«ՃԻՇՏ ՉԵՆ ԸՆԿԱԼԵԼ, ԹԵ ՈՐՏԵՂ ԵՆ, ԵՎ ԻՆՉԻ ՀԱՄԱՐ Է ԱԶԳԱՅԻՆ ԺՈՂՈՎԻ ԱՄԲԻՈՆԸ»

«ՃԻՇՏ ՉԵՆ ԸՆԿԱԼԵԼ, ԹԵ ՈՐՏԵՂ ԵՆ,
ԵՎ ԻՆՉԻ ՀԱՄԱՐ Է ԱԶԳԱՅԻՆ ԺՈՂՈՎԻ ԱՄԲԻՈՆԸ»

Երեկ անդրադառնալով Մարդու իրավունքների պաշտպանի 2013 թվականի զեկույցի քննարկման շրջանակներում ոչ իշխանական ուժերի ելույթներին` ԱԺ ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆԸ ամբիոնից նշեց, որ դրանցից զգացել է ոչ միայն Արեւմուտքի դոլարների, այլեւ ալիեւյան նավթադոլարների հոտը: Ապա ՀՀԿ խմբակցության ղեկավարը դիմելով ՄԻՊ Կարեն Անդրեասյանին` կոչ արեց ԱԺ ամբիոնը չօգտագործել «կոնչիտաներին» գովերգելու համար: Հենց այս լարված ԱԺ քառօրյայի, ինչպես նաեւ վերջին ներքին ու արտաքին քաղաքական գործընթացների մասին էլ ծավալվեց «Իրավունքի» զրույցը պարոն Բաղդասարյանի հետ:

«ՊԱՏԳԱՄԱՎՈՐՆԵՐՍ ՊԵՏՔ Է ԶԳՈՆ ԼԻՆԵՆՔ»

-Արդեն ԱԺ քառօրյայի երրորդ աշխատանքային օրն է, եւ բոլորս ականատես եղանք, որ Ձեր օպոզիցիոն գործընկերներից շատերի կողմից  միտինգային ելույթներ են հնչում: Ինչպե՞ս եք գնահատում այս իրավիճակը:
- Դե, միտինգային տրամադրություններն իրենց մոտ շուտ է սկսվել: Ազգային ժողովն այն ամբիոնն է, որը ցանկանում են օգտագործել հօգուտ իրենց քաղաքական շահերի: Սակայն կային նաեւ ելույթ ունեցողներ, որոնք միտինգավորներ չէին, նրանք բոյկոտել էին միտինգը, բայց նրանք էլ իրենց քաղաքական շահերն ունեին: Ինձ թվում է` ճիշտ չեն ընկալել, թե ինչի համար են եկել, որտեղ են եւ ինչի համար է Ազգային ժողովի ամբիոնը: Ազգային ժողովի ամբիոնն օրենսդրական գործունեության համար է եւ ոչ թե` պրովոկացիոն հայտարարությունների: Եվ ինձ թվում է` պատգամավորներս պետք է զգոն լինենք, որ ճիշտ օգտագործենք այն մանդատը, որը ժողովուրդը տվել է մեզ:
- Հենց ԱԺ քառօրյայի սկզբում խորհրդարանական ամբիոնը ԱԺ "Ժառանգություն" խմբակցության պատգամավոր Զարուհի Փոստանջյանի կողմից օգտագործվեց` իբրեւ թե «դատավճիռ» կարդալով ՀՀ գերագույն հրամանատարի` ՀՀ նախագահի հասցեին: Մի՞թե սա ազգային դավաճանություն չի կարելի որակել:
- Ես նման կերպ էլ որակեցի, բնականաբար: Սա, պարզապես, աննախադեպ երեւույթ է, որը կատարվում է մեր պառլամենտում: Ի՞նչ է նշանակում երկրի խորհրդանիշի մասին այդպես խոսելը... Ինձ թվում է` այդ մարդիկ սխալ տեղ են եկել, միայն այդ կարող եմ ասել: Իմ ելույթի ժամանակ արդեն մտահոգություններս հայտնեցի, չեմ ուզում կրկնվել, որովհետեւ ինձ համար հաճելի չէ:

