ԻՆՉ ԱԶԴԵՑՈՒԹՅՈՒՆ ԿՈՒՆԵՆԱ ՌՈՒԲԼՈՒ ԱՐԺԵԶՐԿՈՒՄԸ ՀԱՅԱՍՏԱՆԻ ՏՆՏԵՍՈՒԹՅԱՆ ՎՐԱ

ԻՆՉ ԱԶԴԵՑՈՒԹՅՈՒՆ ԿՈՒՆԵՆԱ ՌՈՒԲԼՈՒ ԱՐԺԵԶՐԿՈՒՄԸ ՀԱՅԱՍՏԱՆԻ ՏՆՏԵՍՈՒԹՅԱՆ ՎՐԱ

Ռուբլու արժեզրկման ընթացքը արդեն դուրս է գալիս վերահսկողությունից: Վերջին ամիսներին մոտ 30 տոկոսով այն արժեզրկվել է: Թե ինչպիսի ազդեցություն կունենա այն ՀՀ տնտեսության վրա, պարզեց «Իրավունքը» Հայաստանի գործատուների հանրապետական միության նախագահ Գագիկ Մակարյանից: «2015-ի ՌԴ-ի բյուջեում մեկ դոլարի արժեքը ֆիքսվել է 37 ռուբլի, այսինքն իրենք արդեն գիտեն, որ գալիք տարում այս տարվա մակարդակը (մեկ դոլարը 42 ռուբլի) չի լինի»,- ասաց Մակարյանը:
Ռուբլու արժեզրկումը, ըստ Մակարյանի, առաջին հերթին վատ կանդրադառնա Ռուսաստանի տնտեսության վրա. նվազել են անշարժ գույքի գները: Արտահանողների համար թեւ ձեռնտու կլինի արժեզրկումը, քանի որ դոլարի դիմաց ավելի շատ ռուբլի կստանան, բայց որովհետեւ ռուբլու գնողանությունը ընկնում է, այս երեւույթը տնտեսական առումով բացասական կլինի: «Սրանից նաեւ կտուժեն այնտեղ աշխատող հայ միգրանտները, քանի որ իրենց վաստակած գումարները ռուբլիով են, ռուբլին ՀՀ դրամի նկատմամբ իր կուրսը կփոփոխի եւ արդեն փոխել է»,- կարծում էՀայաստանի գործատուների հանրապետական միության նախագահը:

Ռուբլու արժեզրկումը, ըստ Մակարյանի, բացասաբար կանդրադառնա նաեւ բանկային համակարգի վրա: Որոշ բանկեր ՌԴ-ում չի բացառվում միավորվեն կամ փակվեն: Այսօր բիզնես գործունեություն ծավալողներն ծառայությունների ու ապրանքների գները ստիպված չեն բարձրացնում, որպեսզի հասարակական դժգոհություն կամ խուճապ չառաջանա: «Բայց երկար այդպես շարունակել չեն կարող, իսկ դա կնշանակի կատարել աշխատուժի կրճատում կամ գոնե խուսափել միգրանտներին աշխատանքի ընդունելուց: Բացի այդ` ՌԴ-ից վալյուտային մեծ արտահոսք է լինելու դեպի այլ երկրներ»,- ասաց մեր զրուցակիցը:

ՀՀ կառավարությունը մասնավորապես էկոնոմիկայի նախարարությունը պետք է այս փաստը հաջորդ տարվա բյուջեի նախագծում հաշվի առնեին: «Հիշում եք 2008-ի ճգնաժամի մասին ինչ էր ասում նախկին կառավարությունը: Ասում էին մերկողքով անցավ, իսկ 3 ամիս անց պարզվեց մենք լավ տուժել էինք»,- հիշեցրեց Մակարյանը:

Սոնա Դավթյան