"ԽՈՀԱՆՈՑԱՅԻՆ ԱՅԴ ԽՈՍԱԿՑՈՒԹՅՈՒՆՆԵՐԸ, ԹԵ` ԼՈԽ ՎԱՏ Ա, ԵՎ ՄԵՂԱՎՈՐ ԵՆ ԻՇԽԱՆՈՒԹՅՈՒՆՆԵՐԸ, ԴԱ ԾՐԱԳՐԱՅԻՆ ԵԼՈՒՅԹ ՉԷ"

"ԽՈՀԱՆՈՑԱՅԻՆ ԱՅԴ ԽՈՍԱԿՑՈՒԹՅՈՒՆՆԵՐԸ,
ԹԵ` ԼՈԽ ՎԱՏ Ա, ԵՎ ՄԵՂԱՎՈՐ ԵՆ ԻՇԽԱՆՈՒԹՅՈՒՆՆԵՐԸ, ԴԱ ԾՐԱԳՐԱՅԻՆ ԵԼՈՒՅԹ ՉԷ"

Սոցիոլոգ ԱՀԱՐՈՆ ԱԴԻԲԵԿՅԱՆԸ "Իրավունքի" հետ զրույցում անդրադառնալով հոկտեմբերի 24-ին "եռյակի" հանրահավաքին` ասաց, որ ԲՀԿ առաջնորդի ելույթը պետք է քննադատական մաս պարունակեր: Մասնավորապես, նա պետք է ասեր` ինչ չի արել ներկայիս կառավարությունը: Եվ այն, ինչ չի արել, ինչպես պետք է աներ:
Ըստ Ադիբեկյանի` հնչեցին իշխանափոխության կոչեր, բայց նոր իշխանության գործելակերպի մասին ոչինչ չհնչեց: Պարզ չէ, թե այդտեղ հավաքված հանրությունն ուր է գնալու: "Երկիրը գտնվում է ծանրագույն վիճակում: Վերջին տարիներին Հայաստանի տնտեսությունը հասցվել է կաթվածահար վիճակի: ԲՀԿ ղեկավարի այս խոսքերն ուղղակի հայտարարություն են, ոչ թե վերլուծություն: Խոհանոցային այն խոսակցությունները, թե` լոխ վատ ա, եւ մեղավոր են իշխանությունները, դա ծրագրային ելույթ չէ",- ասաց պրն Ադիբեկյանը:
ԲՀԿ ղեկավարն իր ելույթում նաեւ հայտարարեց, որ իշխանությունը պետք է համաժողովրդական շարժման պահանջներն ի կատար ածի: Սրանով, փաստորեն, ԲՀԿ առաջնորդն ակնարկեց իշխանությունների հետ բանակցելու մասին: Արդյո՞ք իշխանությունը բանակցությունների կգնա: "ՀՀ նախագահը հայտարարեց, որ պատրաստ են համագործակցել այն ուժերի հետ, որոնք կօգնեն իրավիճակը բարելավելու: Այնպես որ, եթե "եռյակի" կողմից գործողությունների ծրագիր առաջարկվի, եւ դա կյանքի կոչվի, ՀՀԿ-ն ընդառաջ կգնա",- վերլուծում է Ադիբեկյանը:
Ինչ վերաբերում է համաժողովրդական շտաբներ ձեւավորելուն, սոցիոլոգը հիշեցնում է` 670 համայնքների ղեկավարները ՀՀԿ-ականներ են, միայն 150-ն է ընդդիմության ձեռքին, հետեւաբար "եռյակին" կհաջողվի ձեւավորել 150-200 շտաբ: "Այդ շտաբներ մարդիկ գալու են ինչ-որ բան խնդրելու, պատրա՞ստ է "եռյակն" այդ շտաբների միջոցով մարդկանց կենսական խնդիրները լուծել",- մտորում է Ադիբեկյանը:

ՍՈՆԱ ԴԱՎԹՅԱՆ