ԶԱՐՈՒՀԻ ՓՈՍՏԱՆՋՅԱՆ. "ԱՎՏՈՐԻՏԱՐ ՀԱՄԱԿԱՐԳԻ ՃԱՐՏԱՐԱՊԵՏՆԵՐԻՑ ՄԵԿԸ ԼԵՎՈՆ ՏԵՐ-ՊԵՏՐՈՍՅԱՆՆ Է"

ԶԱՐՈՒՀԻ ՓՈՍՏԱՆՋՅԱՆ. "ԱՎՏՈՐԻՏԱՐ ՀԱՄԱԿԱՐԳԻ
ՃԱՐՏԱՐԱՊԵՏՆԵՐԻՑ ՄԵԿԸ ԼԵՎՈՆ ՏԵՐ-ՊԵՏՐՈՍՅԱՆՆ Է"

Ինչպես հայտնի է, "Ժառանգություն" խմբակցության պատգամավոր Զարուհի Փոստանջյանն օրեր առաջ հրապարակել էր այն քայլերը, որոնք պետք է իրականացնեն ՀԱԿ-ն ու ԲՀԿ-ն: Դրանց հրապարակումից հետո "Ժառանգության" փոխնախագահ Արմեն Մարտիրոսյանը, "Ժառանգություն" խմբակցության ղեկավար Ռուբեն Հակոբյանն "Իրավունքի" հետ զրույցում հայտարարեցին, որ ՀԱԿ-ին ու ԲՀԿ-ին առաջարկված պայմանները Զարուհի Փոստանջյանի անձնական տեսակետներն են: "Զ. Փոստանջյանը շատ պարզ ասել է, որ արտահայտում է իր անձնական տեսակետը, որը կուսակցության վարչությունը չի քննարկել: Եթե դրանք ներկայացնի, վարչությունը կքննարկի, մենք էլ կասենք մեր դիրքորոշումը",- հայտարարել էր Ռուբեն Հակոբյանը:
Արդյոք Զարուհի Փոստանջյանի ներկայացրած առաջարկներն ընդունել է "Ժառանգությունը", թե ոչ` այս եւ այլ հարցերի պատասխանները պարզեցինք "Ժառանգություն" խմբակցության պատգամավոր Զարուհի Փոստանջյանի հետ զրույցում:
-Տիկին Փոստանջյան, "Ժառանգությունն" ընդունե՞ց ՀԱԿ-ին ու ԲՀԿ-ին ուղղված Ձեր առաջարկները:
- Մենք դեռ չենք քննարկել: Այդ առաջարկները ներկայացված են բոլորին:
- Ձեր վերջին ասուլիսի ժամանակ հայտարարել էիք, որ 1995-ի Սահմանադրությունն ավտորիտար բնույթ ունի եւ ընդունվել է կեղծիքներով ու պարտադրմամբ: Եթե հիմք ընդունեք Ձեր այս հայտարարությունը, սրան գումարենք նաեւ այն, որ թե՛ մամուլի, թե՛ տարբեր քաղաքական գործիչների կողմից խոսվել է 1990-ականներին կատարված թալանի մասին, ինչո՞ւ ՀԱԿ-ից ու ԲՀԿ-ից չեք պահանջել, որ բացի ՀՀ երկրորդ եւ երրորդ նախագահներից` նաեւ առաջին նախագահ Լեւոն Տեր-Պետրոսյանին հանցագործ ճանաչեն:
- Իր օրն էլ է գալու:
- Բայց ինչո՞ւ Ձեր կողմից ներկայացված առաջարկներում այդ կետը չեք ներառել:
- Եթե այս խումբը (նկատի ունի "եռյակին"-խմբ.) ցանկություն ունի իրոք համակարգային փոփոխություն անել, պետք է անդրադարձ կատարի նաեւ այս հանգամանքներին: Իսկ հետո, երբ մենք անցնելու ենք անցումային արդարադատության, իհարկե, 1995, 1996 թվականներին պետք է գնահատական տալ: Դա մեր պատմության մի մասն է, որը դեռ գնահատականի ու դատապարտման չի արժանացել: Միանշանակ, արմատներն այդտեղից են գալիս: Որեւէ խնդիր չկա` ինչ-որ մի բան թաքցնելու կամ ինչ-որ մեկին խնայելու:
- Ուզում եմ հասկանալ` ինչո՞ւ Ձեր պահանջներում դա էլ չեք ներկայացրել:
- Որովհետեւ վիրահատական այս միջամտությունները բավական դժվար են: Եթե այս ուժը (նկատի ունի "եռյակին"-խմբ.) անջատ է Սերժ Սարգսյանից, առաջնային գործընթացը սա պետք է լինի: Ես առաջնային քայլեր եմ ներկայացրել:
- Բազմիցս է հայտարարվել, եւ Դուք էլ այդ կարծիքին համամիտ եք, որ ԲՀԿ-ն Ռոբերտ Քոչարյանի հենարան համարվող կուսակցությունն է: Այս ամենը հաշվի առնելով` արդյո՞ք ԲՀԿ-ն կընդունի Ձեր պահանջը այն մասին, որ Քոչարյանին պետք է ճանաչել հանցագործ ու օրինախախտ:
- Ես չգիտեմ, դա իրենց ուղղեք: Դա իրենց մեկնաբանության տիրույթում է:
- Տիկին Փոստանջյան, ՀԱԿ-ի ու ԲՀԿ-ի ներկայացուցիչները հրաժարվում են Ձեր հայտարարությունները մեկնաբանելուց: Միգուցե, Ձեզ ու Ձեր հայտարարություններին լուրջ չե՞ն վերաբերվում ձեր գործընկերները:
- Այո, այդպես լինում է, երբ դու երիտասարդ ես լինում: Իմ կյանքում ու աշխատանքային գործունեության ժամանակ սկզբից լուրջ չեն վերաբերվում, սկսում են ծաղրել, վարկաբեկել: Հետագայում, երբ իրենց կողմից այդ ամենը լրջություն է ստանում, դիմում են այլ միջոցների: Այդպես-այդպես գնում է, եւ դու հաղթում ես: Մի օր գալու է, որ մեկնաբանելու են:
Որովհետեւ դրանք քաղաքական հարցադրումներ են եւ պահանջված են հանրության կողմից: Եթե նրանք ցանկանում են հանրության հետ լինել դաշնակից, այլ ոչ թե հակառակորդ, պետք է մեկնաբանեն:
- Ի՞նչ ակնկալիք ունեք հոկտեմբերի 24-ի հանրահավաքից:
- Ցանկությունս է տեսնել միացյալ հրապարակ ու հարթակ, որը հաղորդակից է հանրությանը: Թող դա լինի մեր միացյալ դիրքորոշումը, որպեսզի մենք հասնենք իրոք համակարգային փոփոխությունների, ոչ թե անձերի կամ խմբերի փոփոխության:
- Մասնակցելո՞ւ եք հանրահավաքին:
- Այս պահի դրությամբ որոշում չունեմ:
- Դուք եւս Ձեր կուսակցության ղեկավարի նման հայտարարել էիք, որ "եռյակը" միասնական օրակարգ պետք է ունենա: ԲՀԿ պատգամավոր Միքայել Մելքումյանը, օրինակ, հայտարարել էր, որ "եռյակը" միասնական օրակարգ ունի: Չե՞ք կարծում, որ "եռյակից" սպասումներ ունեցողները տարակուսանքի մեջ են հայտնվում. հիմա հավատալ Ձե՞զ, թե՞ ԲՀԿ պատգամավորին:
- Առայժմ "եռյակի" կողմից միասնական օրակարգ հրապարակված չէ: Միասնական քայլերի վերաբերյալ որոշում չկա: Ինչ վերաբերում է հանրության հավատին, հանրությունը թող հավատա նրան, ով կհրապարակի "եռյակի" օրակարգը:
- Ի՞նչը կարող է ստիպել "Ժառանգությանը"` լքել "եռյակը":
- "Եռյակից" դուրս գալու խնդիր չունենք: Սա խորհրդարանական ձեւաչափով փոքր համագործակցություն է: Եթե որեւէ խնդիր լինի, կարծում եմ, իրենք (նկատի ունի ՀԱԿ-ին ու ԲՀԿ-ին-խմբ.) կլքեն: Մեր կողմից առաջ քաշվող համակարգային փոփոխություններին իրենք են միացել: "Եռյակի" ուժերը տարիներ շարունակ եղել են իշխանության մեջ, դուք տեսել եք ինչպիսի վարքագիծ են նրանք դրսեւորել: Տարիներ շարունակ նրանք համամիտ են եղել գործող համակարգին: Այս արատավոր համակարգը ստեղծվեց 1990-ականներին: Երբ 2007-ի սեպտեմբերի 21-ին Լեւոն Տեր-Պետրոսյանը որոշեց նորից վերադառնալ ակտիվ քաղաքականություն, այդ ժամանակ նա հայտարարեց, որ իր միակ մեղավորությունը Սերժ Սարգսյանին ու Ռոբերտ Քոչարյանին իշխանության բերելն է: Բայց ես չեմ կարծում, որ դա իր միակ մեղքն է: Ընդհանուր առմամբ, այս ավտորիտար համակարգի ճարտարապետներից մեկը նաեւ Լեւոն Տեր-Պետրոսյանն է: 1995-ի Սահմանադրությունը, 1996-ի ընտրությունները դրա վկայությունն են: Արցախի հարցում եւս մենք ունենք հակադարձ տրամադրություններ: Եթե ցանկանում ենք ունենալ իրոք ժողովրդական շարժում, դրա մեջ պետք է ներգրավված լինեն բոլոր նրանք, ովքեր համամիտ չեն գործող համակարգի հետ:

ՍՈՆԱ ԴԱՎԹՅԱՆ