"ՆՈՂԿԱՆՔ ԵՄ ԱՊՐՈՒՄ ՇՈՈՒԲԻԶՆԵՍՅԱՆ ԱՅԴ ՓԱՌՔԻՑ"

"ՆՈՂԿԱՆՔ ԵՄ ԱՊՐՈՒՄ
ՇՈՈՒԲԻԶՆԵՍՅԱՆ ԱՅԴ ՓԱՌՔԻՑ"

Երգիչ ԴԱՎԻԹ ԹՈՒՋԱՐՅԱՆԻ ու նրա արվեստը սիրողների համար առաջիկայում մեծ շրջադարձ է սպասվում` երգիչը փոխել է իր երգացանկն ու բոլորովին նոր ոճով է որոշել հանդես գալ: Սակայն Դավիթը ոչ թե շոու-բիզնեսում նորաձեւ դարձած շոուի համար 6/8-ից կանցնի ժողովրդականին կամ դասականից` ռեփին, այլ այսուհետ որոշել է երգել հոգեւոր երգեր: Իսկ թե ինչո՞ւ, "Իրավունքը" պարզեց երգչի հետ ունեցած զրույցում.

"ՓՈՇՄԱՆԵՑԻ ԻՄ ԱՊՐԱԾ ԿՅԱՆՔԻ ՀԱՄԱՐ"

-Իմ կյանքում միշտ իմացել եմ Աստծո խոսքը ու չեմ կարողացել ապրել այդ կյանքով, չեմ կարողացել կտրվել աշխարհի ցանկացած հաճույքներից: Մարմինն ու աչքն ունեն իրենց ցանկությունները, իսկ մարդն անընդհատ ձգտում է այդ վայելքներին, ու հենց այդտեղ է կայանում մարդու կործանումը` շատ սխալներ է թույլ տալիս: Փոշմանեցի իմ ապրած կյանքի համար, գուցե մարդկանց համար կողքից ամեն ինչ լավ էր թվում, բայց չէին տեսնում, թե Դավիթի ներսում ինչեր է կատարվում, ինչ սխալներ է թույլ տալիս: Շոու-բիզնեսում մարդը փառավորվում է` "չեմ տեսնում ձեր ձեռքերը", "ավելի բարձր"... ծափահարություններ ես ուզում խլել ժողովրդից, որպեսզի ավելի շատ քեզ մեծարեն: Դա մարդկային փառք է, բոլորիս մեջ էլ կա, բոլորն ուզում են բարձրանալ վեր, բայց չեն մտածում, որ բարձունքից ընկնելն ահավոր կորստի է տանում: Իսկ խոնարհը երբեք ընկնելու տեղ չունի: Ես այսօր խուսափում եմ` անընդհատ ես, ես, ես սկզբունքից, իսկ ժամանակին ես այդպիսին էի:
- Դավիթ, գուցե այդ ես-ի սկզբո՞ւնքը բերեց նրան, որ այսօր հայկական շոու-բիզնեսը դոփում է տեղում:
- Գուցե դա էլ է նպաստել, բայց մի քիչ էլ մեր երկրի վիճակից է, որովետեւ եթե համեմատես դրսի շոու-բիզնեսի "աստղերի" հետ, այնտեղ էլ կա այդ փառքը, ես-ը, էգոն, ուղղակի այնտեղ մեծ գումարներ են շրջանառության մեջ, ու բոլորն էլ օգտվում են: Իսկ այստեղ` այստեղ մենք մեղկ ենք, մեր շոու-բիզնեսն էլ է մեղկ, բոլորն էլ խեղճուկրակ են, փոքր է պետությունը, ֆինանսը` քիչ:

"ՄՈՐՍ ՄԱՀԻՑ ՀԵՏՈ ԱՄԵՆ ԻՆՉ ԿՏՐՎԵՑ..."

-Իսկ հնարավո՞ր է, որ առաջիկայում ռուսական շոու-բիզնես մտնեք, որովհետեւ Ձեր կինը մոսկվաբնակ հայ է ու հաճախ եք լինում Մոսկվայում:
- Ռուսական շոու-բիզնես մուտք կգործեմ ոչ թե ձգտելով բարձունքների, այլ այն նպատակով, որ ասեմ` երկրի արքայությունը մոտ է, շուտ-շուտ ապաշխարեք` բան չի մնացել: Ես նողկանք եմ ապրում շոուբիզնեսյան այդ փառքից, բայց ժամանակին շատ էի սիրում: Ոչ թե որ չստացվեց, դրա համար, այստեղ չստացվելու կամ ստացվելու խնդիրը չէ, որովհետեւ շատ բաներ ինձ մոտ ստացվել է: Ուղղակի մորս մահից հետո ամեն ինչ կտրվեց: Ես ուրիշ կյանքով էի ապրում, բայց դրանից հետո հասկացա, որ իզուր էի ապրում այդպես: Վայրկենական է կյանքը կանգ առնում, ու մարդը չի հասկանում` ինքն ուր էր գնում ու ինչի համար էր գնում եւ ուր հասավ: Ես երգիչ եմ, կարող եմ աշխատել ռեստորաններում ու իմ երգով ընտանիքս պահել: Իսկ հետո չգիտեմ, թե Աստված ինչ ճանապարհներ կհարթի ինձ համար: Փառք Աստծո, որ այդ շնորհքը ունեմ եւ կարող եմ այդ կերպ գումար աշխատել:

