ԽՈՐԱԳՐՈՎ ԳԵՂԱՆԿԱՐՉԱԿԱՆ ՓԱՌԱՏՈՆ ԿՈՏԱՅՔԻ ՄԱՐԶՈՒՄ

<<ՎԵՐԱԾՆՈՒՆԴ>> ԽՈՐԱԳՐՈՎ ԳԵՂԱՆԿԱՐՉԱԿԱՆ ՓԱՌԱՏՈՆ

ԿՈՏԱՅՔԻ ՄԱՐԶՈՒՄ

ՀՀ Կոտայքի մարզպետ Արամ Հարությունյանն Աբովյանում մասնակցել է <<Հայկական ներկապնակ>> միջազգային գեղանկարչության ծրագրի շրջանակներում տեղի ունեցած <<Վերածնունդ>> գեղանկարչական փառատոնի բացման արարողությանը:
Հայոց Մեծ Եղեռնի 100-րդ տարելիցին նվիրված փառատոնը կազմակերպվել է Կոտայքի մարզպետարանի, <<Փյունիկ>> բարեգործական հիմնադրամի, <<Լոռվա ձոր>> հասարակական կազմակերպության ու <<Աբովյանի հայ և ռուս ժողովուրդների բարեկամության թանգարան>> ՊՈԱԿ-ի համատեղ նախաձեռնությամբ:
Կոտայքի մարզպետ Ա. Հարությունյանը նախ շրջել է փառատոնին մասնակցող նկարիչների համար Աբովյանի հայ և ռուս ժողովուրդների բարեկամության թանգարանում նախատեսված ստեղծագործական տաղավարներում, զրուցել արվեստագետների հետ և ծանոթացել կատարվող աշխատանքներին:
Այնուհետև գեղանկարչական այս փառատոնի բացման արարողության կապակցությամբ մարզի արվեստասեր հասարակությանը ողջունել և շնորհավորել է Կոտայքի մարզպետ Ա. Հարությունյանը` կարևորելով նմանատիպ միջոցառումների ու նախաձեռնությունների իրականացաումը Կոտայքի մարզում:
Մշակութային այս միջոցառման ընթացքում շնորահավորանքի խոսքերով են հանդես եկել նաև <<Լոռվա ձոր>> հասարակական կազմակերպության նախագահ Ս. Երիցյանը և <<Աբովյանի հայ և ռուս ժողովուրդների բարեկամության թանգարան>> ՊՈԱԿ-ի տնօրեն Գ. Ավետիսյանը:
<<Վերածնունդ>> խորագիրը կրող այս փառատոնի մեկնարկային օրվա կապակցությամբ կազմակերպված տոնական միջոցառման ընթացքում Աբովյանի հայ և ռուս ժողովուրդների բարեկամության թանգարանին որպես նվիրատվություն է հանձնվել Արա Շիրազի կերտած <<Հերոսիմա>> բրոնզե արձանը, որը մշակութային այս օջախին նվիրել է Շիրազի թոռնուհին:
Հավելենք, որ փառատոնին մասնակցելու են 14 նկարիչներ:
Գեղանկարիչների մի մասը ստեղծագործելու են Հայ և ռուս ժողովուրդների բարեկամության թանգարանի մեծ ցուցասրահում, իսկ նրանցից շատերն էլ 8 օր շարունակ շրջելու են Կոտայքի մարզի պատմամշակութային հուշարձան-կոթողներում` կտավին հանձնելով մարզային նշանավոր վայրերի վերաբերյալ իրենց ստեղծագործական ընկալումները: Այս գործընթացի արդյունքում ծնվելու են շուրջ 50 աշխատանքներ, որոնք ցուցադրվելու են ինչպես մարզում, այնպես էլ Հայաստանի նկարիչների միության դահլիճում կազմակերպվելիք ցուցահանդեսներում: