ՄՀԵՐ ՇԱՀԳԵԼԴՅԱՆ. ««ԵՌՅԱԿՈՒՄ» ՏԱՐԲԵՐ ՏԵՍԱԿԵՏՆԵՐ ԿԱՆ ԵՏՄ-Ի ՀԵՏ ԿԱՊՎԱԾ»

Արխիվ 12-16 31 Հոկտեմբեր, 2014 9:15

Հոկտեմբերի երեքին ՕԵԿ պատգամավոր Հովհաննես Մարգարյանը թեւ հայտարարել էր, որ ՕԵԿ-ականներն ազատ են հոկտեմբերի 24-ի «եռյակի» հանրահավաքին մասնակցելու, սակայն կարծես թե ոչ մի ՕԵԿ-ական այդ ազատությունից չի օգտվել: ՕԵԿ խմբակցության քարտուղար Մհեր Շահգելդյանն «Իրավունքի» հետ զրույցում ասաց, որ չի մասնակցել «եռյակի» հանրահավաքին, բայց ստացել է նորմալ տպավորություն:

-Պրն Շահգելդյան, ՕԵԿ-ը համամի՞տ է «եռյակի» այն հայտարարությանը, որ անհրաժեշտ են արտահերթ խորհրդարանական ընտրություններ:

-Մենք չենք բացառում արտահերթ խորհրդարանական ընտրությունների հնարավորությունը: Քաղաքական զարգացումներն ամեն ինչ ցույց կտան:

-Հնարավո՞ր է համագործակցեք «եռյակի» հետ այս կետի շուրջ:

-Խնդիրը հետեւյալն է: Մենք որ ասում ենք, թե չենք բացառում, նկատի ունենք քաղաքական զարգացումների տեսանկյունից: Ժամկետներից առաջ չանցնենք: Ինչ վերաբերում է «եռյակի» հետ համագործակցությանը, ապա կա համագործակցություն տարբեր ուղղություններով եւ ոչ միայն «եռյակի» հետ:

-«Եռյակի» ուժերը հանրահավաքում իշխանափոխության մասին էին խոսում: Կա՞ն իշխանափոխության նախադրյալներ:

-Այդ հարցով դիմեք իրենց:

-Բայց իշխանափոխություն կլինի՞, թե՞ ոչ:

-Իշխանափոխություն ցանկացած դեպքում տեղի է ունենում: Դրանք լինում են ընտրությունների ընթացքում, մինչեւ հերթական ընտրություններ…

-Մինչեւ հերթական ընտրություններ կլինի՞…

-Ներողություն: Մենք կարծում ենք, որ քաղաքական համակարգի բարեփոխումների ու փոփոխություն կա նաեւ քաղաքական համակարգի զարգացման համար:

-Հոկտեմբերի 24-ի հանրահավաքին, ըստ էության, իշխանության հետ բանակցելու ու երկխոսելու ակնարկ արվեց: Իշխանություն-«եռյակ» երկխոսությունը հավանական համարո՞ւմ եք:

-Ես նման գնահատականներ չեմ տալիս, այսինքն` կողմ չեմ նման գնահատականի: «Եռյակում» հավաքված են երեք քաղաքական ուժեր իրենց մոտեցումներով ու տեսլականով:

-Համամի՞տ եք իրենց մոտեցումներին:

-Շատ ընդհանրական հարցեր եք տալիս: Այո, բազմաթիվ հարցերում մեր տեսակետները համընկնում են:

-Իսկ ո՞ր հարցում չի համընկնում:

-Ձեր հարցը բավական լայն է: Դե, օրինակ, իրենք հանրահավաք են անում, մենք չենք մասնակցել հանրահավաքին…

-Չնայած, որ ՕԵԿ-ականներն ազատ են եղել հանրահավաքին մասնակցել-չմասնակցել…

-Այո,մեզ մոտ ազատ է: Մենք էլ ենք արել հանրահավաք…

-Իրենք չեն եկել…

-Ուզում եք փոխկապվածություն գտնել, բայց… մենք էլ անում հանրահավաք, իրենք էլ անում: Եթե պարզ խոսենք, նույն «եռյակում» կան տարբեր տեսակետներ եվրասիական տնտեսական միության հետ կապված:

Սոնա Դավթյան