ՎԱՐԴԱՆ ԱՅՎԱԶՅԱՆԸ` ՆԻԿՈԼ ՓԱՇԻՆՅԱՆԻՆ. «ԳՆԱ ՊԱՊԱՆԵՐԻԴ ԱՍԱ»

ՎԱՐԴԱՆ ԱՅՎԱԶՅԱՆԸ` ՆԻԿՈԼ ՓԱՇԻՆՅԱՆԻՆ. «ԳՆԱ

ՊԱՊԱՆԵՐԻԴ ԱՍԱ»

Սահմանամերձ բնակավայրերին հարկային արտոնություններից ազատելու  ՀՀ կառավարության  օրինագծի քննարկումը  ԱԺ-ում շարունակվում է, ընդ որում բավական բուռն: Հարակից զեկուցող  Վարդան  Այվազյանի ու ՀԱԿ պատգամավոր Նիկոլ Փաշինյանի միջեւ լեզվակռիվ սկսվեց: Նիկոլ Փաշինյանը բարձր տոնով ասաց, որ սահմանամերձ համայքների բնակիչները` տատիկ-պապիկները, սահմանամերձ համայնքների խանութներին 100.000-ների պարտք ունեն եւ դա մարելու համար պետք է կառավարությունը  հարկային արտոնություններ տալու փոխարեն  ֆինանսապես աջակցի նրանց: Վարդան Այվազյանին դուր չեկավ Նիկոլ Փաշինյանի խոսելու տոնը.  «Անկապ  կողքից խոսողներին խնդրում եմ կարգի հրավիրել»,-ասաց  Այվազյանը:

Կրքերը հանդարտեցնելու համար միջամտեց ԱԺ փոխնախագահ Հերմինե Նաղդալյանը` կոռեկտության կոչ անելով: «Ի վերջո, եթե բղավում եք, նշանակում  է այլ արգումենտ չունեք»,- ասաց Աժ փոխնախագահը:

Նիկոլ Փաշինյանին միացավ «Ժառանգություն» խմբակցության  պատգամավոր Զարուհի Փոստանջյանը:

«Ամոթը չափ ունի բոլորի համար: Սուտի գոռգոռալով չէ: Դու ինձ չես կարա ասես, էլ ուր մնաց` ինքն ասի»,- ասաց Այվազյանը Զարուհի Փոստանջյանին:

Լեզվակռիվը շարունակվեց: «Գնա պապաներիդ  ասա: Պապաներդ պետք է ասեն, որ քեզ հատուկ զադանյա են տալիս: Պապաներդ պետք է ասեն քեզ` ոնց խոսաս, եղա՞վ, արա: Չշշկռես հանկարծ»,- ասաց Վարդան Այվազյանը Նիկոլ Փաշինյանին:

Ի դեպ,  ընդմիջման ժամանակ եւս Զարուհի Փոստանջյան- Վարդան Այվազյան լեզվակռիվը մի քանի րոպե շարունակվեց:

Սոնա Դավթյան