«ԳԵՂԵՑԻԿ ՈՒ ԲԱՐՁՐԱՀԱՍԱԿ ԱՂՋԻԿԸ ԴԵՌԵՎՍ ՄՈԴԵԼ ՉԷ»

«ԳԵՂԵՑԻԿ ՈՒ ԲԱՐՁՐԱՀԱՍԱԿ ԱՂՋԻԿԸ ԴԵՌԵՎՍ ՄՈԴԵԼ ՉԷ»

Այսօր նորաբաց «Մերիդան» էքսպո կենտրոնում կմեկնարկի «Yerevan Fashion Week. Golden lace» նորաձեւության շաբաթը: Նորաձեւության ցուցադրության ընթացքում իրենց հավաքածուները կներկայացնեն մոդելավորողներ` ինչպես Հայաստանից, այնպես էլ Ռուսաստանից: Այս նախաձեռնության նպատակն է երիտասարդ եւ արդեն կայացած հայ դիզայներների, ինչպես նաեւ օտարերկրյա մոդելավորողների համար հարթակ հանդիսանալ` տարին առնվազն մեկ անգամ իրենց հավաքածուները հանրությանը եւ գնորդներին ներկայացնելու համար, ինչն իր հերթին կխթանի Հայաստանում տեքստիլ արդյունաբերության այս ճյուղի զարգացմանը:

Իսկ թե ի՞նչ չափանիշներով են ընտրվել հայաստանյան դիզայներները, որոնք կներկայացնեն իրենց հավաքածուները «Իրավունքը» հետաքրքվեց միջոցառման կազմակերպիչներից` «ԱՏԵՔՍ» նորաձեւության կենտրոնի տնօրեն ԿԱՐԻՆԵ ԴՆՈՅԱՆԻՑ.
-Նախեւառաջ նշեմ, որ սա մրցույթ չէ, այլ տոն է: Այս անգամ ընտրություն չի եղել: Ովքեր ցանկացել են մասնակցել, ընդգրկել ենք: Այս ցուցադրություններն  ընդամենը երեք օր է տեւելու` ամեն օր` 2 ժամ տեւողությամբ: Ուստի` 6 հոգի հայտ է ներկայացրել, իսկ մյուսներին չենք էլ հարցրել, քանի որ ժամանակի առումով անհնար էր ընդգրկել: Ուրախ եմ, որ բավական շատ դիզայներներ են արձագանքել` մասնակցելու համար: Բայց ամենամեծ խնդիրը, որի հետ առհասարակ հաճախ ենք բախվում, այն է, որ ոլորտում շատ են ոչ պրոֆեսիոնալները: Շատերն ուղղակի ավարտել են համալսարանը ու այս ասպարեզում դեռ ոչինչ չեն արել, սակայն համարում են իրենց դիզայներներ: Ես ամենուր նույնն եմ ասում ու երեւի թե ձանձրացրել եմ մարդկանց` նույնը կրկնելով, բայց դիզայներ համարում եմ միայն նրանց, ովքեր աշխատում են լուրջ կենտրոններում, որովհետեւ սա ինժեներական մասնագիտություն է` գեղարվեստական լուծումներով: Ուղղակի համալսարանն ավարտել ու որակավորում ստանալը դեռ որպես մասնագետ ձեւավորվել չէ: Թեպետ մեկ այլ խնդիր էլ կա. շատ պրոֆեսիոնալ դիզայներներ պարզապես չունեն լուրջ PR ու ամենակարեւորը` գումար, իսկ հավաքածու ստեղծելու եւ ներկայացնելու համար հսկայական գումարներ են պետք:
- Բնականաբար, 6 դիզայների հավաքածու ներկայացնելու համար մոդելներ են պետք: Հետաքրքիր է, թե ինչ սկզբունքով եք ընտրել մոդելներին:
- Ե՛վ հայ, ե՛ւ ռուս դիզայներները մոդելներին ընտրել են ըստ կերպարի, ովքեր համապատասխանում են իրենց հավաքածուներին: Նշեմ, որ հավաքածուները լինելու են շատ տարբեր, եւ անգամ ներքնազգեստի ցուցադրություն է լինելու, ինչը բավականին նոր երեւույթ է Հայաստանի համար: Բացի այդ, լինելու նաեւ մուշտակների, պատմական կոստյումների, ռետրո հավաքածուներ: Եվ չնայած մենք արդեն 15 տարի է զբաղվում ենք մոդելային արվեստով Հայաստանում, սա շատ երիտասարդ մասնագիտություն է մեր երկրում: Հետեւաբար, պրոֆեսիոնալ գործող մոդելները Հայաստանում շատ չեն: Շեշտում եմ` պրոֆեսիոնալիզմը, որովհետեւ միայն գեղեցիկ ու բարձրահասակ աղջիկը դեռեւս մոդել չէ: Շատ չափանիշներ կան, որոնց պետք է համապատասխանել: Այնպես որ, այսօր ունենք 20-30 գործող մոդել: Իհարկե, դա Մոսկվայի համար նույնն է, ինչ կաթիլը ծովում, բայց մեզ համար բավական շատ է: Ամեն դեպքում, ակտիվ աշխատանք է սպասվում, քանի որ միանգամից` մի օրվա մեջ, մի քանի ցուցադրություն է լինելու, ինչը բավական ծանր է, բայց վստահ եմ` կհաղթահարենք: Իհարկե, կարող է եւ քիչ լինեն մոդելները, բայց մենք սկզբունքորեն պնդել ենք, որ չհրավիրենք, օրինակ` մոդելներ Վրաստանից, ինչը հաճախ են անում տարբեր ցուցադրությունների կազմակերպիչները: Չէ՞ որ այստեղ կարեւոր է նաեւ մոդելային արվեստի զարգացմանը խթանել Հայաստանում եւ, իհարկե, մեր դիզայներների հագուստները ամենալավը հենց մեր մոդելները կարող են ներկայացնել:

ՀՐԱՆՏ ՍԱՐԱՖՅԱՆ