"ԵՌՅԱԿԸ" ՈՐՈՇՈՒՄ ԿԿԱՅԱՑՆԻ` ԲԱՆԱԿՑԵԼ ԻՇԽԱՆՈՒԹՅՈՒՆՆԵՐԻ ՀԵՏ..."

"ԵՌՅԱԿԸ" ՈՐՈՇՈՒՄ ԿԿԱՅԱՑՆԻ`
ԲԱՆԱԿՑԵԼ ԻՇԽԱՆՈՒԹՅՈՒՆՆԵՐԻ ՀԵՏ..."

Ավարտվեց հերթական խորհրդարանական քառօրյան, որը, ինչ խոսք, թեժ աշուն չհիշեցրեց, բայց եւ ոչ պակաս լարված էր: Եղան սպառնալիքներ հիշեցնող հայտարարություններ, անունների շահարկումներ ու որակումներ, բայց դրանից ոչ "եռյակը" դարձավ, ասենք, "հնգյակ", ոչ էլ իշխանություններն ընկճվեցին ընդդիմախոսների հոխորտանքներից: ԱԺ քառօրյայի, ինչպես նաեւ ներքին քաղաքական զարգացումների մասին էլ ծավալվեց "Իրավունքի" զրույցը ԱԺ ՀՀԿ խմբակցության պատգամավոր ՍՈՒՔԻԱՍ ԱՎԵՏԻՍՅԱՆԻ հետ:

"ԻՇԽԱՆՈՒԹՅՈՒՆՆԵՐԸ ՄԻՇՏ ԷԼ ԲԱՑ ԵՆ` ՑԱՆԿԱՑԱԾ
ԱՌԱՋԱՐԿՈՒԹՅՈՒՆՆԵՐԻ ՀԱՄԱՐ"

-Պարոն Ավետիսյան, ինչպես տեսանք ու լսեցինք, այս քառօրյայի ընթացքում Ձեր օպոզիցիոն ընկերների կողմից, կարելի է ասել, նույնիսկ սպառնալիքներ հնչեցին, թե տեսեք-տեսեք, ինչ ենք անելու հոկտեմբերի 24-ին կայանալիք հանրահավաքին: Ըստ Ձեզ, ի՞նչ կարելի է սպասել "եռյակի" հանրահավաքից:
- Իրենք արդեն ասել են` եթե շատ մարդ հավաքվի, "եռյակը" որոշում կկայացնի` բանակցել իշխանությունների հետ` իշխանափոխության մասին (ծիծաղում է Ս.Ա.-ն-հեղինակ): Իրենք են այդպես հայտատարել, ես ի՞նչ ասեմ:
- Իսկ իշխանությունները կգնա՞ն այդ բանակցություններին:
- Իշխանությունները միշտ էլ բաց են` ցանկացած առաջարկությունների համար: Բանակցությունները ենթադրում են առաջարկություններ` ինչ-որ խնդիրների շուրջ, իսկ այդ խնդիրները կարող են լինել իշխանության որոշ լծակներ կամ նախկինում, ինչպես իրենք էին ասում, վերահսկողական որոշ լծակներ վերցնելուն: Մինչդեռ իշխանությունն արդեն իսկ սահմանադրական բարեփոխումների հայեցկարգը ներկայացնելիս այդ մասին ասել է: Այնպես որ, անկախ նրանից, թե իրենք այսօրվա հանրահավաքից հետո ինչ կանեն կամ չեն անի, իշխանությունները միշտ ասել են, որ պատրաստ են ցանկացած հարցի շուրջ քննարկել, այդ թվում` վերահսկողության լծակներ տրամադրելու հարցը:

"ԶԱՐՄԱՆԱԼԻ Է ԺԱՄԱՆԱԿԱԳՐՈՒԹՅՈՒՆԸ`
"ԵՌՅԱԿԻ" ԱՆՈՒՆԻՑ ՀԱՆԴԵՍ Է ԳԱԼԻՍ "ՔԱՌՅԱԿԸ"

-Ի դեպ, այս շաբաթ խորհրդարանական հայտարարությունների ժամին Դուք ներկայացրիք երկու փաստաթուղթ, ըստ որի պարզվեց, որ անգամ "եռյակը" արտահերթ նիստ գումարելու համար միասնական որոշում չի կայացրել...
- Բա ի՞նչ ասեմ, ինձ համար զարմանալի է ժամանակագրությունը, "քառյակ", հետո "եռյակ", ապա "եռյակի" անունից հանդես է գալիս "քառյակը"... Ազգային ժողով բերում են ու ներկայացնում մեկ երրորդի ստորագրություններով երկու փաստաթուղթ. մի տեղ երկու քաղաքական ուժ են ներկայացնում նախագիծը, մյուս տեղ` մեկ ուրիշ քաղաքական ուժ: Այսինքն` կոնկրետ փաստաթղթից չի երեւում, որ դա "եռյակի" կողմից է ներկայացված:
- Ի վերջո, "եռյակը" կկարողանա՞ ինչ-որ ընդհանուր օրակարգ ձեւավորել որեւիցե հարցի շուրջ:
- Չնայած տարաբեւեռ քաղաքական ուժեր են, տարբեր գաղափարախոսություն ունեցող կամ չունեցող եւ նախկինում էլ եղել են իշխանության տարբեր բեւեռներում, այսօր իրենց մոտ մի օրակարգ կա` իշխանափոխություն: Բայց իրենց մեջ չե՞ն որոշել, թե իշխանափոխություն որ լինի, իրենցից ո՞վ է իշխանության գալու: Այ, երբ նման բան կորոշեն, նոր կարելի է խոսել այդ մասին:

