ՀՀ նախագահի դիրքորոշումը հայտնի կլինի 2015–ի փետրվար-մարտին. մամուլի խոսնակ

Սահմանադրական բարեփոխումների հայեցակարգի մասին ՀՀ նախագահի վերջնական դիրքորոշումը, ըստ ամենայնի, հայտնի կլինի 2015–ի փետրվար-մարտ ամիսների ընթացքում: Այս մասին Tert.am-ին հայտնել է ՀՀ նախագահի մամուլի խոսնակ Արման Սաղաթելյանը:

Հարցին, թե սահմանադրական բարեփոխումների հայեցակարգի վերաբերյալ որոնք են լինելու գործընթացի հետագա քայլերը, Սաղաթելյանը պատասխանել է.

«ՀՀ նախագահի աշխատակազմը ստացել է Սահմանադրական բարեփոխումների հայեցակարգը: Սահմանադրական բարեփոխումների հանձնաժողովի ստեղծումից մինչ օրս կատարվել է մեծածավալ ու հիմնարար աշխատանք, ինչի համար Հանրապետության նախագահն իր շնորհակալությունն է հայտնել հանձնաժողովին: Նախագահը բարձր է գնահատում նաեւ հայեցակարգի նախագծի հանրային քննարկումները կազմակերպելու եւ անցկացնելու կապակցությամբ հանձնաժողովի ձեռնարկած ջանքերը:

Մենք շնորհակալ ենք նաեւ բոլոր այն հասարակական-քաղաքական գործիչներին ու կազմակերպություններին, տեղական ինքնակառավարման մարմիններին, մասնագիտական կառույցներին ու մասնագետներին, որոնք ակտիվ եւ արդյունավետ մասնակցություն են ունեցել կարեւորագույն այս գործընթացին:

Այսօր մենք ունենք նաեւ Վենետիկի հանձնաժողովի դրական եզրակացությունը, ըստ որի՝ հայեցակարգը «հիմնված է Հայաստանի իրավիճակի համապարփակ իրավական վերլուծության վրա», իսկ «բարեփոխումների նպատակները արժանի են լիակատար աջակցության, քանի որ դրանք ամբողջովին ուղղված են Եվրոպայի խորհրդի արժեքների իրացմանը»: Վենետիկի հանձնաժողովը փաստել է, որ հայեցակարգում արտահայտված իրավական դիրքորոշումները համապատասխանում են իր ավանդական դիրքորոշումներին եւ հատուկ շեշտել, որ սահմանադրական հանձնաժողովի անդամերի հետ հանդիպումների ընթացքում Վենետիկի հանձնաժողովի զեկուցողների արտահայտած տեսակետները հաշվի են առնվել, իսկ հայեցակարգի նախագիծը բարեփոխումների հնարավորություն է ընձեռում, որը չպետք է բացթողնել:

Ինչ վերաբերում է հետագա քայլերին, ապա դրանք կանխորոշված են ՀՀ նախագահի 2013թ. սեպտեմերի 4-ի հրամանագրով: Հանրապետության նախագահը լուծելու է հայեցակարգին հավանություն տալու կամ այն մերժելու հարցը: Ընդ որում, դրա համար որոշակի ժամկետներ սահմանված չեն:

Միեւնույն ժամանակ, նկատի ունենալով, որ հայեցակարգում արծարծված որոշ հիմնահարցեր ունեն ընդգծված քաղաքական բաղադրիչ, դրանց կապակցությամբ ակնկալվում են լրացուցիչ քաղաքական քննարկումներ եւ քաղաքական ավելի մեծ կոնսոլիդացիա: Ուստի, հայեցակարգի վերաբերյալ ՀՀ նախագահի վերջնական դիրքորոշումը, ըստ ամենայնի, հայտնի կլինի 2015 թվականի փետրվար-մարտ ամիսների ընթացքում: