարկետներում աշխատակիցների մասսայական կրճատումներ են ընթանում. "Ցանկացած ճգնաժամային կառավարման ժամանակ լինում են կրճատումներ, բայց մենք, հավատացեք, փորձում ենք շատ քիչ կրճատումներ անել: Ես Ձեզ ավելին ասեմ, բիզնեսը կարգավորելուց հետո աշխատակիցները կվերականգնվեն իրենց աշխատատեղերում, քանի որ ինքս դեմ եմ աշխատող կրճատելուն":

ԻԼՈՆԱ ԱԶԱՐՅԱՆ