"ԵԹԵ ԱԺ-Ն ՉՎԱՎԵՐԱՑՆԻ ԵՏՄ-Ն` ԴԱ ԿՆՇԱՆԱԿԻ ԴԱՎԱՃԱՆՈՒԹՅՈՒՆ ՀԱՅ ԺՈՂՈՎՐԴԻ ՆԿԱՏՄԱՄԲ"

"ԵԹԵ ԱԺ-Ն ՉՎԱՎԵՐԱՑՆԻ ԵՏՄ-Ն`
ԴԱ ԿՆՇԱՆԱԿԻ ԴԱՎԱՃԱՆՈՒԹՅՈՒՆ ՀԱՅ ԺՈՂՈՎՐԴԻ ՆԿԱՏՄԱՄԲ"

"Եվրասիական տնտեսության մեջ Հայաստանի ինտեգրումը դրական երեւույթ էր Հայաստանի անկախ պատմության մեջ: Մենք դեռեւս անցյալ տարվա սեպտեմբեր ամսվանից, երբ ՀՀ նախագահը ազդարարեց այդ մասին, ՀԿԿ-ն ողջունեց այն".- "Իրավունքի" հետ զրույցում ասաց ՀԿԿ առաջին քարտուղար ՏԱՃԱՏ ՍԱՐԳՍՅԱՆԸ: Այնուհետ, թե արդյոք "եռյակի" հոկտեմբերի 10-ի հանրահավաքի օրը պատահական էր ընտրված` հայ կոմունիստների ղեկավարը պատասխանեց.
-Ես նույնպես սկզբում այդպես էի կարծում, որ կխանգարեն կամ բացասական երանգ տան դրան: Բայց երբ լսեցի "եռյակի" ղեկավարների ելույթները` այդ օրը նման կարծիք չստացա: Ավելին, ես նույնիսկ զարմացա, երբ Լեւոն Տեր-Պետրոսյանը դրական արձագանքեց ԵՏՄ-ի անդամակցությանը, բացառությամբ Րաֆֆի Հովհաննիսյանի: Միգուցե, նրանք սպասելիքներ ունեն, որ դա կարող է ինքնաբուխ ստացվել, բայց համենայնդեպս բացասական երանգ չլսեցի:
- Արդեն տեղի ունեցավ երկրորդ հանրահավաքը, ի՞նչ էական տարբերություն կար երկրորդ հանրահավաքի ժամանակ:
- Պետք է ասեմ, որ առանձնապես շեշտված տարբերություններ չնկատվեցին: Ես լսել եմ, թե՛ առաջին եւ թե՛ երկրորդ հանրահավաքի ելույթները եւ կարող եմ ասել, որ ամսի 24-ի միտինգի ժամանակ ինչ-որ ծրագիր առաջարկվեց "Բարգավաճ Հայաստան" կուսակցության ղեկավարի կողմից` առաջիկա անելիքների մասին:
- Իսկ ըստ Ձեզ, ի՞նչ ծրագիր էր առաջարկում ԲՀԿ առաջնորդը:
- Դե բնական է, որ նրա ծրագիրը վերաբերում էր սոցիալ-տնտեսական հարցերին, այդ ուղղվածությունն էր, եւ, ինչքան հասկացա, նա նաեւ խոսում էր իշխանափոխության մասին:
- Բայց չէ՞ որ պարոն Ծառուկյանը խոսում էր "եթե"-ներով:
- Դե, դրա համար էլ ասում եմ, որ իրենց ելույթներում հստակ շեշտադրումներ չկային եւ առաջ քաշված հարցերն էլ, այո, ճիշտ եք ասում, "եթե"-ներով էին: Միգուցե, հաջորդ հանրահավաքին կփոխե՞ն իրենց խոսքի շեշտադրումները` չգիտեմ, համենայնդեպս առանձնապես տպավորություն չստացա այդ հանրահավաքներից:
- Նոյեմբերի 17-18-ին արդեն ԵՏՄ-ի անդամակցության հարցը կբերվի խորհրդարան, որպեսզի այն վավերացվի: Հնարավո՞ր է` տեղի ունենա ֆորսմաժորային տարբերակ, եւ խոչընդոտվի վավերացման հարցը:
- Ես այդ կարծիքին չեմ: Նախ` Ազգային ժողովում Հանրապետականը մեծամասնություն է կազմում, եւ, որքան հասկացա, ԵՏՄ-ի անդամակցության հարցը բացասական երանգ չունի նաեւ ԲՀԿ-ի եւ, ինչու չէ, նաեւ ՀՅԴ-ի կողմից: Եթե անգամ փորձեն խոչընդոտել, ապա պետք է միանշանակ ասել, որ ժողովրդի մեծամասնության կարծիքն այդ մասին դրական է: Եթե ԱԺ-ում փորձեն չվավերացնել` դա կնշանակի դավաճանություն հայ ժողովրդի նկատմամբ:
- Ֆրանսիայում տեղի ունեցավ Սարգսյան-Ալիեւ հանդիպումը: Ի՞նչ տպավորություն, փոփոխություններ կարելի է սպասել:
- Հանդիպումները շատ են, բայց կոնկրետությունից դուրս: Սրա միակ լավ բանն այն է, որ այսքան տարիների ընթացքում համեմատաբար պահպանվում է խաղաղ վիճակը, այլապես նորություն չկար այդ հանդիպման ընթացքում:

ԱՐՄԵՆՈՒՀԻ ՀԱԿՈԲՅԱՆ