"ՈՐՈՇ ՔԱՂԱՔԱԿԱՆ ՈՒԺԵՐ ԿՓՈՐՁԵՆ ԵՎՐԱՄԻՈՒԹՅԱՆԸ
ՍԻՐԱՇԱՀԵԼ` ԻՐԵՆՑ ԱՊԱԳԱ ԽՆԴԻՐՆԵՐԸ ԼՈՒԾԵԼՈՒ ՀԱՄԱՐ"

-Արդեն պարզ է, թե երբ է ՀՀ ԵՏՄ անդամակցման հարցը բերվելու Ազգային ժողով: Ըստ Ձեզ, այս հարցում նույնպե՞ս խորհրդարանում սպասվում է լարված քննարկում:
- Չեմ կարծում` շատ թեժ լարվածություն լինի, որովհետեւ խորհրդարանում` բացառությամբ մեկ-երկու քաղաքական ուժի, մյուսները կամ համակերպվել են, կամ էլ նույնիսկ արդեն արտահայտվել են, որ կողմ են դրան: Այլընտրանք` այս աշխարհաքաղաքական գործընթացների պարագայում, Հայաստանը չուներ: Իհարկե, նորից որոշ քաղաքական ուժեր կփորձեն Եվրամիությանը սիրաշահել` իրենց ապագա խնդիրները լուծելու համար, եւ այս առումով քաղաքական քննարկումներ միանշանակ կլինեն, բացառվում է, որ չլինի: Բայց այդ խնդիրը համարում եմ լուծված, քանի որ Ազգային ժողովում Հանրապետական խմբակցությունը մեծամասնություն է եւ կողմ է քվեարկելու:

"ՇԱՏ ԼԱՎ ԳԻՏԵՆՔ`
ՈՎ ՈՒՄ ՊԱՏՎԵՐՆ Է ԿԱՏԱՐՈՒՄ"

-Վերջերս ՀՀ նախագահը եղավ Գյումրիում, եւ նրա այցը գյումրեցի լրագրողները փորձեցին բոյկոտել եւ չլուսաբանել, ինչպե՞ս եք վերաբերվում այս երեւույթին:
- Շատ վատ եմ վերաբերվում, որովհետեւ նախեւառաջ նախագահի յուրաքանչյուր այց` ցանկացած տարածաշրջան, շատ կարեւորում եմ, եւ երկրորդ` նախագահը այցելել էր Գյումրի` շատ լավ նպատակով: Հայտնի բարերար, բժիշկ Հովհաննես Օյունջյանը մեկ միլիոն դոլարից  ավել գումար էր փոխանցել, որ կառուցվեր արվեստի հոյակապ  դպրոց: Եվ նմանատիպ կառույցների բացմանը, կարծում եմ, նախագահը պետք է պարտադիր լինի, որովհետեւ դավերաբերմունք է նախ տվյալ ներդրողի համար, ապա նաեւ` տվյալ տարածաշրջանի նկատմամբ: Ինչքան նախագահը շատ լինի մարզերում, այնքան ավելի ճիշտ է: Իսկ բոյկոտել այս դեպքում համարում եմ պատվեր կատարել, որովհետեւ մենք բոլորս էլ շատ լավ գիտենք, ով ում պատվերն է կատարում: Հատկապես բոյկոտող կազմակերությունը` "Ասպարեզ" ակումբը: Եվ դա կապել անօթեւանների խնդրի հետ, կոռեկտ չեմ համարում: Անօթեւանների խնդիրը կա, եւ կառավարությունը որոշում է կայացրել ու մինչեւ մյուս տարվա կես առ այսօր հաշվառված 430 անօթեւան կստանան իրենց բնակարանները:

"ՄԻ ՔԱՆԻ ՊԱՏԳԱՄԱՎՈՐՆԵՐ ՆՈՒՅՆ ՏԵՔՍՏԸ ՆՈՒՅՆ ՏՈՆՈՎ ՓՈՐՁՈՒՄ ԵՆ ԱՆԸՆԴՀԱՏ
ԸՆԹԵՐՑԵԼ"

-Կրկին վերադառնանք ԱԺ քառօրյային: Ինչպե՞ս կգնահատեք այն` հաշվի առնելով նաեւ այս շաբաթ եղած միտինգային ելույթները խորհրդարանական ամբիոնից:
- Ցավոք սրտի, ցանկացած հարցի շուրջ կան մի քանի պատգամավորներ, որոնք նույն տեքստը նույն տոնով փորձում են անընդհատ ընթերցել: Այսինքն` միայն վատաբանել իշխանությանը` բերելով թվեր, փաստեր, որոնցից կեսը ճիշտ է, կեսը` սխալ: Բայց ասում են միայն վատաբանելու համար, բուն հարցի էությանը չեն էլ անդրադառնում: Իսկ ընդհանուր առմամբ, կարծում եմ, քառօրյան շատ կարեւոր հարցեր քննարկեց: Իհարկե, ցավում եմ, որ չհասցրեցինք մյուս հարցերն էլ քննարկել, որոնք շատ կարեւոր էին: Եվ ամենակարեւորը` սահմանամերձ գյուղերի տնտեսական գործունեության վերաբերյալ արտոնություններն էին, որի շուրջ եղան շատ կոնկրետ առաջարկություններ: Կարծում եմ` կառավարությունն ականջալուր կլինի այդ առաջարկություններին, եւ երկրորդ ընթերցմամբ ավելի կոնկրետ քննարկում կլինի: Համենայնդեպս, քառօրյան համարում եմ արդյունավետ, բայց, կարծես թե, արդեն քառօրյան էլ չի բավականացնում` հարցերը քննարկելու համար:

ՀՐԱՆՏ ՍԱՐԱՖՅԱՆ