ՍԿՍՎՈՒՄ Է ՏՆՏԵՍԱԿԱՆ ՔԱՂԱՔԱԿԱՆՈՒԹՅԱՆ ՆՈՐ ԺԱՄԱՆԱԿԱՇՐՋԱՆ

ՍԿՍՎՈՒՄ Է ՏՆՏԵՍԱԿԱՆ ՔԱՂԱՔԱԿԱՆՈՒԹՅԱՆ ՆՈՐ ԺԱՄԱՆԱԿԱՇՐՋԱՆ

Հաջորդ տարվա  հունվարի 1-ից  գործողության մեջ է մտնում Եվրասիական տնտեսական միությանը Հայաստանի անդամակցության պայմանագիրը, բնականաբար Հայաստանի համար սկսվում է տնտեսական քաղաքականության նոր ժամանակաշրջան: Երեք ամսից էլ քիչ ժամանակ անց Հայաստանի համար բացվում է 175 միլիոնանոց բնակչություն ունեցող երկրների հետ  պայմանագրային, անարգելք, հավասար պայմաններով  հաղորդակցվելու հնարավորություն:
Մինչ այդ, գործադիր մարմինն ինտենսիվ աշխատանքներ է իրականացնում ԵՏՄ անդամակցության շրջանակներում Հայաստանի տնտեսության զարգացմանն ուղղված քայլերի վերջնական ճշգրտման ուղղությամբ: Օրերս վարչապետ Հովիկ Աբրահամյանը խորհրդակցություն է անցկացրել Եվրասիական տնտեսական միությանը Հայաստանի միանալու ուղղությամբ կատարվող աշխատանքների վերաբերյալ: Ըստ ոլորտների կազմված աշխատանքային խմբերի` ղեկավարները զեկուցել են ԵՏՄ-ին ՀՀ-ի անդամակցության "ճանապարհային քարտեզով" նախատեսված միջոցառումների կատարման ընթացքի եւ առաջիկա քայլերի վերաբերյալ: Վարչապետը հանձնարարել է պատկան գերատեսչությունների ղեկավարներին` աշխատանքներն իրականացնել` բացառելով որեւէ շեղում սահմանված ժամանակացույցից եւ սեղմ ժամկետում ներկայացնել հաշվետվություն:
Այս ուղղությամբ արված աշխատանքները պատկան գերատեսչությունների կողմից  ամփոփմանը զուգընթաց` դիտարկենք  այսօրվա իրավիճակի կարեւորագույն հարցերը:  Անշուշտ, ավանդաբար այդ երկրներում Հայաստանը ինչ-որ ապրանքատեսակներով ներկայացվել է, սակայն  հունվարի 1-ից  մեկնարկող որակական նոր մակարդակի  իրավահարաբերությունների պայմաններում կառավարության կարեւորագույն խնդիրներից է` մեծացնել այդ ապրանքատեսակների քանակը, ցանկը,  բանակցել շահեկան կամ համարժեք սակագների ամրագրումը` ներկրվող եւ արտահանվող ապրանքներ փոխադրող տրանսպորտային միջոցների եւ տարատեսակ այլ հարցերի շուրջ:
Նախ պետք է կառավարությունը` նախարարությունները, հստակեցնեն այդ հզոր շուկայում   ներկայացվելիք Հայաստանի մրցունակ արտադրանքը, կառավարությունն իր ողջ արսենալով պետք է օժանդակի երկրի արտահանողներին` (կառավարության օժանդակության պատրաստակամության մասին արդեն հայտարարություն եղել է) արտահանման  ծավալները մեծացնելու ուղղությամբ, որպեսզի կազմակերպություններն իրենց արտադրանքը ոչ միայն ՌԴ, այլ Բելառուս, Ղազախստան արտահանեն:
Հիշեցնենք, որ կառավարությունը հոկտեմբերի 2-ի նիստում  հաստատել է  ԵՏՄ պայմանագրի հավելվածով սահմանված ապրանքների ցանկը, որոնց հանդեպ, ի դեպ, Հայաստանի կողմից անցումային շրջանում կիրառվելու են ԵՏՄ-ի միասնական մաքսային սակագներից տարբերվող ներմուծման այլ մաքսատուրքեր:  
Ի դեպ, ըստ պայմանավորվածության, ԵՏՄ-ում ֆիքսված չեն դրույքաչափերը, ցանկացած երկիր կարող է հարց բարձրացնել ցանկացած պահի այդ դրույքաչափերն իջեցնելու համար:  
Մեկ այլ միջոցառում եւս նախատեսված է.  այլ երկրի տարածքով անցնելիս`  ռիսկեր կան, որ մեր ապրանքներին կավելանա այլ երկրի ապրանք, ուստի մեր պայմանագրում նախատեսված է, որ հատուկ նույնականացման պիտակ են ունենալու եւ որեւէ մաքսային ձեւակերպում չեն անցնելու:

ԱՐՏԱԿ ԳԱՍՊԱՐՅԱՆ