ՀԱՅԱՍՏԱՆԸ ԵՎ ԲԵԼԱՌՈՒՍԸ ԿՀԱՄԱԳՈՐԾԱԿՑԵՆ ՄՇԱԿՈՒՅԹԻ ԲՈԼՈՐ ՈԼՈՐՏՆԵՐՈՒՄ

ՀԱՅԱՍՏԱՆԸ  ԵՎ ԲԵԼԱՌՈՒՍԸ ԿՀԱՄԱԳՈՐԾԱԿՑԵՆ ՄՇԱԿՈՒՅԹԻ ԲՈԼՈՐ ՈԼՈՐՏՆԵՐՈՒՄ

ՀՀ մշակույթի  եւ Բելառուսի Հանրապետության  մշակույթի նախարարությունների միջեւ ստորագրվեց  «2014-2017 թթ. Մշակութային համագործակցության մասին» ծրագիր: Համաձայնագիրը ստորագրեցին ՀՀ մշակույթի նախարար ՀԱՍՄԻԿ ՊՈՂՈՍՅԱՆԸ եւ Բելառուսի մշակույթի նախարար ԲՈՐԻՍ ՍՎԵՏԼՈՎԸ:

Ստորագրված ծրագրի 12 կետերը վերեբերվում են մշակույթի բոլոր ոլորտներին: Ըստ ծրագրի` երկու կողմերը բարենպաստ պայմաններ կստեղծեն կինեմատոգրաֆիայի, գրադարանային եւ թանգարանային գործի, երաժշտարվեստի, թատերարվեստի, ժամանակակից արվեստի բնագավառում համագործակցության զարգացման համար, ինչպես նաեւ կխրախուսեն եւ կաջակցեն Հայաստանի եւ Բելառուսի երիտասարդ նկարիչների ցուցահանդեսների փոխանակմանը: Կփոխանակեն տեղեկատվություն պատմամշակութային ժառանգության հաշվառման, պահպանության, վերականգման, օգտագործման եւ տարածման ոլորտում:

ՀՀ մշակույթի նախարար Հասմիկ Պողոսյանը կարեւորելով համաձայնագրի ստորագրումը փաստեց.«Մշակութային ոլորտում  համագործակցությունը շատ կարեւոր է երկու երկրների համար: Ստորագրված համաձայնագիրը վերաբերվում է մշակութային բոլոր ոլորտներին: Բելառուսի հետ մեր նախկին համագործակցությունը ցույց է տվել, որ այն շատ արդյունավետ է»,-նշեց Հասմիկ Պողոսյանը:

Բելառուսի մշակույթի նախարարի խոսքով` Հայաստանի հետ մշակույթի ոլորտում  իրենց բարեկամական եւ գործնական հարաբերությունները ունեն երկար տարիների պատմություն.«Ուրախ եմ, որ այսօր գտնվում եմ Հայաստանում,Բելառուսում  ճանաչում եմ շատ հայ տաղանդավոր մարդկանց: Ստորագրված ծրագրի շրջանակներում մեր մշակութային համագործակցությունն էլ ավելի կսերտացնենք»,-ընդգծեց Բորիս Սվետլովը եւ ավելացրեց, որ Հայոց Ցեղասպանության 100-րդ տարելիցին ընդառաջ իրենք կկազմակերպօեն բազմաթիվ միջոցառումներ, կլինեն ցուցահանդեսներ, ֆիլմեր ցուցադրություններ եւ այդ  բոլորը Հայաստանում:

Ըստ ծրագրի կողմերը կխրախուսեն իրենց երկրների գրադարանների միջև ուղիղ կապերի հաստատումը. կնպաստեն Բելառուսի ազգային գրադարանի և Հայաստանի ազգային գրադարանի մասնագետների միջև անմիջական համագործակցության զարգացմանը և փորձի փոխանակմանը: Միջոցներ կձեռնարկեն երկու երկրների թանգարանների հավաքածուներից ցուցահանդեսներ կազմակերպելու համար, կխրախուսեն և կնպաստեն Բելառուսի և Հայաստանի երիտասարդ նկարիչների ցուցահանդեսների փոխանակմանը: Տեղեկատվություն կփոխանակեն պատմամշակութային ժառանգության հաշվառման, պահպանության, վերականգնման, օգտագործման և պրոպագանդման ոլորտում:
Բելառուսի մշակույթի նախարարության պատվիրակության այցի շրջանակներում Հայաստանում կանցկացվի նաեւ Բելառուսի մշակույթի օրեր: Բացման հանդիսավո արարողությոնը տեղի կունենա հոկտեմբերի 17-ին` Ալ. Սպենդիարյանի անվան ազգային օպերայի եւ բալետի ազգային ակադեմիական թատրոնում, որտեղ հանդես կգա Բելառուսի պարի պետական անսամբլը եւ «Չիստի գոլոս» վոկալ համույթը: Հովհ. Թումանյանի թանգարանում կբացվի նաեւ Բելառուսի  ժամանակակից արվեստի կենտրոնի գրաֆիկայի լուսանկարչական ցուցահանդեսը: Հոկտեմբերի 18-ին ստեղծագործական պատվիրակությունը (Բելառուսի պարի պետական անսամբլը և «Չիստի Գոլոս» վոկալ համույթը) ելույթ կունենա Վանաձորի Հովհ. Աբելյանի անվան պետական դրամատիկական թատրոնում:
Այցի ընթացքում նախատեսվում է բելառուսական պատվիրակության այցը Հայոց ցեղասպանության զոհերի հուշահամալիր, Մ. Մաշտոցի անվան հնագույն ձեռագրերի ինստիտուտ «Մատենադարան», «Զվարթնոց» և «Գառնի» պատմա-մշակութային արգելոց թանգարաններ, ինչպես նաև Գեղարդի վանական համալիր և տեսարժան այլ վայրեր:

ԶՎԱՐԹ ԽԱՉԱՏՐՅԱՆ