ՄԻԵԴ-Ի ԴԱՏԱՎՈՐԻ ԹԵԿՆԱԾՈՒՆ ԻՆՔՆԱԲԱՑԱՐԿԻ ԴԻՄՈՒՄ ՉԻ ՆԵՐԿԱՅԱՑՆԵԼՈՒ

ՄԻԵԴ-Ի ԴԱՏԱՎՈՐԻ ԹԵԿՆԱԾՈՒՆ ԻՆՔՆԱԲԱՑԱՐԿԻ ԴԻՄՈՒՄ ՉԻ ՆԵՐԿԱՅԱՑՆԵԼՈՒ

Օրեր առաջ  Սերժ Սարգսյանը այսօր ստորագրած հրամանագրով հաստատել է Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրության մրցույթում հաղթող ճանաչվածների ցուցակը: Տվյալ  մրցույթում հաղթող են ճանաչվել Արմեն Շուրայի Հարությունյանը, Արայիկ Գառնիկի Ղազարյանը և Նելիկ Նիկողոսի Հարությունյանը:

Սակայն մինչ հրամանագրի ստորագրումը,   «Իրավունքի Եվրոպա» ՀԿ-ի իրավաբանները  բարձրաձայնել էին  ՄԻԵԴ-ի  Հայաստանի դատավորի մրցույթի փաստաթղթերում առկա բազմաթիվ խախտումների մասին եւ կոչ արել 3 թեկնածուներին ինքնաբացարկ հայտարարել: «Իրավունքի» հետ զրույցում Արա Ղազարյանը վերոնշյալ ՀԿ-ի   հայտարարություններին, ասաց, որ մանրամասն  դրանց չի ծանոթացել: Բայց կոնկրետ իր հանդեպ որեւէ խախտում չի եղել:  «Այն, որ Արմեն Հարությունյանի փոստային ծրարը տեղամասային փոստային բաժանմունք մուտք է գործել փաստաթղթերի վերջնաժամկետ հայտարարված սեպտեմբերի 24-ի` ժամը 18:00-ից ուշ՝ 18:45 րոպեին, դա էական շեղում չէ արդարության ընդհանուր սկզբունքից »,- ասաց  ՄԻԵԴ-ի դատավորի թեկնածուն:

Ինչ վերաբերում է  օրինախախտ 3 թեկնածուներին ուղղված  ինքնաբացարկ ներկայացնելու ՀԿ-ի հորդորին, Արա Ղազարյանն ասաց, որ չի պատրաստվում   ինքնաբացարկի դիմում ներկայացնել: «Եթե լիներ էական խախտումներ, որոնք ազդած լինեին արդարության ընդհանուր սկզբունքի վրա,  ուրիշ բան: Ես  էական խախտումներ չեմ տեսնում»,-եզրափակեց Ա. Ղազարյանը:

Սոնա Դավթյան