«ԵՐԵՎԱՆՈՒՄ ԿԱ ՄՈՏԱՎՈՐԱՊԵՍ 15-20.000 ԹԱՓԱՌՈՂ ՇՈՒՆ». ՔԱՂԱՔԱՊԵՏԱՐԱՆԻ ՆԵՐԿԱՅԱՑՈՒՑԻՉ

«ԵՐԵՎԱՆՈՒՄ ԿԱ ՄՈՏԱՎՈՐԱՊԵՍ 15-20.000 ԹԱՓԱՌՈՂ ՇՈՒՆ». ՔԱՂԱՔԱՊԵՏԱՐԱՆԻ ՆԵՐԿԱՅԱՑՈՒՑԻՉ

Ինչպես հայտնի է, այսօր քաղաքապետարանի մոտ  մի խումբ մտահոգ քաղաքացիներ  բողոքի ակցիա էին կազմակերպել` ընդդեմ մայրաքաղաքում շների սպանդի: Խնդրի առնչությամբ «Իրավունքը» զրուցեց  քաղաքապետարանի առեւտրի ու սպասարկման վարչության պետի տեղակալ Ալֆրեդ Հունանյանի հետ:

-Պրն Հունանյան, Իրավունքի հետ զրույցում  «Դինգո թիմ» ՀԿ-ի ներկայացուցիչ Ալինա Ենգոյանը հայտարարեց, որ մայրաքաղաքում թափառող շներին պետք է  ստերջացնել, ոչ թե վնասազերծել:

-Նախ ասեմ, որ ստերջացում չէ, այլ ստերիլիզացում կամ ամլացում:  Ես նրանց ասել եմ մի քանի անգամ, բայց չեն ուզում ուղղել: Մայրաքաղաքում թափառող շների մի մասին ստերիլիզացնում ենք, մի մասին քնեցնում, ինչպես ընդունված է ամբողջ աշխարհում: Ոչ մի երկրում թափառող շների  հարցը մինչեւ վերջ  չի լուծվել: Կան որոշ երկրներ, որոնք հաջողության են հասել թափառող շների դեմ պայքարում` Գերմանիան, Շվեյցարիան, Արեւմտյան եվրոպայի որոշ երկրներ:  Մոսկվայում երեք տարի շարունակ շներին ստերիլիզացնում ու բաց էին թողնում: Դա առաջացրեց բնակիչների բողոքը, քանի որ  տեղաշարժվել մայրաքաղաքում հնարավոր չէր: Շները կծում էին շատ-շատերին, հոշոտելու դեպքեր եղան անգամ: Դրանից հետո Մոսկվան հրաժարվեց այդ մեթոդից, քանի որ ծրագիրը ձախողվեց: Մեզ մոտ շների թիվը բավական պակասել է նախորդ տարիների համեմատ:

- Շների սպանդին դեմ եղողները հայտարարում են, որ Երեւանի թափառող կենդանիներին որսալու, ստերջացնելու ու վնասազերծելու համար «Յունիգրաֆ իքս» ընկերությանը  տրամադրվող  գումարներն անարդյունավետ են ծախսվում:

-Դա ճիշտ չէ: Նրանք ապատեղեկատվություն են տարածում բնակչության շրջանում ու դեմ դուրս գալիս բնակչությանը:

- Իսկ ինչո՞ւ է միշտ «Յունիգրաֆ իքս» ընկերությանը տրամադրվում  գումարներ  Երեւանի թափառող կենդանիներին որսալու, ստերջացնելու ու վնասազերծելու համար:

-Այս տարի  Երեւանի թափառող կենդանիներին որսալու, ստերջացնելու ու վնասազերծելու գործընթացում  ընդգրկվելու են նաեւ  այդ  բողոքող ՀԿ-ներից ներկայացուցիչներ:  Իսկ թե ինչու է միայն  «Յունիգրաֆ իքս» ընկերությանը տրամադրվում  գումարներ, որովհետեւ 2009 թ-ից սկսած միայն հայտ է ներկայացրել  «Յունիգրաֆ իքս» կազմակերպությունը: Ես ինքս եղել եմ հանձնաժողովի նախագահը:  «Փրկենք կենդանիներին» ՀԿ-ի ղեկավարին Նունե Մեհրաբյանին  ու «Դինգո թիմ» ՀԿ-ին ասել ենք՝ եկեք մասնակցենք մրցույթին, սակայն նրանք հայտ չեն ներկայացրել: Մրցույթից հետո բողոքել են մասնավորապես Նունե Մեհրաբյանը ասել է, որ ինքը հայտ ներկայացրել է, բայց  իր հայտը չեն ընդունել: Ո՞նց կարելի է  մարդկանց խաբել: Ես տեղեկություններ ունեմ, որ  Երեւանի թափառող կենդանիներին որսալու, ստերջացնելու ու վնասազերծելու համար տրվող գումարը հաջորդ տարի նվազելու է, քանի որ թափառող շների քանակը նվազել է:

- Մայրաքաղաքում քանի՞ թափառող շուն է հաշվառված:

-Ոչ մի անգամ  Երեւան քաղաքում շների հաշվառում չի կատարվել, քանի որ դա  բավական բարդ   գործընթաց է:

-Բայց «Դինգո թիմ» ՀԿ-ի ներկայացուցիչն ասում էր, որ  գրեթե ամեն տարի «Յունիգրաֆ իքս» ընկերությունը ներկայացնում է, թե ամեն տարի  մայրաքաղաքում կա 46.000 շուն...

-46.000 չէ: Տարբեր տարիներ տարբեր են եղել: Այո, 46.000 էլ է եղել, 47.000 էլ, բայց վերջին տարիներին բավական նվազել է թափառող շների թիվը: Երեւանում կա մոտավորապես 15-20.000 թափառող շուն:

- Եթե Երեւան քաղաքում շների հաշվառում չի կատարվում, ինչ  չափորոշիչներով է «Յունիգրաֆ իքս» ընկերությանը  Երեւանի թափառող կենդանիներին որսալու, ստերջացնելու ու վնասազերծելու համար հատկացնում ֆինանսական միջոցներ:

-Ելնելով բյուջեի հնարավորությունից նախատեսում ենք այնքան գումար, թե քանի շուն կկարողանան վնասազերծել ու քանիսը կծնվեն: Շների քանակությունն ավելի շատ է, քան թե նախատեսվող գումարը:

-Այս տարի որքա՞ն գումար է հատկացվել  «Յունիգրաֆ իքս» ընկերությանը եւ քանի շուն է այս տարի վնասազերծվել:

- 200 մլն դրամ է հատկացվել: Իսկ թե քանի շուն է վնասազերծվել, դա կարող է ասել «Յունիգրաֆը»: Իրենց մոտ է հաշվարկը:

Սոնա Դավթյան