ՀԱԿՈԲՅԱՆՆԵՐԻ ՓԱՍՏԱԲԱՆԸ` ՎԱՐԴԱՆ ՊԵՏՐՈՍՅԱՆԻՆ. «ԴԱ ԶՂՋԱԼՈՒ ԻՄԻՏԱՑԻԱ ԷՐ»

ՀԱԿՈԲՅԱՆՆԵՐԻ ՓԱՍՏԱԲԱՆԸ` ՎԱՐԴԱՆ ՊԵՏՐՈՍՅԱՆԻՆ. «ԴԱ ԶՂՋԱԼՈՒ ԻՄԻՏԱՑԻԱ ԷՐ»

Օրեր առաջ`հոկտեմբերի 29-ին, «Իրավունքի» հրապարակած հոդվածում Վարդան Պետրոսյանի գործով տուժող Հակոբյանների  ընտանիքի փաստաբան Ռուբեն Բալոյանն անդրադարձել էր «Ժառանգություն» կուսակցության առաջնորդ Րաֆֆի Հովհաննիսյանի  հայտարարությանը:

Հիշեցնենք` «Ժառանգության» առաջնորդը Վարդան Պետրոսյանին քաղբանտարկյալ էր համարել, որը Ռուբեն Բալոյանը համարել էր աբսուրդ:

Հոդվածում նաեւ գրել էինք, որ  Հակոբյանների  ընտանիքի փաստաբանին ուղղել ենք գործին առնչվող այլ  հարցեր եւս, որոնք հաջորդիվ կներկայացնենք:

Այսօր հրապարակում ենք Ռուբեն Բալոյանի հետ մեր զրույցի շարունակությունը, որը վերաբերում է  Վարդան Պետրոսյանի  գործին առնչվող անհետացած ընթերակային: «Ընթերականներից մեկը  ճիշտ տվյալ չի հայտնել մասնակցելով դեպքի վայրի զննությանը: Անձնական տվյալներից ինչ-որ մի բան ճիշտ չի հայտնել, բայց դա չի նշանակում, որ դեպքի վայրի զննությունը կատարվել է մեկ ընթերակայի ներկայությամբ: Դատարանում դրա վերաբերյալ մի շարք անձինք եւ երկու ընթերակայից մեկը ցուցմունքներ տվեցին: Երկու ընթերականներից մեկն ասաց, որ անգամ նկարագրեց անհետացած ընթերակայի մոտավոր տարիքը եւ այլն: Այն, որ երկու  ընթերակա  է մասնակցել դեպքի վայրի զննությանը, հիմնավորվեց մի շարք անձանց`փորձագետի, դեպքի վայրի զննությանը  մասնակցած պետավտոտեսչության երկու աշխատակիցների  ցուցմունքներով: Եվ տրանսպորտային միջոցների եւ դեպքի վայրի զննության արձանագրությունների միջեւ դրված է նույն անձի ստորագրությունը եւ ազգանունը»,- պարզաբանեց  Բալոյանը:

Փաստաբանը վստահ է` Վարդան Պետրոսյանը չէր կալանավորվի միայն այն դեպքում, եթե նա կատարվածի համար զղջար, ոչ թե զղջալու իմիտացիա ստեղծեր. «Սկզբնական շրջանում ասում էին, որ Վարդան Պետրոսյանը զղջում է իր արարքի համար, իրեն մեղավոր է  համարում: Բայց բոլորդ էլ համոզվեցիք չէ՞, որ այդ ամենը ձեւական է արվում, հանդիպումներն են ձեւական: Ինքն ասում էր, որ պատրաստ է իր տասը տարին նստել: Դա  գրած սցենար էր»:

Ի դեպ, փաստաբանը առանց անուններ տալու դժգոհեց որոշ լրատվամիջոցներից, որոնք իր պատասխանները օգտագործում են ի շահ Վարդան Պետրոսյանի: «Այդ լրագրողները պատժվելու են»,- եզրափակեց Ռուբեն Բալոյանը:

Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը,  որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել` Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։

Սոնա Դավթյան