ԱԶԳԱՅԻՆ ՓՈՔՐԱՄԱՍՆՈՒԹՅՈՒՆՆԵՐԻ ՄՇԱԿՈՒԹԱՅԻՆ ԻՐԱՎՈՒՆՔՆԵՐԻ ԻՐԱԳՈՐԾՈՒՄ

ԱԶԳԱՅԻՆ ՓՈՔՐԱՄԱՍՆՈՒԹՅՈՒՆՆԵՐԻ ՄՇԱԿՈՒԹԱՅԻՆ ԻՐԱՎՈՒՆՔՆԵՐԻ ԻՐԱԳՈՐԾՈՒՄ

Օրերս Մեծամորի մշակույթի տանը տեղի ունեցավ «Հավասար հնարավորություններ ազգային փոքրամասնությունների և խոցելի խմբերի մշակութային իրավունքների իրագործման համար. հարստություն բազմազանության միջոցով» ծրագրի արդյունքների ամփոփումը:

Ներկաներին իսկական մշակութային բազմազանության տոն պարգևեցին Մեծամոր քաղաքի «Արևածաղիկներ» և «Գարուն ա» երգի համույթները:

Հայաստանում ԵՄ պատվիրակության ներկայացուցիչ ՔՐԻՍՏԻ ՌԱՅԴՄԱՆ շնորհակալություն հայտնեց երեխաներին՝  ներկաներին այդքան դրական էմոցիաներ պարգևելու համար. «Ես ուրախ եմ լինել այստեղ: Եվրոպան հպարտանում է իր մշակութային բազմազանությամբ: Արևելյան գործընկերության մշակութային ծրագիրը իրականացվում է Արևելյան գործընկերության 6 երկրում և նպատակ ունի աջակցելու այս երկրներում մշակութային համագործակցությանն ու շփմանը: Այդ համագործակցության ողջ հմայքն այսօր երևաց այս երեխաների շնորհիվ»,- ասաց նա:

Ծրագիրն իրականացվել է Հայաստանի 10 համայնքներում՝ հաշվի առնելով այդ համայնքներում ազգային փոքրամասանությունների թիվը: Քաղաքացիական զարգացման և համագործակցության հիմնադրամի տնօրեն ԱՐՄԵՆ ՂԱԼՈՒՄՅԱՆԸ նշեց, որ ծրագիրն իսկապես դրական ազդեցություն է ունեցել համայնքների մշակութային կյանքում: «Մեծամորում վերազինվել է մշակույթի պալատը: Մենք փոքր դրամաշնորհներ ենք տրամադրել տեղի երկու հասարակական կազմակերպություններին՝ «Հույսի Մեծամոր»-ին և «Ընտանիք և համայնք»-ին, որոնք աշխատել են երեխաների հետ ու սերմանել են նրանց մեջ սիրել ու հարգել իրենց հարևանների մշակույթը, իրենց կողքին ապրող ազգային փոքրամասնությունների՝ եզդիների, մոլոկանների, ուկրաինացիների, ռուսների, հույների մշակույթը»,- նշեց հիմնադրամի տնօրենը:

Միջոցառմանը ներկա էր նաև Արմավիր թեմի թեմակալ առաջնորդ ՏԵՐ ՍԻՈՆ ԵՊԻՍԿՈՊՈՍ ԱԴԱՄՅԱՆԸ:

Ծրագրի նպատակն էր ապահովել մշակութային բազմազանությունը և աջակցել ազգային փոքրամասնությունների մշակույթի պահպանմանը` հզորացնելով Հայաստանում և Ուկրաինայում տեղական ինքնակառավարման մարմինների, քաղաքացիական հասարակության կազմակերպությունների և մշակութային կառույցների ղեկավարների կարողությունները:

Ծրագրի  իրականացման ընթացքում Հայաստանում և Ուկրաինայում ընտրվել են 20 թիրախ համայնքներ, ձևավորվել են համայնքային ակտիվ խմբեր, իրականացվել են կարողությունների զարգացման դասընթացներ և նախագծվել են մշակութային զարգացման ծրագրեր:

Ծրագրի շրջանակներում հայտարարվել էր դրամաշնորհային մրցույթ Հայաստանի և Կիևի շրջանի համայնքներում ծրագրերի իրագործման նպատակով: Դրամաշնորհային մրցույթի նպատակն էր աջակցել Հայաստանի և Կիևի շրջանի համայնքներում տեղական ոչ առևտրային կազմակերպությունների նախաձեռնություններին մշակույթի ոլորտում: Դրամաշնորհային ծրագրերը ֆինանսավորվել են նվազագույնը 500 000 և առավելագույնը 2 500 000 ՀՀ դրամով:

ԷԹԵՐԻ ՄԱՄՈՒԼՅԱՆ