ՄԵՐ ԵՐԿՐՈՒՄ
ՔԱՂԲԱՆՏԱՐԿՅԱԼՆԵՐ ՉԿԱՆ

-Ի դեպ, ԱԺ Մարդու իրավունքների մշտական հանձնաժողովը պնդում էր, թե պետք է լսումներ անցկացվեն` քաղբանտարկյալների հարցով: Ի վերջո, Հայաստանում կա՞ն քաղբանտարկյալներ եւ պե՞տք են նման լսումները:
- Նման երեւույթներին ես շատ վատ եմ վերաբերվում, որ լինեն քաղբանտարկյալներ, բայց մեր երկրում` որպես այդպիսին, չեմ տեսնում: Իհարկե, եղել են ժամանակին, օրինակ, 1950-60-ականներին, բայց, փառք Աստծո, այսօր չկան: Ցավում եմ նաեւ այն քաղաքական գործիչների եւ այն կազմակերպությունների համար, որոնք խուլիգանություն անողին վերաորակում են որպես քաղբանտարկյալի: Սա նորմալ չեմ համարում:

«ՈՐԵՎԷ ՀԻՄՔԵՐ ՉԿԱՆ` ԻՆՉ-ՈՐ ՖՈՐՍՄԱԺՈՐԱՅԻՆ ԻՐԱՎԻՃԱԿԻ»

-Պարոն Բաղդասարյան, անդրադառնանք նաեւ Հայաստանի` Եվրասիական տնտեսական միության անդամակցմանը: Որեւէ քննարկում եղե՞լ է, թե երբ այդ փաստաթուղթը կբերվի Ազգային ժողով` վավերացման համար:
- Բնականաբար, դա արդեն կախված չէ մեզնից: Այդ փաստաթուղթը նախ պետք է գնա Սահմանադրական դատարան: Ամենամեծ շտապողներից մեկը մենք ենք այս հարցում, որովհետեւ ինչքան արագ բերվի այդ փաստաթուղթը, այնքան մեր գործն ավելի հեշտ կլինի, քանի որ պետք է մինչեւ դեկտեմբերի վերջ կարողանանք այն ավարտին հասցնել: Սակայն դա կախված է Սահմանադրական դատարանից: Ինձ թվում է` նրանք էլ կաշխատեն, որպեսզի ինչքան հնարավոր է արագ հասցնեն փաստաթուղթը Ազգային ժողով:
- Այս գործընթացնում ինչ-որ ֆորսմաժորային իրավիճակ հնարավո՞ր է լինի:
- Չեմ կարծում, որեւէ հիմքեր չկան` ինչ-որ ֆորսմաժորային իրավիճակի, որովհետեւ չի եղել տեքստում որեւէ փոփոխություն: Պայմանագրի տեքստը, որը ներկայացվել է հանրությանը, բառացիորեն նույն ձեւով դրանք ստորագրվել են, եւ չկա նմանատիպ մի երեւույթ, ինչը կարող է նման իրավիճակ առաջացնել: Կարծում եմ` քաղաքական ուժերի ճնշող մեծամասնությունը, որոնք հիմնական դերակատարություն ունեն քաղաքական դաշտում, կողմնակից են այս տեսքով այդ անդամակցությանը:

«ՄԵԶ ՁԵՌՔ Է ՏԱԼԻՍ` ԻՆՉՔԱՆ ՇԱՏ ՄԱՐԴ ԳՆԱ ՀԱՆՐԱՀԱՎԱՔԻ, ԱՅՆՔԱՆ ՇԱՏ ՄԱՐԴ ԿՀԻԱՍԹԱՓՎԻ»

-Կրկին վերադառնալով ներքաղաքական զարգացումներին` ի՞նչ սպասելիքներ ունեք ոչ իշխանական «եռյակի» առաջիկա հանրահավաքից: Հնարավո՞ր է նախորդի համեմատ այն ավելի մասշտաբային լինի:
- Կապրենք` կտեսնենք: Համենայն դեպս, թող սպասելիքներ ունենան միտինգ կազմակերպողները, ես որեւէ սպասելիքներ չունեմ: Մենք մեր գործը կատարում ենք, եւ նորմալ է այդ ամենը: Նորից եմ կրկնում` մեզ ձեռք է տալիս` ինչքան շատ մարդ գնա հանրահավաքի, այնքան շատ մարդ կլսի ու կհիասթափվի: Եվ ժողովուրդը կհասկանա, թե իրենց ինչի համար են փողոց հանել:

ՀՐԱՆՏ ՍԱՐԱՖՅԱՆ