«ՄԱՅԴԱՆԻ ՄԱՍԻՆ ԽՈՍՈՒՄ ԷԻՆ ՆՐԱՆՔ, ՈՎՔԵՐ ՈՒԶՈՒՄ ԷԻՆ, ՈՐ ԱՅՆ ԼԻՆԻ»

«ՄԱՅԴԱՆԻ ՄԱՍԻՆ ԽՈՍՈՒՄ ԷԻՆ ՆՐԱՆՔ, ՈՎՔԵՐ ՈՒԶՈՒՄ ԷԻՆ, ՈՐ ԱՅՆ ԼԻՆԻ»

Երեկ կայացավ ՀՀ Ազգային ժողովի եւ ՌԴ Դաշնային ժողովի միջեւ համագործակցության միջխորհրդարանական հանձնաժողովի 25-րդ նիստը, ինչի առթիվ Հայաստան էին ժամանել ՌԴ խորհրդի անդամ, Հայ-ռուսական միջխորհրդարանական համագործակցության հանձնաժողովի համանախագահ Նիկոլայ Ռիժկովը, ՌԴ-ում ՀՀ արտակարգ եւ լիազոր դեսպան Օլեգ Եսայանը, ինչպես նաեւ մի շարք ռուս պատգամավորներ եւ փոխնախարարներ: Հանձնաժողովի նիստից հետո «Իրավունքը» առիթ ունեցավ զրուցել ՀՀ-ում ՌԴ արտակարգ եւ լիազոր դեսպան ԻՎԱՆ ՎՈԼԻՆԿԻՆԻ հետ:
-Պարոն դեսպան, մինչեւ հոկտեմբերի 10-ը` ՀՀ Մաքսային միության անդամակցման ստորագրումը, որոշ քաղաքական գործիչներ եւ վերլուծաբաններ կանխատեսում էին, թե Հայաստանում մայդան կլինի: Ըստ Ձեզ, մենք այսօր շրջանցեցի՞նք նման իրավիճակում հայտնվելու վտանգը:

- Նախեւառաջ կարեւոր է, որ ոչ բոլորն էին խոսում այդ մասին, այլ մայդանի մասին խոսում էին նրանք, ովքեր ուզում էին, որ այն լինի: Մինչդեռ ես համարում եմ, որ դա Հայաստանում անհնար է:
- Իսկ մինչ 2015 թվականի հունվարը, երբ Հայաստանը կդառնա ԵՏՄ անդամ, հնարավո՞ր է ինչ-որ ֆորսմաժորային իրավիճակ, ինչի պատճառով այս անդամակցումը չի կայանա:
- Համենայն դեպս, ես դրան չեմ հավատում: Հայաստանի միացումը Եվրասիական տնտեսական միությանը կայանում է եւ արդեն կայացած է, քանի որ փաստաթղթերը ստորագրված են: Մնացել են զուտ տեխնիկական խնդիրներ, որոնք լուծելի են:
- Այնուամենայնիվ, այս գործընթացի ճանապարհին, ըստ Ձեզ, հայ-ադրբեջանական սահմանին կլինի՞ նոր լարվածություն:
- Կլինեն դրանք, թե` ոչ, դա կախված չէ ՀՀ-ում Ռուսաստանի Դաշնության դեսպանից: Ինչ վերաբերում է Եվրասիական միությանը, սա սոսկ տնտեսական միություն է, եւ քաղաքական հարցերում պետք չէ դիտարկել այն:

ՀՐԱՆՏ ՍԱՐԱՖՅԱՆ