"ՀԱՆԴԻՍԱՏԵՍԻՍ ՔԱՆԱԿՆ ԱՀԱԳԻՆ ԿԿՐՃԱՏՎԻ"

-Իսկ մտածե՞լ եք, թե ի՞նչ կլինի Ձեր երկրպագուների հետ, երբ իմանան ձեր ոճափոխման մասին:
- Ես երգիչ եմ, ու ինձ պետք չէ երկրպագել: Երկրպագում են միայն Աստծուն, ինձ պետք չէ, ես դրանից չեմ շոյվում ու ուրախանում: Իմ այն հանդիսատեսը, որը իմ երգերին ծանոթ է ու սիրել է իմ ոճը, այսօր ես աշխատում եմ տարբեր ռեստորաններում, նրանք հաճախում են լսում են ինձ: Հասկանում եմ, հանդիսատեսիս քանակն ահագին կկրճատվի: Շատ քչերը կգնան ճիշտ ճանապարհով ու կլսեն հոգեւոր երգ, քչերը Աստծու խոսքը կհասկանան, շատ քչերը չեն կատարի իրենց մարմնի ու աչքերի ցանկությունները: Հիմա, որ ես սկսեմ հոգեւոր երգեր երգել, համոզված եմ` շատ քչերն են լսելու: Ճիշտ է, կարող է մի մասը լսեն, բայց` կշրջվեն ու կգնան, որովհետեւ այն իրենց կհոգնեցնի, իրենք հաճույքին կտրվեն, կուզենան միշտ ուրախ ժամանց անցկացնել:

""ՅԱՐԵՐԻ" ԵՐԳԱՑԱՆԿԸ ՉԻ ՕԳՆՈՒՄ ՄԱՐԴԿԱՆՑ`
ՀՈԳԵՊԵՍ ԿԱՅԱՆԱԼՈՒ ՀԱՄԱՐ"

-Իսկ նոր երգերը ե՞րբ հասանելի կլինեն հանրությանը:
- Հոգեւոր մի երգ ունեմ, մորս գրած երգն է, կոչվում է "Ներիր", այն աշխարհիկ ոչ մի բանի հետ կապ չունի: Իմ նախկին ոճի երգերից էլի կերգեմ` զուտ իմ աշխատանքի համար, որովհետեւ պիտի ընտանիք պահեմ: Բայց ոչ թե "յարս" կամ "մարալս", այլ ավելի ուսուցանող թեմա կընտրեմ, որ գոնե ինչ-որ բանով օգուտ տամ հանրությանը: Որովհետեւ "յարերի" երգացանկը, որ բոլոր երգիչներս երգել ենք արդեն մեր դառը, կծու յարերի մասին, չի օգնում մարդկանց` հոգեպես կայանալու համար: Հակառակը` մարդիկ այդ երգերի տակ խմում են, անջատվում: Բայց երբ ուսուցողական երգ լինի, կհասկանան, որ իրենց ինչ-որ դեղ ու դարման եղավ: Իսկ "Ներիրը" պատրաստ է, բայց այդ երգը չեմ կարող երգել ոչ մի ակումբում կամ ռեստորանում, քանի որ դա լրիվ ապաշխարության մասին շատ գեղեցիկ, սիրով լցված երգ է: Իսկ ռեստորաններում կամ ակումբներում ալկոհոլի ազդեցության տակ, չեմ կարծում, որ ապաշխարության երգ պիտի երգես, նրանց համար ովքեր նստած են ծխախոտով ու խմիչքի բաժակներով:

"... ՄՅՈՒՍ ԵՐԳԱՑԱՆԿՍ` ԿՈՒԶԵԻ ԴԱ ԷԼ ՎԵՐԱՆԱՐ ԻՄ ԿՅԱՆՔԻՑ"

-Իսկ մայրիկի գրած երգերից շա՞տ կա, որ դեռ չեն հրապարակվել:
- Մի քանի աշխարհիկ երգեր կան, որ դեռ չեմ երգել, իսկ հոգեւոր երգերից էլ` մոտ 4-ը: Ուզում եմ ուրիշ ստեղծագործողներից էլ հոգեւոր երգեր երգել, կամ էլ` հոգեւոր երգարաններից երգեր կընտրեմ: Ինձ համար ավելի շատ դա է կարեւոր` ես դրա կարիքն եմ զգում: Իսկ մյուս երգացանկս, որով գումար եմ աշխատում, կուզեի որ դա էլ վերանար իմ կյանքից, բայց քանի որ հիմա ընտանիք պահելու ուրիշ միջոց չունեմ ստիպված եմ աշխատում:
- Հնարավո՞ր է որ մի օր էլ ակումբում երգելու փոխարեն` ժամերգությանը երգեք:
- Եկեղեցում չեմ կարող երգել ու գումար աշխատել, դա ճիշտ չի լինի: Եկեղեցուն պիտի անվճար ծառայես, որ շատ աղքատներ այնտեղից օգտվեն:

ԼԻԼԻԹ ԵՂԻԱԶԱՐՅԱՆ