ԱՌԵՎԱԳԵԼ, ԾԵԾԵԼ, ՀԵՏՈ ՆՈՐ ԹԱԼԱՆԵԼ

ԱՌԵՎԱԳԵԼ, ԾԵԾԵԼ, ՀԵՏՈ ՆՈՐ ԹԱԼԱՆԵԼ

Ինչե՞ր ասես չի անցնի լրագրողի մտքով, երբ բացակայում է պաշտոնական տեղեկատվությունը:
Ըստ լուրերիª հոկտեմբերի 18-ին Նոր Խարբերդ գյուղում մի խումբ տղամարդիկ առեւանգել են մի կնոջ եւ ու մի քանի օր պահել տներից մեկում: Կնոջը ծեծել էին, պահանջել էին գումար: Կինը մերժել էր: Հանցագործները շարունակել էին նրան ծեծել, հետո հափշտակել էին նրա մոտ եղած... 500 000 դրամն ու հեռացել: Հեռացել էին երկուսը, երրորդը մնացել էր ու եւս 2 օր պահել էր կնոջը այդ տանը: Հանցագործները ձերբակալված են, սակայն որեւէ տեղեկություն չկա, թե ինչպիսի մեղադրանքներ են ներկայացվել նրանց: Մասնավորապեսª "ամենահամառ" երրորդին:
Կինը տեղափոխվել է հիվանդանոց:


"ՔՐԴԻ" ԳՈՐԾՈՎ
ՎԻՐԱԲՈՒՅԺԻ ԳՈՐԾԸ ԲՈՒՐԴ Է

Մեկ տարի առաջ, 2013-ի հոկտեմբերի 13-ին, Վանաձորի բուժհիմնարկներից մեկում մահացել էր 15-ամյա Դավիթ Հովակիմյանը: Այդ պատանուն ժամեր առաջ դանակահարել էր մեկ այլ երիտասարդª   22-ամյա Կարենը, նույնª "Քուրդը": Ըստ քրեական գործի նյութերիª "...նախկինում դատապարտված "Քուրդ" մականունով Կարենը Վանաձորի Կ. Դեմիրճյան փողոցի հարեւանությամբ գտնվող այգում, վիճաբանության ժամանակ, դանակով հարվածել էր Դ. Հովակիմյանին եւ պատճառել մահ": Մեղադրանքը առաջադրվել էր ՀՀ քրեական օրենսգրքի 34-104-րդ (սպանության փորձ) հոդվածի 1-ին մասով: Ինչո՞ւ "սպանության փորձ":
Իրավապահները համարել են, որ պատանին չէր մահանա, եթե...
2014-ի օգոստոսի 26-ին նույն այս դեպքի առնչությամբ կալանավորվել էր "Վանաձոր" ԲԿ վիրաբուժական բաժանմունքի վարիչ Վլադիմիր Ղուկասյանը: Ըստ ոստիկանության` 15-ամյա տղայի կյանքը հնարավոր կլիներ փրկել, սակայն բժիշկը թերացել էր: Ներկայումս վրա է հասել վիրաբույժի կալանքի ժամկետը երկարացնելու պահը: Շարունակությունըª Վ. Ղուկասյանի պաշտպանի բառերով. "Դատախազությանը հաճոյանալու համար դատարանն ամեն ինչ անում է, քաղաքացիական արիություն չունի` ինքնուրույն որոշում կայացնելու, դատարանը նայում է միայն դատախազության ժեստիկուլյացիային: Սա իրավաբանություն չէ, այլ` վրեժխնդրություն":
"Քրդի" գործն արդեն դատարանում է: Ինչպիսի հետեւությունների կհանգի դատարանը` կարեւոր է ոչ միայն "Քրդի", այլեւ վիրաբույժի համար: Համաձայնենք, որ եթե դատարանը "մայր գործով" եզրակացնի, որ դանակահարողի գործողությունները ընդամենը մահափորձ էր, ապա "մարդասպան" վերջնականապես կնշանակվի վիրաբույժը:

ՖԻԶԿՈՒԼՏՈՒՐԱՅԻ ՈՒՍՈՒՑԻՉԸ ԴԱՆԱԿԱՀԱՐԵԼ է
ՀԱՄԱԳՅՈՒՂԱՑՈՒՆ

Օրերս Տավուշի մարզի Մովսես գյուղում դպրոցի ֆիզկուլտուրայի ուսուցչի եւ գյուղի երիտասարդ տղաներից մեկի միջեւ վիճաբանություն է եղել, որն ավարտվել է դանակահարությամբ: "Երկուսն էլ մեր գյուղի բնակիչ են եղել: Թե կոնկրետ ինչն է եղել վեճի պատճառըª չգիտեմ, բայց ասում են, թե ջահելական կռիվներ են եղել, երկուսն էլ չափից դուրս ամբիցիոզ երիտասարդներ են: Դանակահարողը եղել է դպրոցի ֆիզկուլտուրայի ուսուցիչը` Արմեն Ավալյանը",- մեզ հետ զրույցում ասաց Տավուշի մարզի Մովսես գյուղի գյուղապետ Արարատ Ավալյանը: