ԱԺ ԱՄԲԻՈՆԸ ՄԻ ՕԳՏԱԳՈՐԾԵՔ ԿՈՆՉԻՏԱՆԵՐԻՆ ԳՈՎԵՐԳԵԼՈՒ ՀԱՄԱՐ. ՎԱՀՐԱՄ ԲԱՂԴԱՍԱՐՅԱՆ

ԱԺ ԱՄԲԻՈՆԸ ՄԻ ՕԳՏԱԳՈՐԾԵՔ ԿՈՆՉԻՏԱՆԵՐԻՆ

ԳՈՎԵՐԳԵԼՈՒ ՀԱՄԱՐ. ՎԱՀՐԱՄ ԲԱՂԴԱՍԱՐՅԱՆ

Այսօր ՀՀԿ խմբակցության ղեկավար Վահրամ Բաղդասարյանն իր ելույթում անդրադարձավ երեկ   ԱԺ ամբիոնից հնչած մի քանի ելույթների` դրանք որակելով  պետական դավաճանություն:

Վահրամ Բաղդասարյանն առանձնահատուկ անդրադարձավ  ՀԱԿ խմբակցության պատգամավոր Նիկոլ Փաշինյանի ու  «Ժառանգություն» խմբակցության պատգամավոր Զարուհի Փոստանջյանի ելույթներին: «Մենք երեկ ականատես եղանք   պետական դավաճանության դասական օրինակի:  ԱԺ ամբիոնն օգտագործվեց  Ադրբեջանին ու Թուրքիային ապատեղեկատվություն ստանալու համար»,- ասաց պրն Բաղդասարյանը:

ՀՀԿ խմբակցության ղեկավարի խոսքով` երեկվա ելույթներից նավթադոլարների հոտ էր փչում. «Բայց կարծես թե ֆինանսավորման աղբյուրը փոխվել է»:

Դահլիճից  ՀՀԿ խմբակցության ղեկավարի ելույթին արձագանքեց  եւ իր անհամաձայնությունը հայտնեց ՀԱԿ խմբակցության պատգամավոր Նիկոլ Փաշինյանը. «Ձեր ելույթից է նավթադոլարների հոտ փչում»:

ԱԺ նախագահ Գալուստ Սահակյանն էլ դիտողություն արեց պատգամավորին` ասելով. «Երբ ԱԺ նախագահ կլինենք, կընդհատեք»:

«Շատ ուրախ եմ, որ որոշ մարդիկ իրենց վրա են վերցնում, նշանակում է ասածներիս մեջ ճշմարտություն կա: Ես անուն չտվեցի, մտորում ու կարծիքներ եմ ասում»,-  արձագանքեց ՀՀԿ խմբակցության ղեկավարը:

Վահրամ Բաղդասարյանի խոսքն ընդհատեց նաեւ «Ժառանգություն» խմբակցության պատգամավոր Զարուհի Փոստանջյանը, որը հարուցեց ՀՀԿ խմբակցության ղեկավարի զայրույթը: Վերջինս դիմեց ԱԺ նախագահին եւ խնդրեց կարգի հրավիրել անկարգներին ու դուրս հրավիրել դահլիճից:

Անդրադառնալով ՄԻՊ-ի զեկույցին`  Վահրամ Բաղդասարյանը կոչ արեց  ՄԻՊ Կարեն Անդրեասյանին ասաց, որ իր  անկախությունն ու կայացումը հաստատելու համար  չմեղադրել պատգամավորներին  ու հանձնարարականներ տալ: «Մի օգտագործեք հայոց ամբիոնը չօգտագործել կոնչիտաներին գովերգելու համար»,- եզրափակեց  ՀՀԿ խմբակցության ղեկավարը:

Սոնա Դավթյան