ՄԻԵԴ-Ի ԴԱՏԱՎՈՐԻ ՊԱՇՏՈՆԻ ՄՐՑՈՒՅԹԸ ՉԵՂՅԱ՞Լ ԿՀԱՄԱՐՎԻ

ՄԻԵԴ-Ի ԴԱՏԱՎՈՐԻ ՊԱՇՏՈՆԻ ՄՐՑՈՒՅԹԸ  ՉԵՂՅԱ՞Լ ԿՀԱՄԱՐՎԻ

Սերժ Սարգսյանը այսօր ստորագրած հրամանագրով հաստատել է Մարդու իրավունքների եվրոպական դատարանի դատավորի պաշտոնում Հայաստանի Հանրապետության կողմից առաջադրվող թեկնածուների ընտրության մրցույթում հաղթող ճանաչվածների ցուցակը: Տվյալ  մրցույթում հաղթող են ճանաչվել Արմեն Շուրայի Հարությունյանը, Արայիկ Գառնիկի Ղազարյանը և Նելիկ Նիկողոսի Հարությունյանը: «Իրավունքն» այսօր ՀՀ ԱԺ պետա-իրավական հարցերի մշտական հանձնաժողովի  անդամ, պատգամավոր Էդմոն Մարուքյանից  պարզեց  ՄԻԵԴ-ում  դատավորի պաշտոնին հավակնող թեկնածուն ինչ չափանիշներով է ընտրվում: Էդմոն Մարուքյանը դժվարացավ չափանիշների մասին խոսել, բայց ասաց, որ երեք թեկնածուներից յուրաքանչյուրն էլ  կարող է զբաղեցնել ՄԻԵԴ-ում Հայաստանի դատավորի աթոռը:

Մարուքյանը հիշեցրեց. ՄԻԵԴ-ում  դատավորին ընտրում են ԵԽԽՎ-ի պատգամավորները: Թե նրանք ում կընտրեն, ցույց կտա ժամանակը:  «Հայաստանից ներկայացված երեք թեկնածուներն էլ  փորձառու, արժանի մարդիկ են, որոնց հետ  առիթ եմ ունեցել մասնագիտական առումով շփվելու»- ասաց պատգամավորը:

Էդմոն Մարուքյանից պարզեցինք ում  կցանկանար տեսնել ՄԻԵԴ-ի դատավորի պաշտոնում: «Ես երաշխավորագիր եմ ներկայացրել  Արայիկ Ղազարյանի համար այդ մրցույթում մասնակցելու: Կարծում եմ` սրանով ամեն ինչ ասված է»:

Մարուքյանը հիշեցրեց, որ մրցույթի ընթացքում եղել են որոշ խախտումներ, որոնց մասին  ինքը տեղեկացել է լրատվամիջոցներից: «Չի բացառվում, որ թեկնածությունները հետ ուղարկվեն, նորից  մրցույթ հայտարարվի, եթե ապացուցվեն, որ խախտումների մասին  հայտարարություններն իրականությանը համապատասխանում են»,- եզրափակեց  պատգամավորը:

Սոնա Դավթյան