ՎԱՐԴԱՆ ԱՅՎԱԶՅԱՆԸ`ՀՐԱՆՏ ԲԱԳՐԱՏՅԱՆԻՆ. « ԽՆԴՐՈՒՄ ԷԻՆՔ ԳԱԶԻ ՈՒ ՀՈՍԱՆՔԻ ՀԱՄԱԿԱՐԳԵՐԸ ԴԱՐՁՆԵԼ ՀԱՄԱՅՆՔՆԵՐԻ Ս

ՎԱՐԴԱՆ ԱՅՎԱԶՅԱՆԸ`ՀՐԱՆՏ ԲԱԳՐԱՏՅԱՆԻՆ. « ԽՆԴՐՈՒՄ ԷԻՆՔ ԳԱԶԻ ՈՒ ՀՈՍԱՆՔԻ ՀԱՄԱԿԱՐԳԵՐԸ ԴԱՐՁՆԵԼ ՀԱՄԱՅՆՔՆԵՐԻ ՍԵՓԱԿԱՆՈՒԹՅՈՒՆ…»

«Եթե մի  բան ենք անում, եկեք շնորհքով անենք,  էս արտոնությունն  ո՞ւմ եք տալիս, եղբայր, ինչ ժամկետով  ու ինչքան»,- այսօր ԱԺ-ում  հիմնական զեկուցող  Վարդան Այվազյանին հարցրեց ՀԱԿ խմբակցության պատգամավոր Հրանտ Բագրատյանը:

Պատգամավորի խոսքով` կառավարությանը չվստահելու հարց չկա, պարզապես պետք  է հստակեցնել` ում եւ ինչ ենք տալիս:

Վարդան Այվազյանը հստակեցրեց`  օրենքը վերաբերում է  սահմանամերձ համայնքներին, որոնց ցանկը կազմում է Կառավարությունը: Ապա նաեւ թարմացրեց  նախկին վարչապետի հիշողությունը. «1995 թ-ին Ձեր վարչապետության օրոք ընդունեցիք մի օրենք, որը հնարավորություն էր տալիս կառավարությանը որոշում ընդունել, որով սահմանվեցին ողջ հարկերն ու տուրքերը»:

«Էն ժամանակ ուրիշ էր, հիմա՝ ուրիշ»,- տեղից հակադարձեց  Հրանտ Բագրատյանը:

«Հա բա, էն ժամանակ ուրիշ էր, հիմա՝ ուրիշ»,-  կրկնեց նախկին վարչապետի խոսքերն Այվազյանը:

«Երկու անգամ, որպես Չարենցավանի քաղաքապետ,  առաջարկել եմ եկամտահարկը տեղական բյուջեի մուտքի մաս համարել, մերժել եք: Խնդրում էինք գազի ու հոսանքի համակարգերը դարձնել համայնքների սեփականություն, ասում էիք` չի կարելի: Հիմա ասում եք` ինչու է գազն ու հոսանքը սենց»,- շարունակեց Այվազյանը:

Նախկին վարչապետը,  չհանդուրժելով որեւէ քննադատություն, պոռթկաց.«Նախ, որ դուք ասում եք մեր ժամանակ էսպես է  եղել, դա էսօրվա քննարկման հետ որեւէ կապ չունի: Մեր ժամանակ տենց ա եղել՝ լավ ա եղել:Այդ  ամենն արվել է մինչեւ սահմանադրության ընդունումը:  Պատերազմի տարիներին`1994 թ-ին, 7% աճ ենք ստացել: Ստացեք էդ աճը: Ձեր պատասխանն ու ռեակցիան ճիշտ չեն»:

Սոնա Դավթյան