ԱՄԵՆ ԻՆՉ "ՇԱԽՄԱՏԱՑՎԱԾ" ՀԱՅԱՍՏԱՆԻ ՀԱՄԱՐ

ԱՄԵՆ ԻՆՉ "ՇԱԽՄԱՏԱՑՎԱԾ" ՀԱՅԱՍՏԱՆԻ ՀԱՄԱՐ

Օրեր առաջ Տիգրան Պետրոսյանի անվան շախմատի տանը տեղադրվեց աշխարհի 9-րդ չեմպիոնի կիսանդրին, որի հեղինակն է հայ անվանի քանդակագործ Արա Սարգսյանը: Քանդակը, որը ստեղծվել է 1965 թվականին եւ մոտ կես դար գտնվում էր Սարգսյանի տուն-թանգարանում, արվեստագետի հարազատների նվերն է Հայաստանի շախմատի ֆեդերացիային: Արարողությանը ներկա են գտնվել Հայաստանի նախագահ, Հայաստանի շախմատի ֆեդերացիայի ղեկավար Սերժ Սարգսյանն ու Շախմատի միջազգային ֆեդերացիայիª ՖԻԴԵ-ի նախագահ Կիրսան Իլյումժինովը:
Ի դեպ, ՖԻԴԵ-ի նախագահի այցը Հայաստան կապված էր մասնավորապես Երեւանում ընթացող "Շախմատը դպրոցներում" միջազգային գիտաժողովի հետ, որին մասնակցելու համար Հայաստան էին ժամանել 31 երկրի ներկայացուցիչներ: Գիտաժողովի ընթացքում ներկայացվեց, թե ինչ պատճառներ եւ ակնկալիքներ ունենալով է Հայաստանը որոշել շախմատը ներառել կրթական համակարգª որպես միջնակարգ դպրոցներում պարտադիր առարկա: ՖԻԴԵ-ի նախագահ Կիրսան Իլյումժինովը կիսվելով տպավորություններով` իր ելույթում նշեց. "Այստեղ` Հայաստանում, ամեն ինչ շնչում է շախմատով, նույնիսկ մթնոլորտը, կոլորիտն է շախմատային: Պատահական չէ, որ շուտով Ռուսաստանում մեկնարկելու է Տիգրան Պետրոսյանի անվան հուշամրցաշար, եւ այդ հուշամրցաշարը նախագահելու է Հայաստանի մեծարգո նախագահը: Հայաստանը կատարյալ օրինակ է, թե ինչպես պետք է սիրել, զարգացնել, պահպանել սիրելի մարզաձեւը, մարզաձեւի ջատագովներին, թե ինչպես պետք է նվիրվել այս մարզաձեւին եւ այնքան սիրել, որ դարձնել ազգային արժեք, ներդնել կրթական համակարգում եւ նպաստել երեխաների ինտելեկտուալ զարգացումը: Պատահական չէ նաեւ, որ Հայաստանի հավաքականը երեք անգամ կարողացել է դառնալ Համաշխարհային օլիմպիադայի չեմպիոն: Նույնիսկ գերհզոր պետություններին չի հաջողվում երեք անգամ դառնալ Օլիմպիադայի չեմպիոն: Բայց Հայաստանի հավաքականը ապացուցեց, որ դա հնարավոր է, երբ խաղում ես կատարյալ ու գեղեցիկ շախմատ":
Շախմատի առաջընթացին կնպաստեն նաեւ շախմատային նոր դպրոցները.  հոկտեմբերի 17-ին Երեւանի Մալաթիա-Սեբաստիա վարչական շրջանի Բ-2 թաղամասում բացվեց Երեւանի հերթական շախմատի դպրոցը: Բացումը կատարեցին Երեւանի պատվավոր քաղաքացի, գրոսմայստեր Լեւոն Արոնյանը եւ Երեւանի քաղաքապետ Տարոն Մարգարյանը, եւ այս միջոցառմանը նույնպես ներկա էին Սերժ Սարգսյանն ու Կիրսան Իլյումժինովը: 400 քմ տարածք գրավող շախմատի դպրոցում կարող է սովորել 300-350 երեխա: Ներկայումս շախմատ մարզաձեւը հատկապես Հայաստանում կապվում է Լեւոն Արոնյանի եւ նրա հեղինակության հետ, համաշխարհային մակարդակի նման շախմատիստ ունենալն արդեն իսկ ենթադրում է հետաքրքրություն մարզաձեւի նկատմամբ:

ՔՐԻՍՏԻՆԵ ՊԵՏՐՈՍՅԱՆ