«ԹԱՏԵՐԱԿԱՆ ԼՈՌԻ» ՓԱՌԱՏՈՆԸ ԴԱՐՁԵԼ Է ԱԼԱՎԵՐԴՈՒ ԱՅՑԵՔԱՐՏԸ

«ԹԱՏԵՐԱԿԱՆ ԼՈՌԻ» ՓԱՌԱՏՈՆԸ ԴԱՐՁԵԼ Է ԱԼԱՎԵՐԴՈՒ ԱՅՑԵՔԱՐՏԸ

Հոկտեմբերի 15-ին ՀՀ Լոռու մարզի Ալավերդի քաղաքում ՀՀ մշակույթի նախարարի հովանու ներքո մեկնարկեց  «Թատերական Լոռի» 22-րդ միջազգային փառատոնը`նվիրված Սոս Սարգսյանի 85-ամյակին: Փառատոնի բացման հանդիսավոր մեկնարակին ներկա էին նաեւ Լոռու մարզի մարզպետը, Ալավեդու քաղաքապետը, քաղաքական  գործիչներ եւ մտավորականներ: Ողջունելով փառատոնի հյուրերին եւ մասնակիցներին ՀՀ մշակույթի նախարար Հասմիկ Պողոսյանը փաստեց. «Այսօր եկել ենք հերթական 22-րդ փառատոնին, ինձ համար  հուզիչ պահ է, քանի որ փառատոնը նվիրված է Սոս Սարգսյանի հիշատակին: Այստեղ ուզում եմ մեջբերել Հրանտ Մաթեւոսյանի հետեյալ խոսքերը.«Ես իմ գրականությամբ աշխարհին Հայաստանի տեղն եմ ցույց տալիս», կարծում եմ «Թատերական Լոռի» փառատոնը շարունակելով այս ավանդույթները` դառնալով միջազգային այդ ձեւաչափով աշխարհին ցույց է տալիս թատերական Հայաստանը եւ այդ ամենը անում է շատ արժանապատիվ ու բարձր մակարդակով»:

Փառատոնում մեծ ներդրումներ ունեցած եւ փառատոնով միշտ ոգեւորվող Լոռու մարզպետ Արթուր Նալբանդյանը հավաստիացրեց, որ «Թատերական Լոռի» փառատոնը դարձել է Ալավեդու այցեքարտը  եւ բոլորը պարտավոր են  այն պահել, պահպանել եւ փոխանցել  մեր եկող սերունդներին.«Ի ուրախություն մեզ, արդեն 22-րդ անգամ պղնձագործների մեր քաղաքում անցկացվում է փառատոնը: Ես վստահ եմ , որ փառատոնը դեռ կանցկացվի, քանի որ խորը արմատներ ունի հատկապես Ալավերդի քաղաքում, քանի որ մեծ եւ փոքր հատկապես այս օրերին խոսում են փառատոնի մասին»,-նշեց ԱՐԹՈՒՐ ՆԱԼԲԱՆԴՅԱՆԸ:

«Թատերական Լոռի» փառատոնն անցել է կայացման եւ ինքնահաստատման շատ բարդ ճանապարհ, որը տարեցտարի ընդլայնել է իր աշխարհագրությունը`դառնալով ոչ միայն մեր քաղաքի, այլեւ մարզի մշակութային կյանքի անբաժան մասը: Հուսով եմ փառատոնի ժանրային բազմազանությունը կգոհացնի ամենաբծախնդիր հանդիսատեսին: Թատերական 10-օրյա հրավառությունը Ալավերդիում սկսված է»,-շնորհավորելով թատերասեր հանդիսատեսին ընդգշեց Ալավերդու քաղաքապետ ԱՐՏԱՎԱԶԴ ՎԱՐՈՍՅԱՆԸ:

«Թատերական Լոռին» այս տարի կանցկացվի ՀՀ Լոռու մարզի Ալավերդի, Ստեփանավան,Վանաձոր, Սպիտակ քաղաքներում: Փառատոնին Հայաստանից, Վրաստանից, Ռուսաստանից, կմասնակցեն 25 թատերախմբեր`3 տասնայկից ավելի բազմաժանր ներկայացումներով:

Նշենք, որ այս տարի փառատոնի ավանդական հատուկ մրցանակը շնորհվեց Լոռու մարզպետ Արթուր Նալբանդյանին:

Փառատոնը կանցկացվի  հոկտեմբերի 15-26-ը:

ԶՎԱՐԹ ԽԱՉԱՏՐԱՅՆ