ԹՈՒՐՔԱԳԵՏ. «ԵԹԵ ՀԱՆԿԱՐԾ ՄԻԵԴ-Ն ԱՐԴԱՐԱՑՆԻ ԹՈՒՐՔ ԳՈՐԾՉԻՆ…»

ԹՈՒՐՔԱԳԵՏ. «ԵԹԵ ՀԱՆԿԱՐԾ ՄԻԵԴ-Ն ԱՐԴԱՐԱՑՆԻ ԹՈՒՐՔ ԳՈՐԾՉԻՆ…»

Թուրքիայի աշխատավորական կուսակցության նախագահ Դողու Փերինչեքը 2005 թ-ին Շվեյցարիայի Լոզան քաղաքում հայտարարել էր, թե «Հայոց ցեղասպանության մասին պնդումները միջազգային հանրության կողմից տարածվող կեղծիքներ են»:

1995 թ-ին Շվեյցարիայում ուժի մեջ մտած հակառասիստական օրենքը կիրառվում է նաև Հայոց ցեղասպանության հերքման առնչությամբ, որի առաջին «զոհը» դարձավ Թուրքիայի Աշխատավորական կուսակցության նախագահ Դողու Փերինչեքը։ 2007 թ-ի մարտի 9-ին շվեյցարական դատարանը նրան մեղավոր ճանաչեց ռասայական խտրականության համար՝ 1915 թ-ի Հայոց ցեղասպանությունը հերքող նրա հրապարակային հայտարարությունների համար: Լոզանի դատարանը թուրք կուսակցապետի նկատմամբ սահմանեց 90-օրյա պայմանական ազատազրկում կամ դրան համարժեք տույժ, ինչպես նաև 3 հազար շվեյցարական ֆրանկի կամ 2500 դոլարի տուգանք: Փերինչեքը, վկայակոչելով խոսքի ազատությունը, դիմել էր ՄԻԵԴ, որն էլ այժմ բավարարել է նրա հայցը՝ համարելով, որ Շվեյցարիան խախտել է Մարդու իրավունքների եվրոպական կոնվենցիան:

Շվեյցարիան մտադիր է դիմել մարդու իրավունքների եվրոպական դատարան՝ Դողու Փերինչեքի գործը Մեծ պալատի կողմից վերանայելու պահանջով: «Իրավունքի» հետ զրույցում ԵՊՀ արևելագիտության ֆակուլտետի փոխդեկան, թուրքագետ Ռուբեն Մելքոնյանը ասաց, որ  Հայաստանը որպես երրորդ կողմ մասնակցում  է  այս դատավարությանը:  Թուրքագետին անհանգստացնում է այն, որ սկսվել է վտանգավոր դատական մի  գործընթաց: «Եթե  հանկարծ ՄԻԵԴ-ն արդարացնի Փերինչեքին եւ համարի, որ Հայոց ցեղասպանության  ժխտումը խոսքի ազատության շրջանակներում է, ցեղասպանության 100-ամյակին ընդառաջ Հայաստանը մեծ հարված կստանա»,- եզրափակեց թուրքագետը:

Սոնա Դավթյան