ՎԱՐԴԱՆ ՊԵՏՐՈՍՅԱՆԻՆ ՔԱՂԲԱՆՏԱՐԿՅԱԼ ՀԱՄԱՐԵԼՆ ԱԲՍՈՒՐԴ Է.ՀԱԿՈԲՅԱՆՆԵՐԻ ՓԱՍՏԱԲԱՆ

«ՎԱՐԴԱՆ ՊԵՏՐՈՍՅԱՆԻՆ ՔԱՂԲԱՆՏԱՐԿՅԱԼ ՀԱՄԱՐԵԼՆ

ԱԲՍՈՒՐԴ Է». ՀԱԿՈԲՅԱՆՆԵՐԻ ՓԱՍՏԱԲԱՆ

Հոկտեմբերի 24-ի «եռյակի» հանրահավաքի ժամանակ, ինչպես հայտնի է, «Ժառանգություն» կուսակցության առաջնորդ  Րաֆֆի Հովհաննիսյանը Վարդան Պետրոսյանին քաղբանտարկյալ համարեց: «Իրավունքն» այս հայտարարության վերաբերյալ արդեն ներկայացրել է Վարդան Պետրոսյանի փաստաբան Նիկոլայ Բաղդասարյանի արձագանքը:

Հիշեցնենք` հոկտեմբերի 20-ին խոշոր ավտովթար էր տեղի ունեցել Կոտայքի մարզում: Ժամը 21:20-ի սահմաններում Եղվարդ-Երեւան ավտոճանապարհի 32-րդ կմ հատվածում բախվել են BMW մակնիշի 04 ՍԼ 920 համարանիշի եւ «ՎԱԶ 2121» մակնիշի 870 ՕԼ 64 համարանիշի ավտոմեքենաները: Վթարի հետեւանքով 7 հոգի մարմնական վնասվածքներով տեղափոխվել են հիվանդանոցներ, նրանց մեջ էր նաեւ հայտնի դերասան Վարդան Պետրոսյանը: Նրա մոտ առկա էր ներքին արյունահոսություն, լյարդի եւ փայծաղի պատռվածք, փայծաղը հեռացրել են, իսկ լյարդի պատռվածքը կարել են, դերասանն արդեն դուրս է գրվել հիվանդանոցից: «Վազ 2121» մակնիշի մեքենայի ուղեւորներից հորեղբոր որդիներ Էդգար եւ Էդուարդ Հակոբյանները մահացել էին: Այժմ հիվանդանոցում գտնվում է բազմաթիվ կոտրվածքներ ստացած Տաթեւ Հակոբյանը: Վարդան Պետրոսյանին մեղադրանք է քրեական օրենսգրքի 242-րդ հոդվածի 3-րդ մասի հատկանիշներով:

«Իրավունքն» այսօր  Վարդան Պետրոսյանի գործով տուժող  Հակոբյանների ընտանիքի փաստաբան Ռուբեն Բալոյանից պարզեց`  համաձա՞յն է «Ժառանգության» առաջնորդ Րաֆֆի Հովհաննիսյանի գնահատականին: «Դա աբսուրդ է, որ Վարդան Պետրոսյանը քաղբանտարկյալ է: Վարդան Պետրոսյանն այսօր  բանտարկված չէ իր քաղաքական հայացքների համար: Վարդան Պետրոսյանը երկու երեխաների մահվան փաստի առթիվ հարուցված քրեական գործով է կալանավորված: Ի՞նչ քաղբանտարկյալի մասին  է խոսքը»,- ասաց  փաստաբանը:

Պրն Բալոյանի խոսքով` ինքն այս պահին «Ունի  մոտ  յոթ-ութ  քրեական գործ վթարների հետ կապված, եւ բոլոր վրաերթ  կատարողներն էլ ձերբակալված են»: «Ինչո՞վ է առավել Վարդան Պետրոսյանը մյուս վրաերթ կատարողներից, որ սիրված դերասա՞ն  է»,- ահա այս կերպ արձագանքեց Հակոբյանների փաստաբանը:

Գործին առնչվող այլ  հարցերի պարզաբանումները «Իրավունքը» կներկայացնի հաջորդիվ:

Սոնա Դավթյան