"ՀԵՂԱՓՈԽՈՒԹՅԱՆ ՎԱԽԸ ՏԱՐԱԾԵԼՈՒ ՓՈԽԱՐԵՆ` ԵՐԿԻՐԸ ՊԵՏՔ Է ԶԱՐԳԱՑՆԵԼ"

"ՀԵՂԱՓՈԽՈՒԹՅԱՆ ՎԱԽԸ ՏԱՐԱԾԵԼՈՒ ՓՈԽԱՐԵՆ`
ԵՐԿԻՐԸ ՊԵՏՔ Է ԶԱՐԳԱՑՆԵԼ"

Վերջին տարիներին, թե քանի անգամ է Հայաստանում հնչել "հեղափոխություն" բառը, դժվար է ասել: Գարնանը նախանշված հեղափոխությունը տեղափոխվում է ամառ, ամառից աշուն, հետոª ձմեռ, գարուն: Եվ այդպես` տարին տարվա վրա: Ճիշտ էª Ուկրաինայի քարուքանդ դառնալուց հետո հասարակությունը սկսեց մեծ զգուշությամբ, շատերն էլª անթաքույց վախով վերաբերվել "հեղափոխություն" բառին, բայց մեկ է, այսօր էլ նման խոստումների պակաս չկա: Ուրեմն` ի՞նչ սպասենք հերթական "հեղափոխականներից": Հայաստանի քաղաքագետները եւ վերլուծաբանները կարծում են, որ հայը երբեք այդ ճանապարհով չի լուծի երկրում առկա խնդիրները:
Քաղաքագետ ԼԵՎՈՆ ՇԻՐԻՆՅԱՆ.
- Մինչեւ Խորհրդային Միության փլուզումը, փառաբանվում էր հեղափոխությունը, իսկ  այսօր ամբողջ հասարակությունը դարձել է հակահեղափոխական: Ես կասեմ հետեւյալը` գործը չպետք է հասցնել հեղափոխության, պրովոկացիան գործին շատ քիչ կօգնի: Պետք է մտածել ոչ թե հեղափոխությունների, այլ երկիրը արդիականացնելու մասին, որի կարիքն ունենք: Այսօրվա քաղաքական, ռազմական, մտավորական էլիտան պարտավոր է Հայաստանի փակուղի մտած զարգացման ճանապարհը բացել, ինչը նշանակում է նոր հայեցակարգերի մշակում եւ հասարակության աչքին վարկաբեկված քաղաքական գործիչներին թոշակի ուղարկելը: Հեղափոխության վախը տարածելու փոխարեն` երկիրը պետք է զարգացնել: Բայց եթե հանկարծ հնարավոր լինի հեղափոխություն կատարել, ապա այն իր հոսքի մեջ կառնի ու կկործանի բոլորին: Հեղափոխության չհասնելու համար անհրաժեշտ է առկա խնդիրները լուծել`մաս առ մաս:
Սոցիոլոգ ԱՀԱՐՈՆ ԱԴԻԲԵԿՅԱՆԸ մեկնաբանեց.
- Հեղափոխություն անելու համար մարդկանց տրամադրությունը բավականին բացասական է: Պարզվում է, որ տասից միայն մեկն է ուժի կիրառման կողմնակից, երկուսը կողմ են հարցերի խաղաղ լուծմանը, իսկ մնացած յոթը թամաշա անողներ են. այսինքն` նրանք ոչ մի գործողության չեն դիմի, միայն կնայեն, թե մարդիկ ինչ են անում: Հեղափոխություն անել հնարավոր չէ, մարդիկ կարող են մի քիչ խառնաշփոթ ստեղծել եւ վերջ: Նրանք ցանկանում են սոցիալական դժգոհության ալիք ստեղծել, սակայն աջակիցներ չունենալու արդյունքում` այդ ալիքը հանդարտվում է: Հեղափոխություն անելու համար կարեւոր է մարդկանց թվաքանակը, քանի որ չկա այդ թվաքանակը, ապա չի կարող լինել նաեւ հեղափոխություն:
"Հայկազունք" խմբի հիմնադիր եւ ղեկավար ԳՈՒՍԱՆ ՀԱՅԿԱԶՈՒՆ.
- Մարդը, երբ հայտնվում է ճահճում, փորձում է այնտեղից մի կերպ դուրս պրծնել, թե փրկվելուց հետո նրան ինչ է սպասվում, սա արդեն անհայտ է: Այսօր ժողովրդի վիճակը այդքան էլ բարվոք չէ, եւ ոմանք կարծում են, որ հեղափոխություն անելով` կարող է իրենց վիճակը լավանալ: Ես դեմ չեմ հեղափոխություններին, բայց միայն մի դեպքում, եթե հեղափոխությունը լինի խաղաղ պայմաններում եւ չխլի մարդկային կյանքեր: Հայ ժողովուրդը ունի կամային մեծ հատկանիշներ եւ կաշխատի առանց հեղափոխոթյունների  անընդհատ ծաղկեցնել իր երկիրը:


Z-PR սոցհարցման կենտրոնը Երեւան քաղաքում 100 հոգու շրջանում կատարել է հարցում`պարզելու համար` արդյո՞ք Հայաստանում պատրաստ են կատարել հեղափոխություն, թե ոչ:
1. Ո՛չ, հատկապես ուկրաինական հեղափոխությունը տեսնելով- 65%:
2. Հեղափոխությունը վատ բան է, բայց երկրի վիճակը պարտադրում է նաեւ իշխանություններինª գնալ արմատական քայլերի- 17%:
3. Այո, պետք է միայն հեղափոխություն- 12%:
4. Դժվարանում ենք պատասխանել- 4%:

ԶՎԱՐԹ ԽԱՉԱՏՐՅԱՆ