ՍՈՎՈՐԵՑՐԵ՛Ք ԵՐԵԽԱՆԵՐԻՆ ՆԱԽԱՃԱՇԵԼ

ՍՈՎՈՐԵՑՐԵ՛Ք ԵՐԵԽԱՆԵՐԻՆ ՆԱԽԱՃԱՇԵԼ

- Աղջիկս այս տարի 2-րդ դասարան տեղափոխվեց: Նա շատ կամակոր է ուտելու հարցում: Նա կտրկանապես հրաժարվում է նախաճաշից, դպրոց է գնում քաղցած, ինչն անցանկալի է: Հրաժարվում է նույնիսկ իր սիրելի ուտեստներից: Ինչպե՞ս ստիպել նրան նախաճաշել:
Մարիամ, տնային տնտեսուհի
Հարցին պատասխանել է ՀՀ ԱՆ Ֆիզիկական բժշկության եւ կուրորտաբանության ԳՀԻ
սննդաբան, գաստրոէնտերոլոգ  
ՎԱՐԴԱՆՈՒՇ ՊԵՏՐՈՍՅԱՆԸ.
-Գուցե ոմանք զարմանան, բայց առողջ սնունդը ոչ միայն երեխայի առողջության գրվական է, այլեւ` սերտորեն փոխկապակցված է առաջադիմություն հետ: Որքան ճիշտ է սնվում երեխան, այնքան բարձր են նրա մտավոր առաջադիմության ցուցանիշները: Երեխայի ճիշտ կամ սխալ սնունդ ասելով հասկանում ենք` քանակական, ու որակական հատկանիշները` սննդի թարմությունն ու անվտանգությունը, առողջարար բաղադրիչները, ինչպես նաեւ ճիշտ ժամերին մատուցման փաստը:
Սկսենք նախաճաշից, որը, ըստ էության, ամենամտահոգիչն է սննդաբանների համար, քանի որ դրան ամենաքիչն են ուշադրություն դարձնում ծնողները, իսկ իրականում հենց դա է օրվա սննդի կարեւորագույն մասը, որն ապահովում է ուղեղի բջիջների լավ աշխատանքը:
Ի՞նչ ուտել նախաճաշին
Աշխատեք երեկոյան նախապատրասել նախաճաշը, որպեսզի առավոտյան շատ ժամանակ չծախսեք: Խորհուրդ է տրվում առավոտյան երեխաներին տալ ցածր յուղայնութուն ունեցող կաթնամթերք, մրգեր եւ բջջանյութով հարուստ սնունդ: Օրինակ`
- ավանդական վարսակի փաթիլներով եւ կաթով շիլան
- հատապտուղներով լցոնված յոգուրտ
- ձու` հացով (նախընտրելի է 2-րդ կարգի ցորենի ալյուրից թխված կամ լավաշով) եւ թարմ քամված հյութի հետ
- պանրով բուտերբրոդ, նորից թարմ հյութի հետ
- թարմ մրգեր ու բանջարեղեն
- կեքս կամ չորաբլիթ
Շատ հաճախ երեխան ուղղակի շտապում է եւ հրաժարվում ուտելուց: Այս դեպքում կարելի է սկսել կակաոյից կամ կաթից, որը նույնպես շատ սննդարար է, եւ խմելը շատ ժամանակ չի պահանջում: Հետո աստիճանաբար կարելի է մեծացնել նախաճաշի ցուցակը:
Հիշեք, որ երբ երեխան հաճախ է ուտում ֆաստ ֆուդ, քաղցր կամ տապակած սնունդ, նրա համային ռեցեպտորների զգայնությունը փոխվում է, ու հետո երեխային դժվար է լինում առողջ սնունդ ուտել (այս դեպքում` ավելի քիչ աղի, պակաս յուղոտ եւ քաղցրը քիչ):
Եղեք համբերատար, խորամանկ ու աստիճանաբար սովորեցրեք երեխային նոր սննդակարգին:
Ամեն առավոտ տարբեր բաներ առաջարկեք ձեր երեխաներին: Մշտապես նույն սնունդը (ասենք, որոշ երեխաների համար տանջալի վարսակի փաթիլները) կարող է, հակառակը, գցել ձեր երեխայի տրամադրությունն ու փակել ախորժակը: Նույնիսկ ամեն օր տարբեր հաց գնելը կարող է երեխայի համար թարմության ու փոփոխության տպավորություն ստեղծել:
Առողջ սնվեք եւ սովորեցրեք նույնը ձեր երեխաներին վաղ հասակից:

ՎԼԱԴ ՄՈՒՐԱԴՅԱՆ