ՄԽԻԹԱՐՅԱՆԻ ՍՊԱՍՎԱԾ ՎԵՐԱԴԱՐՁՆ ԱՆՀԱՋՈՂ ՍՏԱՑՎԵՑ

ՄԽԻԹԱՐՅԱՆԻ ՍՊԱՍՎԱԾ ՎԵՐԱԴԱՐՁՆ ԱՆՀԱՋՈՂ ՍՏԱՑՎԵՑ

Հայաստանի հավաքականի եւ Դորտմունդի "Բորուսիայի" կիսապաշտպան Հենրիխ Մխիթարյանի վերադարձը ֆուտբոլային խաղադաշտ փոքր-ինչ անհաջող ստացվեց: Հենրիխը վնասվածքից վերակագնվելուց հետո խաղադաշտ վերադարձավ Գերմանիայի առաջնության 8-րդ տուրի "Քյոլնի" հետ հանդիպմանը: Սակայն հայ ֆուտբոլիստի ցուցադրած խաղը ցույց տվեց, որ վնավածքից հետո Մխիթարյանը դեռ համապատասխան մարզավիճակ ձեռք չի բերել: Այս խաղը, ինչպես հայտնի է, Յուրգեն Կլոպի թիմը պարտվեց 1:2 հաշվով, Մխիթարյանը փոխարինվեց հանդիպման 68-րդ րոպեին:
Whoscored.com-ը ներկայացրել է Հենրիխ Մխիթարյանի վիճակագրությունը "Քյոլնի" դեմ խաղում: Մխիթարյանը կատարել է մեկ հարված, որը ստացվել է շեղ: 25-ամյա կիսապաշտպանը կատարել է 32 փոխանցումª 75 տոկոս ճշգրտությամբ:

Ֆուտբոլիստը չորս անգամ շրջանցել է մրցակիցներին, երկու անգամ խլել գնդակը: Մխիթարյանը երկու անգամ խախտել է կանոնները եւ զգուշացվել սիմուլյացիայի համար: Կիսապաշտպանի հետ պայքարում մրցակցի ֆուտբոլիստները կանոնները խախտել են մեկ անգամ: Արդյունքում նա ստացել է 6.95 գնահատականը:
Գերմանական հեղինակավոր պարբերականները եւս գնահատել են 25-ամյա կիսապաշտպանի խաղը: Kicker-ի գնահատականը 4.5 է. նրանից ցածր ստացել են միայն Ռոման Վայդենֆելերն ու Մատս Հումելսը: "Բորուսիայի" կազմում լավագույնն են եղել Սոկրատիս Պապաստատոպուլոսը, Սինձի Կագավան ու Մարկո Ռոյսը: Bild-ը 5 է գնահատել հայ ֆուտբոլիստի խաղը: Նման գնահատական են ստացել նաեւ Ռոման Վայդենֆելերը, Կեւին Գրոսկրոյցը, Մատս Հումելսը, Լուկաս Պիշչեկն ու Սինձի Կագավան: Պարբերականի կարծիքովª դորտմունդցիների կազմում լավագույնն են եղել Իլկայ Գյունդոգանն ու Մարկո Ռոյսը: Այսպիսի գնահատականներ հայ ֆուտբոլիստը երկար ժամանակ է, ինչ չէր ստացել: Սակայն չպետք է մոռանալ, որ վերջինիս լիարժեք մարզավիճակ ձեռք բերելու համար անհրաժեշտ է ժամանակ: Բացի այդ, եթե այսպիսի խաղ Մխիթարյանը ցույց տար Ազգային ընտրանու կազմում, գուցե չարժանանար նման ցածր գնահատականի, ի վերջո, պետք է հաշվի առնել նաեւ թիմի ներքին մրցակցությունն ու ընդհանուր խաղամակարդակը: Երբ նույն թիմում հանդես ես գալիս այնպիսի ֆուտբոլիստների հետ, ինչպիսիք են Կագավան, Մարկո Ռոյսը, Մատս Հումելսը եւ այլք, ապա քննադատների բարեհաճությանն արժանանալու համար, հարկավոր է լինել իսկապես լավագույնըª բոլոր խաղերում եւ ցանկացած մրցակցի դեմ հանդիպումներում:

ՔՐԻՍՏԻՆԵ ՊԵՏՐՈՍՅԱՆ